2 Kedinto 6 - Seysyo No Tao

¹ Yamen rana na pacipeyvazayan ni Ama ta do to am namen vavagan inyo o kaji nyo tongbowan so aryarilaw na jinyo ni Ama ta do to.

² Ta maniring si Ama ta do to am, “No katawag nyo jyaken am nimamizing ko na inyo an. No keyyan no alalaw nyo am nisidong ko inyo an.” Amizngen nyo an. Ta sicyaikwa rana ya am na pantan yaten so pangangasyan na ni Ama ta do to. Sicyaraw eya am manoyong a araraw no na isidong jyaten ni Ama ta do to.

³ Namen ji mapeyvazay so marahet a vazay a tamwadan da jyamen no tao. Inaoy no si ji namen meyvazay so marahet a vazay a ikazazat do tao a omonot ji Ama ta do to.

⁴ Yamen rana do yamakakaday a vazay am yanamen akmey tongbowa o yameykamadadayan a alalaw, do namen kanoyong a lamlamsoy ni Ama ta do to.

⁵ Nibakbakan da yamen. Nyaneban da yamen. Nigolo da o cicilwan namen no tao. Nimazikna namen. Nimapowaw namen ji makaitkeh. Nimakcin namen.

⁶ Am keyyan no teneteneng namen a kano pangarilawan namen a omzat do nakenakem namen. Am ori o to namen nangboi sya. So kapya namen a nisidong no Seyzi a meyngongyod a marilaw no tao.

⁷ Nioyatan na yamen ni Ama ta do to a meylimwang no manoyong a nanao na a mapacitacita no kanoyong namen a lamlamsoy na ni Ama ta do to. So icyakma nameney mapeyvoovoo so apya nakenakem namen a iharag namen so amrahet jyamen a tao.

⁸ Amyan so zomwazway jyamen am amyan so mapeyleylak jyamen. So ikanoyong namen a ipanci da no tao a mapeycyakawad so tao. Am abo akman sang a nakenakem namen.

⁹ Da ipanci o kabo no tao a yamakateneng jyamen. Am yajyakman sang, ta yabo o yaji makateneng jyamen a tao. Da ipanci yamen a yana nimazakat. Am yajyakman sang, ta namen pa mavyay. Tana da nibakbakan yamen am namen jya nimawakwak.

¹⁰ Tana yamyan so namen ilavi so onowned am yamyan so namen isaray so onowned. Tana namen makcin am cyaha, ta namen avyain o pahad no aro a tao. Tana yabo o peymeymasaodan namen do karawan am cyaha, ta abo kalahen namen a yamacikaop ji Ama ta do to.

¹¹ Inyo rana kagagan namen do Kedinto am namen ji manayo so ciring jinyo an, ta namen tey kaglaw inyo.

¹² Beken a namen taywen o aryarilaw namen jinyo. Ta monganay rana jinyo a yaji ngiwang do onowned nyo.

¹³ Ko na inyo abneken a minapodpod jyamen. Am ori o namen peycirngan sang. So inaran nyo jyamen so nakenakem jinyo.

Ji kamo macizanod so onowned do ji manaralay a tao

¹⁴ Ji kamo macizanod so onowned do ji manaralay a tao an. Ta ji meyyangay o pangtoktwan nyo a ka nira. Ta jyabo kapeyzavoz no apya kano marahet a. Akman sang o mazngang a kano kasarisaryan, ta ji meyzavoz.

¹⁵ Jyabo kapacizanod ni Kizisto ji Satan a. Jyabo kapeyyangay no amraralay ni Ama ta do to a kano ji manaralay a tao a.

¹⁶ Ji nyo peyzavoza o raralayan nyo ni Ama ta do to a kano malas a iraralay da no tao. Ta yaten o na yanan no to meyyonong a Tao do to. Akman so ipanci na do Seysyo. Ta maniring am, “Macikaop ko do omanoyong jyaken a tao a keyyan ko do onowned da. So abnekan da jyaken a Tao do to da. So ikanoyong da italamozong ko a tao.

¹⁷ Am ori o ji nyo pehngai so onowned nyo do ji manaralay a tao. Ji kamo macizanod jira. Ji nyo nginara o malas a vazay da. Ta ori o sarayan ko ninyo.”

¹⁸ “Ama nyo yaken. Inyo rana am anak ko inyo. O ciring rana ya am si Ama ta do to a Panirsirngen ta o mapeyciring sya.”