2 Kedinto 12 - Seysyo No Tao

Si Yeso Kizisto omoyat ji Pawlo no abo oyowyat na

¹ Abwata kapyapyan no mapazway. Am na keyyan pa no yalikey yako pazwain. Sicyaikwaya am ko malavat o nitoro na jyaken ni Yeso a Panirsirngen ta a akmey tatateynep a nimacita ko.

² Ko katenngan o keyyan no yasa ka sinjya a mina kapat so icyarwa (14) so awan a nikatkat na do teyngato ni Ama ta do to. Am ko jyatenngi kanimangay na no kataotao na, ta ala pahad na nimangay do teyngato.

³ So ko olyan sya ipanci. O tao rana ori am nimangay do kapyapyan. Am ko jyatenngi kanimangay na no kataotao na, ta ala pahad na nimangay do teyngato. So ko ji makatenngi jya, ta si Ama ta do to yamakateneng jya.

⁴ Amyan do dang am makamizing ori so ji na mya a ipeycicici a vazay ni Ama ta do to. Ori rana am jyatenngi a ononongan a vazay.

⁵ O akman rana sang a tao am ko pazwain. Am yaken rana am yabo ko pazwain do kataotao ko. Ta o yamakakaday a alalaw ko am ori o yako pazwain.

⁶ Am no si manoyong o kapazway ko so kataotao ko am abo karatan no nang. Ta abo na kalalasan no ciriciring ko. Am ko kaji mapazwayan. Ta ko jyakzan o da kazwazway jyaken no tao, do kabo no teywara nimacita da, nimamizing da a monganay jyaken.

⁷ Ta maraherahet o kazway ko so teywara a nimacita ko a vazay do teyngato. So na iyan do kataotao ko no ko maliliw a akma ney bakbakan jyaken ni Satan. Ori o ko ji makadkeci do ko kapazway so kataotao ko.

⁸ Yako ipitlo a yamapasyasi ji Yeso a Panirsirngen ta a mapakaro so akman sang a ingingnen ko.

⁹ O na nitovis jyaken am, “Cyaha, ta yarakorako rana o aryarilaw ko jimo. Ta ko mangay oyatan imo no abo oyowyat mo.” Ori an o ko apyapyan pa so ko kapazway so oyowyat na ni Ama ta do to do kataotao ko. Ta nioyatan na yaken no kabo no oyowyat ko.

¹⁰ Am ori an, ko na to meyhanhanan si Kizisto. So ji ko a raci nya no kangangay no yabo oyowyat ko, da avain yaken, no myan so rako a alalaw ko a kano peyrarehtan da jyaken do kahap ko so vazay ni Kizisto. Ta no abo oyowyat ko am na oyatan yaken ni Kizisto.

Ikarahet na ni Pawlo o kyokay do Kedinto

¹¹ Yako akmey mapazway a tao. Am monganay jinyo o yako ikakman sang a yaji mapazway jyaken do tangain no malas a tao. Tana abo angangayan ko am jyabo kaji ko maciktwan do yamangalalas a beken a lamlamsoy ni Kizisto a.

¹² No keyyan ko pa jinyo do dang am tana masaod ko o alalaw ko am ji ko macimazai o vazay ko. So iyan no yeyyak nyo a vazay, yeyyak nyo a oyowyat, mapeyzokab a vazay akmey yongkad ko jinyo do kanoyong ko a nipamnekan ni Kizisto a omlivolivon no ciriciring na.

¹³ Yabo nyo pacinasan do peycyakyokyokayan na. O ko kaji mangapan so nyo nipatodeh jyaken. So to nyo peykaboboi so kalasan ko a jya nimahap so patodahen nyo jyaken!

¹⁴ Ko naknakmen o ko keypitlo a mangay a tomazogaw ninyo. Am yabo ko kakzeben jinyo. Ko kakzeben am inyo. Beken a nizpi. Ta o kanakan am beken allamen da o inyapwan da. Ta o inyapwan am ori o amlam so ananak da.

¹⁵ Ko ikakza inyo a sidongen an. So ikapyapya na pa no kangay no inawan ko a kapakasidong ko so pahad nyo. Manngwa, ipeyparahet nyo so nakem jyaken o karilaw ko ninyo?

¹⁶ Yabo nyo kalalasan do kaji ko nimziknan jinyo. Am na keyyan no tao a yamanci no ko kapamizing jinyo no yamalas a yamahap so nizpi nyo.

¹⁷ Manngwa, manoyong o kanimapasonson ko so tao a amlita jinyo an?

¹⁸ Nipanci ko si Tito a mangay a tomazogaw ninyo. So nipanovoy ko so tao a macihza jya a mangay. Am nilittan na inyo ni Tito? Jyabo na kaji macingayan jyaken so nakem a. Jyabo namen kaji meyyangangayan no namen ahahapan sya a.

¹⁹ Ala nyo ipanci yamen a yamangamaog no kataotao namen so ciring. Am to ko na macitangayan jinyo am namen jyakman sang an. Ta o ciriciring ni Kizisto o namen ipanci jinyo do tangain ni Ama ta do to. Manga keypong, o vazay namen am namen kanakenakem so yakasidong jinyo a peypahagnaten so nakenakem ji Ama ta do to.

²⁰ O ko ihawa si mangay ko jinyo do dang am macita ko inyo a macitarek rana so nakenakem. Macita nyo yaken a macitarek so nakem jinyo. Ko ihawa ko kapakacita so manginanahet a kano maciskaskad a kano maoyaoyahen a kano mabayo a kano manamwad a kano mangamizing so ciring do palawawan, mapazway a kano mapeyvonag so tao.

²¹ Ko ihawa o kapacimasesnek ko ninyo do tangain ni Ama ta do to no ipisa mangay ko jinyo. Jyabo kaji ko lavyan a makacita so aro a somagpyan a kano mangzakza no kakwa pa a ji mamlis so nakem a tao a.