2 Kedinto 5 - Seysyo No Tao

Kataotao ta do teyngato no makwa

¹ Tamo katenngan o na kakmey vahay no kataotao ta do karawan eya a mababalinas. Am no makwa am ipanta na yaten so asa ka vayo a kataotao ta do teyngato ni Ama ta do to. Am beken a nyamaog no tao, ta nyamaog ni Ama ta do to. Am ori o to na meyyonongi.

² Tana tamo macizizikna sicyaikwaya yatoda ji nalap a yamangay a meyvahay do teyngato am

³ no marateng o araraw no kapanta na nyaten so vayo a kataotao ta am beken a todaveyvow a pahad ta, ta macyangay dang o vayo a kataotao ta.

⁴ O kataotao ta ya akma tey vahay do karawan eya am yamakahap so alalaw ta do karawan. So to ta ji ngamogi so kangay ta do teyngato, do na katey yaro no alalaw ta do teyrahem. So ikanoyong na rana no maliman a kataotao ta ya alitan na rana no vayo a itoro na ni Ama ta do to a to meyyonong a kataotao ta.

⁵ Ta isonong na yaten ni Ama ta do to a somazap so akman sang a yeyyak ta no mata. O yongkad no nang am Seyzi a na nitoro jyaten.

⁶ Am ori an, yaten rana a meyhanhan ni Yeso Kizisto a tao am ji tamo a ratan no onowned no amyan so alalaw ta an. Ta tamo katenngan no mavyay pa o kataotao ta am marai pa o kapacikaop ta ji Yeso do teyngato.

⁷ Tana ta jyacita no mata ta si Ama ta do to am ta ipeyhanhan sicyaikwaya a mangononong do ciriciring na.

⁸ So ikanoyong ta rana jyavokahaw a toda ji ngamaog so kataotao ta do karawan a mangay a macitovong ji Yeso a Panirsirngen ta.

⁹ Tana kataotao ta do teyrahem am tana monganay rana o kataotao ta do teyngato am ney makdeng na am ji ta hamangi o kapasaray ta si Yeso a Panirsirngen ta.

¹⁰ Ta mamimin tamo eya a mangay do tangain ni Yeso Kizisto a pacicin na. To na palololwa do mina vazay ta do karawan o itoro na jyaten.

Anoyngan ta si Yeso, ta ori o ipacikaop ta ji Ama ta do to

¹¹ Namen katenngan o kapeypanam no kapacici na jyaten ni Ama ta do to. Am ori o namen vavagan do tao a amraralay ni Ama ta do to. Ta yana katenngan o onowned namen ni Ama ta do to. Inaoy si akman kamo sang a makateneng do onowned namen.

¹² Beken a namen pazwain o kataotao namen jinyo. Ta namen kakzeben inyo a zomwazway so mina vazay namen do tao. Ta ori o itovis nyo do mapakazwazway no kapya da a ji macipayok so onowned ji Ama ta do to.

¹³ Tana ipanci da yamen no tao a meylamraw am cyaha, ji namen rata ori an, do namen kahap so vazay ni Ama ta do to. Am no si katenngan namen o apya kano marahet am cyaha, ta ipeypapya nyo.

¹⁴ O pangangarilawan ni Kizisto amyan do onowned namen. Ta namen katenngan sicyaikwaya o kanimawakwak ni Yeso no tao do karawan. Am ori o ta icyakmey asa rana a macizanod do inawan ni Yeso a nimawakwak.

¹⁵ Na nikawakwak ni Yeso o tao do karawan. Ori o ji ta to mangozai do aktokto ta. Ta pangozayan ta si Yeso Kizisto a nimawakwak no raraten ta a kapirwa na rana mavyay.

¹⁶ Am ori o ji ta to mangozai do ahahapan ta sya a tomita so icyatatao ta. Tana akman so sang o nyahahapan ta si Kizisto no kakwa am cyaha, ta tamo na niblisan sicyaikwaya.

¹⁷ Ta o macikaop ji Yeso Kizisto a tao am vayo rana o onowned na. Ta nipeymakarwan na rana o adan a icicirawat na. So ikamimin na rana vayo.

¹⁸ O akman rana sang am mamimin ori a vazay na ni Ama ta do to. Si Yeso Kizisto am ori o tanyo ipacikaop rana ji Ama ta do to a mina kavosoyan na. So ta icyakman sang a ipeyhanhan ni Ama ta do to a mangay a mapanop so ji manaralay a tao ji Ama ta do to.

¹⁹ O yanamen ipeylimwang a ciriciring eya am na nipangozayan si Yeso ni Ama ta do to a yamapanop jyaten a tao do karawan. Na ji nita o raraten no tao. So na torwan nya jyamen so nanao na a meylimwang nya do tao a kanop da rana si Ama ta do to.

²⁰ Lamlamsoy na yamen ni Kizisto. Na nitovoy yamen a amvavaga jinyo. Namen akmey kataotao ni Ama ta do to a manci nya jinyo so: Mamlis kamo rana a omanop si Ama ta do to. Ta ori o ipacikaop na jinyo.

²¹ Na nikarilaw yaten ni Ama ta do to. So na nitovoyan si Kizisto abo so raraten a nimalit so raraten ta. Am ori o tanyo ipacikaop ji Kizisto a abwata rana so raraten do tangain na ni Ama ta do to.