2 Kedinto 8 - Seysyo No Tao

Kingking da no sinjya

¹ Manga kakteh ko do cinai, inaoy no si katenngan nyo o aryarilaw na ni Ama ta do to do peycyakyokyokayan na do Maciton.

² Tana tey makdeng o nilamdaman na sira ni Ama ta do to am sira na to naray. Tana mavak o velek da am da makto o da kapeykingking so da ipanidong.

³ Ko na ji naywa o ciring ko am o kingking da am yarwaro rana kano yada makazamo do kataotao da a da nakem si Ama ta do to.

⁴ Ta da to meynakman o da kai jyamen a manci no kasidong da so akma dey kakteh do cinai a sinjya do Yotay.

⁵ Namen jyaktoktwan o vazay da a yatey yaro. Ta sira rana am da nipeykingking ji Ama ta do to o kataotao da a mahap so vazay na a yaomamizing so ciring namen.

⁶ Am ori o namen kakzeban si Tito a to ngyan jinyo do dang a somidong jinyo a mapakavos so nipamnekan nyo a vazay a marilaw no akma nyoy kakteh do cinai.

⁷ O yamakakaday a yamyan jinyo a nakenakem nyo si Ama ta do to a kano teneteneng nyo a mangononong a kano kowyowyat nyo a manidong so tao a kano aryarilaw nyo jyamen am yateywara rana an. Am ori o namen kakzan inyo a yajingbeywan do akman sya panidongan so tao.

⁸ Am beken a ko gacigatan inyo a mapeyvazay sya. Ta ko ipaziman jinyo o kakdekdeng da no sinjya do Maciton a somkad do kanoyong na kalas na no pangangarilawan nyo so icyatatao nyo.

⁹ Nyo na katenngan o pangangasyan ni Yeso Kizisto a Panirsirngen ta. Iya rana am abwata o kakzeben na an. Ta iya rana am tey meynakem do teyngato. Am na kapanadnad jyaten. So na ikakmey makasi a tao. Na apyapyahen pa o na katoda katawwan a yamapazanod jyaten do azwazway na do teyngato.

¹⁰ Ko naknakmen o akman sang a vazay am apyapya rana o kapakavos nyo sicyaikwaya so nipeysinsinmo nyo no kaminasawan a ipanidong nyo so tao. Ta nimanma kamo a nimapeyvazay so akman sya. So ika inyo no mapeynakem so akman sya.

¹¹ Am ori o ji nyo pahephepi jya a pakavosen. Ta inarahen nyo o kakdekdeng nyo no kavayo nyo pa mapeysinsinmo sya. Am to nyo mangozai o myan jinyo.

¹² No si manoyong kamo so onowned no meykingking kamo am jyabo kaji na narayan ninyo ni Ama ta do to a. Ta o kakzeben na jinyo ni Ama ta do to am beken a karo na, ta o myamyan jinyo.

^13-14 Beken a ko ziknahen inyo a somidong so makasi a tao. No kamo manoyong a yamabsoy sicyaikwaya am sidongen nyo sira yamakcin a tao. Cyaha, ta no mabsoy sira am sidongen da inyo no makcin kamo. So ikanoyong nyo a macisidosidong do alalaw nyo.

¹⁵ Ta maniring do Seysyo am, “O aro so nimahap am abo dang o mapanpan. O apereh so nimahap am todey macinet.”

Si Tito a kano kararay na a mangay do Kedinto

¹⁶ Namen isaray ji Ama ta do to, ta na nipait si Tito. So na icyakman jyamen a yamakdeng a yasomidong jinyo.

¹⁷ Beken a na kamizing so ciring namen, ta yamonganay jya yamakza no na kangay jinyo do dang.

¹⁸ Namen manovoy so yasa ka tao a macihza jya. Iya rana am da ikanig no tao do peycyakyokyokayan na a yameylimwang no Mapasaray a Ciriciring na ni Ama ta do to.

¹⁹ Beken a ori an, ta iya rana am da nitenngan no peycyakyokyokayan na yamacilivon jyamen a mapeyvazay so pangangarilawan na ni Ama ta do to. O namen ahapan so akman sya vazay am yatomngeh do azwazway ni Ama ta do to a ipakateneng da jyamen a meyngongyod so nakenakem a mangarilaw so tao.

²⁰ Namen apzatan o onowned namen a yatomalamozong no aro a nizpi. Ta maraherahet o kazyak da nyamen no aro a tao.

²¹ Beken a do tangain ni Ama ta do to o kapya namen so icicirawat. Ta akman sang do tangain no tao.

²² Am ori o namen ipanovoy so yasa ka mahakay a macihza jira. Iya rana am namen masangib rana yaileylamdamen so onowned. Am ori o namen pakatenngan jya a tey makdeng a yamanidong so tao. Am ori o na ikasaray so onowned a yasomidong jinyo.

²³ Si Tito rana am kararay ko ya a yasomidong jinyo. O yamacihza jya rarwa ka mahakay am nitenngan da no peycyakyokyokayan na. So ikanoyong da pacikazwayan ni Kizisto.

²⁴ Taotawwen nyo sira a kamimin da no aro a kyokay a makateneng do akman sang a pangarilawan nyo a kaji da palasan so nyazwazwayan namen jinyo.