2 Kedinto 13 - Seysyo No Tao

Ney manowji na ipaziman na sira kano peyminaminasyan na nira

¹ Ikeypitlo ko na ya mangay a tomita jinyo. Naknakmen nyo an. Ta taosya o kapaciraherahet nyo ano jya rarwa, tatlo o yongkad nyo a nimakacita sira. Ta ori o ikanoyong na. Ta ori rana am ciring do Seysyo.

² Ko ipanci pa jinyo akman so nipaziman ko na jinyo no keypidwa ko a mai jinyo no kakwa. Am manakem nyo no kaji ko pa angayan jinyo sicyaikwaya an. Ta no ipisa mai ko am jyabo asa ka tao a makatayo do oyaoyyan ko ninyo a.

³ So iyan na pa no makakaday a yongkad nyo do kakma ney mapatwaw sya ni Kizisto so ciring na jyaken. So ipakacita nyo so oyowyat na ni Kizisto a meydedna do meyraraten a tao.

⁴ Tana yakmey yabo oyowyat na ni Kizisto do yada kanimapadket sya do jyojika am oyowyat na ni Ama ta do to o yanimapeyvangon sya. So namen ikakman sang akmey abo so oyowyat a yamacikaop ji Kizisto. Am no namen ioya inyo am oyowyat na ni Ama ta do to o namen pangozayan an.

⁵ Ileylamdamen nyo pala o kataotao nyo. Manngwa, nyo pangononongan o nanao na ni Ama ta do to? Manngwa, nyo jyatenngi na keyyan ni Yeso Kizisto jinyo? No si abo am ji kamo anoyong pa a omanoyong jya.

⁶ Ko ipeyhanhan inyo a makateneng jyamen a manoyong a lamlamsoy ni Kizisto.

⁷ Namen ipeynozi ji Ama ta do to o kaji nyo mapeyvazayan so marahet a vazay a ikaoya namen no si makaranes namen jinyo. Ta namen ikakza o kanoyong nyo rana apiya so nakenakem. Tana abo rana o vazay namen jinyo am cyaha, ta manoyong kamo na omonot ji Kizisto.

⁸ Ta o vazay namen am kapangozay namen do manoyong a nanao a mapeypahagnat jinyo.

⁹ Tana da ipanci yamen a abo so oyowyat a omwoya ninyo a kakdeng no nakenakem nyo ji Ama ta do to am isaray namen o akman sang. O namen kakzeben am kapeypahagnat nyo so nakenakem ji Ama ta do to.

¹⁰ O ko peyteygamyan ninyo am ko kakzeben o kaji ko oyyan ninyo a mangozay do oyowyat na ni Kizisto no si mai ko jinyo do dang. Ta o yana nitoro ni Kizisto a oyowyat na jyaken am isidong ko jinyo. Beken a ioya ko inyo.

¹¹ O ney manowji na yako ipanci jinyo manga kakteh am makowyowyat kamo pa mapeypahagnat so nakenakem nyo ji Kizisto an. So ahapan nyo so ivavaga ko jinyo, akman si Yeso so onowned a apiya so nakenakem do icyatatao na. Ta jyabo kaji na macitovongan jinyo no yatey rako so pangangarilawan na kano yamanta nyaten so ikapiya ta so onowned a Tao do to ta.

¹² Inyo rana am masicyakarilaw kamo a meyminaminasi no kadwan jinyo.

¹³ So da ikamimin no sinjya do jya a yameyminaminasi ninyo.

¹⁴ Inaoy no si macitovong jinyo o pangangasyan ni Yeso Kizisto a Panirsirngen ta kano pangangarilawan na ni Ama ta do to a kapzat na jinyo no Seyzi.