2 Kedinto 2 - Seysyo No Tao

¹ Am ori o to ko na mamneki do kaji ko na ratan so kangangay nyo no si mangay ko pa jinyo no ipisa.

² No si yaken yaomrahet so aktokto nyo am sino pa o ipeyhanhan ko a mapasaray jyaken. Inyo saon o mapasaray jyaken.

³ Am ori an o ko nipeyteygamyan ninyo, ta maraherahet o karahet nyo so aktokto no si makaranes ko jinyo. Ta yako ipeyhanhan inyo a yamapasaray jyaken no si mangay ko jinyo do dang. Ta ko anoyngan o sarasaray ko a sarasaray nyoo.

⁴ To ko meykaoo a meyngen so onowned no kapeyteygami ko ninyo. Am beken a irahet ko so onowned nyo, ta ipakateneng nyo jyaken a tey marilaw ninyo.

To peykabobwa o malas so vazay a tao

⁵ No myan so tao a amrahet so aktokto no karwan no tao am beken a yakehen o raheten na so aktokto. Ta mamimin kamo a ko peycirngan sya. Am beken a ipasnesnek ta so nimapeyvazay so akman sang a tao.

⁶ Ta ikananao na rana o oyaoyyan da nya no aro a tao.

⁷ Inyo rana am to nyo peykabobwa, apwapwen nyo o akman sang a tao an. Ta marahet o katey meyngen na so onowned.

⁸ Am ori an o ko kakzeban jinyo amnanao sya a kapakateneng na rana jinyo a marilaw nya.

⁹ O peypeypangayan no mina teygami ko jinyo asyo am iskad ko do nakenakem nyo. Ta manngo paro sira, panoden da o nakem da jyaken an?

¹⁰ O peykabobwen nyo so marahet a vazay a tao am to ko macyanod so nakem jinyo. Ta o ikakman ko sang am peyyanowanopen ko inyo so nakem do tangain ni Yeso Kizisto.

¹¹ Ta maraherahet o kakata na ni Satan. Ta yabo jyaten o yaji makateneng do ipanlilita ni Satan.

¹² No kangay ko do Teloya ili a meylimwang no Mapasaray a Ciriciring na ni Yeso Kizisto am niwangan na rana ni Yeso o angayan ko peyvazayan.

¹³ Am ko marahet so aktokto, ta ji ko nimasinmo si Tito a akma tey kakteh do cinai. Am ori o to ko naitaiji so tao do dang a kangay ko na do Maciton.

Makata sira o meylimwang no Mapasaray a Ciriciring na ni Kizisto

¹⁴ Am yako isaray ji Ama ta do to, ta yata na macikaop ji Yeso Kizisto. Ta na niharag rana ni Yeso Kizisto o raraten. So ta ikanoyong rana a macizanod ji Kizisto a nimakata. So da ipakateneng rana ji Yeso no tao, do ta kalivolivon no Mapasaray a Ciriciring na ni Kizisto.

¹⁵ Tamo akman rana si Yeso Kizisto a na isaray ni Ama ta do to, do ta kapeylimwang no Mapasaray a Ciriciring na do omanoyong jya tao a kano ji nganoyong jya tao.

¹⁶ Am o ji nganoyong jya tao am ikaoya da o akman sang a ciriciring na ni Ama ta do to, do kangay na jira no peyoyaoyyan ni Ama ta do to no makwa. Am omanoyong jya tao am ikavyay no pahad da. Sino makapeyvazay so akman sang a rako a vazay.

¹⁷ Namen jyakman so aro a tao a yamacininizpi no nanao ni Ama ta do to. Ta namen meyngongyod a nipamnekan ni Ama ta do to a yameylimwang no ciriciring na. So namen ikanoyong a yaji mangalalas so ciring a lamlamsoy na ni Kizisto.