2 Kedinto 3 - Seysyo No Tao

Vayo a pangozayan a ciring na ni Ama ta do to

¹ Manngwa, namen pahamahen o aktokto namen? Manngwa, namen akman so yatatasa tao a manta ninyo so teygami a yongkad namen a lamlamsoy ni Ama ta do to? Namen ji ngakzeba inyo a meylimwang nya do tao so kazwayan namen.

² Ta inyo rana am akma kamoy teygami a yongkad namen a yanivatvatkan do onowned namen a vilangan da no tao.

³ Kamo mapayok a akma ney teygami ni Kizisto a yana nivatvatkan a yana niparara jyamen. O teygami rana ya am beken a yana nivatvatkan ni Ama ta do to no ipeyveyvatvatek do mataripis a vato a nitaid na ji Moyse. Ta nivatvatkan no Seyzi no to meyyonong a Tao do to do onowned no tao.

⁴ O namen icyakman sang am si Ama ta do to o nimamnek jyamen a lamlamsoy na. So namen peyhanhanan ni Kizisto a omoyat jyamen.

⁵ Am beken a namen pangozayan o oyowyat namen a yamapeyvazay so sya. Ta o yakapwan no oyowyat a kano teneteneng namen a yamapeyvazay so sya am yapo ji Ama ta do to.

⁶ Iya o yanamen ipakahap so vayo a pangozayan a ciring na ni Ama ta do to a yanamen ipeylimwang. Oya rana am beken a nivatvatkan. Ta pangozayan a ciring no Seyzi. O nivatvatkan a iwawalam am ikawakwak no tao. Am o Seyzi am itoro na jyaten o to meyyonong a ikavyay no pahad ta.

⁷ O iwawalam ni Moyse am nivatvatkan do mataripis a vato. No keyyan no nang am tomwaw rana o azwazway na ni Ama ta do to. No kanang am nimaniray o moing ni Moyse. Am ori o nikakowap da no Isedi a tao no oyowyat na ni Ama ta do to. No si manoyong a mazway o na kapwan no peyoyaoyyan ni Ama ta do to a iwawalam ni Moyse am

⁸ ney manngo o oyowyat no Seyzi a mapanop jyaten ji Ama ta do to. Ta jyabo kaji na azwazwayan pa kano iwawalam ni Moyse a.

⁹ No manoyong o kazway no iwawalam ni Moyse a manci no raraten am arakorako pa o kazwayan na no vayo a pangozayan a ciring na ni Ama ta do to a makavonas so raraten ta, a kabo na rana no raraten ta do tangain na.

¹⁰ O vayo a pangozayan a ciring na ni Ama ta do to am na rana to meyhavasi o adan a pangozayan a ciring ni Moyse.

¹¹ No yamanoyong keyyan no oyowyat na no yaji meyyonownay a iwawalam am jyabo kaji na rakorakwan pa no oyowyat na no yato meyyonong ori a.

¹² Yanamen manoyong a meyhanhan no akman sang. Am ori o yanamen jyaonibi rana a meylimwang no ciring na ni Yeso Kizisto.

¹³ Yanamen jyakman si Moyse a mangap so milakayob a ibengbeng so moing na, kaji da makacittan no Isedi a tao so maniray a moing na, do kanimeypalikey na rana no iciray na sira.

¹⁴ Am o onowned da am yakmey kaneban yatodangay sicyaikwaya. Ta no yada vilangan o yamakakaday a vakong do adan a Seysyo am yakman sang a yamabengbeng o onowned da. Ta o macitovong a tao ji Kizisto o ikapakaro no ombengbeng do onowned da.

¹⁵ Yamangay sicyaikwaya o na ji iwangi no onowned da no yameyvilang do nivatvatkan ni Moyse a vakong.

¹⁶ Am no sazapen da o Panirsirngen ta am keywangan o onowned da.

¹⁷ O yana malavat do jya Panirsirngen ta am Seyzi. O yanan no Seyzi a tao am kowvayan rana o onowned na, ta italamozong na rana no Seyzi.

¹⁸ Yatamo todamimin a yajyabengbengi so moing. Ta o tao rana a omonot do Panirsirngen ta Seyzi am amyan rana jira o azwazway na ni Ama ta do to a omyavayo sira. Am ori o icyakman da sya so icicirawat a tey mazway.