2 Kedinto 7 - Seysyo No Tao

¹ Am ori an manga kakteh an, no yamanoyong o akman sang a nakem na jyaten ni Ama ta do to am apzatan ta o onowned ta an. Ji ta mamyapyan o kataotao ta kano nakenakem ta a macizavoz do raraten. Ta naknakmen ta o kaji tamo meylimotngan so onowned a omraralay ni Ama ta do to.

Sarasaray ni Pawlo

² Inarahen nyo yamen so nakenakem jinyo an. Ta abo namen nirahet no kangangay do kadwan jyaten. Yabwata asa ka tao namen nilittan no ciring namen.

³ O ko peycirngan so sang am beken a ko patwawen o nyo karatan. Ta nipanci ko na jinyo namen karilaw ninyo. Tana mavyay namen a tana mawakwak namen am abo makapeysyay jyaten so nakenakem.

⁴ Yako ipeyhanhan inyo. Yako azwain inyo. Tana amyan so aro a alalaw ko am ko jyanyaheyan. Ta yako ipeyhanhan inyo a mapadnadna so nakem ko.

⁵ Ta makaranes namen do Maciton am ji namen nimeywalam. Ta ji namen angned so ninyakan, do katey yaro no alalaw namen do peycyeylilyan na do kazyakan da nyamen a kapaciyoman na pa no kasinalaw namen ninyo a mablis so nakenakem ji Ama ta do to.

⁶ Am si Ama ta do to a marilaw no makasi a tao am ori nisomidong jyamen a yanitomovoy si Tito a yamapait jyamen.

⁷ Beken a na kai do jya an. Ta aro o ciring na a nipanci na jyamen do kanimapait nyo sya a kapanci nyo no kakzan nyo nyaken a macita, keyngen nyo so onowned a makanakem so marahet a vazay nyo no kakwa. So nyo ikanoyong a mahap so vazay ko. Ori o ko sarayan no akman sang jinyo.

⁸ O mina teygami ko jinyo no kakwa am tana nikazabab nyo so onowned am ko ji nimaneseh. Am manakenakem ko am jyabo kaji nyo mazababan so onowned no mina ciring ko jinyo do teygami ko a. Am ori o icyakma koy maneneseh.

⁹ Am ko na masaray sicyaikwaya. Am beken a ko isaray o kanimazabab nyo nyaken so onowned. Ta o lavyan nyo am nyo nikablis so onowned. Ta nakenakem na ori ni Ama ta do to. So nikapya no vazay namen jinyo.

¹⁰ Ta o omlavi a mamlis do peyraratenan da am niblis na ni Ama ta do to so onowned da a ipeypapya da. Am o monganay do karawan a ilavi no onowned da no ji makanakem si Ama ta do to am ipeykaraherahet da.

¹¹ Cittey kamo pala. Ta si Ama ta do to rana am na nipeypapya jinyo o lavyan nyo a meypakdeng so nakenakem jya. Ta nyo nikaoya rana o mina raraten nyo. Nyo nikaoya o peyraratenan na no asa ka tao ang. Ta nyo ji mya o kapacizagom nyo jya a peydednan no oyaoyyan na nya ni Ama ta do to. O akman rana sang a onowned nyo sicyaikwaya am yongkad na rana no kanoyong nyo nimamlis rana so onowned.

¹² O ko nivatvatkan do teygami ori am ko ivavaga do meyraraten a tao a kano ji na panadnada tao. Am o ney makdeng a peypeypangayan na pa no mina teygami ko jinyo am ko patwawen o apya nakenakem nyo jyamen do tangain ni Ama ta do to.

¹³ Ori rana o nikait jyamen an. Am beken a orii an, ta o sarasaray ni Tito am ori o yanamen isaray. Ta nimamimin kamo a nisomidong sya. So na ikasaray.

¹⁴ Tana nyazwazway ko ninyo do tangain ni Tito am abo kalasan na no nang. Ta o mina ciring namen a pagazen namen jinyo am yamamimin a manoyong ori. So namen pacyanoyngan do namen pazwain do tangain ni Tito a yamanoyong.

¹⁵ Am no na manakem inyo a aro a tao a yaomanoyong ji Ama ta do to am yakmey to ngyan jinyo o onowned na, do nyo kapeyveyveken sya.

¹⁶ Ko tey masaray sicyaikwaya do ko kapeyhanhan rana ninyo.