2 Kedinto 9 - Seysyo No Tao

Isidong so akma tey kakteh do cinai

¹ O vazay rana do sidongan ta so sinjya do Yotay am tana ji ko na meyteygami jinyo.

² Am cyaha, ta ko katenngan o na kajya salitan jinyo. Ta nyazwazway ko inyo do tao do Maciton, do kanimapapo nyo sya no kaminasawan so kasidong nyo sira. So da peyzokaban inyo a tao do Sila a yatey makdeng a yamanidong so tao.

³ So ko tovoyan si Tito a kano rarwa a akma tey kakteh do cinai a mangay jinyo do dang. Inaoy si mangononong o ciring ko do kanoyong na rana no kingking nyo amyan rana. So ipacimangno na no namen azwazwayan jinyo.

⁴ No si myan so tao do Maciton a macihza jyamen a mangay a kapakateneng da do kingking nyo abo am jyabo kaji namen anigan a. So ikakman nyo sang a manig an.

⁵ Am ori an o ikapyapya pa no kapanovoy ko pala sira a manmanma a mangay jinyo do dang a amlovot so nipanci nyo a kingking nyo no kakwa pa. Inaoy no si manoyong rana myan no si makaranes ko na jinyo dang. Ta ori o pakatovilan da jinyo a masaray a manidong so tao.

⁶ Manakem nyo an. Ta o apereh so nipamowa am apereh o mahap da. O aro so nipamowa am aro mahap da.

⁷ Am to nyo palololwa o kingking nyo do onowned nyo. Ji nyo manenesehan, ta makto nyo an. Ta isaray na ni Ama ta do to o masaray so onowned a meykingking jya tao.

⁸ Ta arakorako pa o itoro na jinyo ni Ama ta do to. So ikanoyong nyo to meypanpan do kanekanen nyo a manidong so ikeykasi nyo a tao.

⁹ Akman so ciring do Seysyo. Maniring am, “O manidong so makasi a tao am peyyanen na ni Ama ta do to do onowned na a mangay no makwa.”

¹⁰ Si Ama ta do to am yapwan no mowahen da kano kanen da. Akman sang an, ta anoyngan nyo si Ama ta do to a manta ninyo so makakaday a ipanidong nyo so tao. So ikakman nyo so kayo so pangangarilawan a mapka no asi na.

¹¹ Absoin na inyo an. So ikasangib nyo a manidong so tao an. So sarayan da nya ji Ama ta do to so apo jinyo a nisidong nyo sira.

¹² Ta o kingking nyo am yamanoyong yamakasidong so sinjya. So ikanoyong da no aro a tao a somaray nya ji Ama ta do to.

¹³ O akman rana sang a ipanidong nyo so tao am ipakateneng da jinyo no aro a tao a yaomonot ji Kizisto a yaji mapasala do nanao ni Kizisto a yamanidong so tao. Am ori o da miminan so azwazway a itoro ji Ama ta do to no aro a tao.

¹⁴ So da ikakdeng no tao a yameyneynozi ninyo, do da kapakacita so aryarilaw na jinyo ni Ama ta do to.

¹⁵ Isaray ta ji Ama ta do to, do na kateywara no pangangarilawan na a yana nitoro jyaten!