2 Kedinto 11 - Seysyo No Tao

Si Pawlo a kano mangalalas a beken a lamlamsoy ni Kizisto

¹ Tana ji ko a teneteneng am amizngen nyo pa yaken an.

² Yaken rana am yako pangozayan o pangangarilawan na ni Ama ta do to a yamarilaw ninyo. Kamo akman so jya nimacivahavahay a mavakes a yako tovoin a someksek ji Kizisto.

³ Am yako ikanyahey o kapeyparahet no onowned nyo a todahamang rana ji Yeso Kizisto, akman si Iwa a nilittan no volay.

⁴ Ikeykongo kamo a yato mamyapya no yamacitarek so ipeylimwang a ka nyamen a yaomagaz ji Yeso. Ikeykongo kamo eya a to nganoyong do macitarek so ipeylimwang a Seyzi a kano Mapasaray a Ciriciring.

⁵ Ko ji nganoyngi o ko katonton do yamangalalas a beken a lamlamsoy ni Kizisto.

⁶ Tana ko jyateneteneng a meyzezyak am jyabo katonton ko so teneteneng jira mangalalas a tao. So yako ikasangib a yamapacita no akman sang a vazay jinyo.

⁷ No ko pamizngen inyo no Mapasaray a Ciriciring na ni Ama ta do to am yabwata asa ka apzapzatan a yako nyami jinyo. Ko to pakabowa o kataotao ko, do ko kapyapya pa jinyo a meypahagnat so nakenakem ji Ama ta do to. Manngwa, ko kalasan o akman sang?

⁸ No kapeyvazay ko pa jinyo do dang am patodahan da yaken no tatasa ka kyokay. So yako icyakmey jyaninig no kyokay ori a yako peylamsoin a yasomidong jinyo.

⁹ No keyyan ko pa jinyo do dang am tana amyan so ikeykakza ko am ji ko pa nimapasyasi jinyo. So ikamimin na apo do akma koy kakteh do cinai do Maciton no mapatodeh jyaken. Tana no kakwa am tana no makwa am akman sang. Jyabo kapamyapya ko no kataotao ko a ikazikna nyo a.

¹⁰ Abo malas a ciring ni Yeso. So icyakman ko sang a jyalas so ciring jinyo. Am ori o ko jyamoi a manci nya do pongso no Sila so kakman ko sang a ji ngakday so patodahen da jyaken.

¹¹ Ikongo ko peycirngan sang. Manngwa, ko jyarilawan inyo? Cyaha, ta na katenngan ni Ama ta do to o ko karilawan ninyo.

¹² So ji ko mirwai do akman sang a nakenakem ko a mahap so patodahen nyo jyaken. Ta izavat ko so pazwayan da so ciring da no mangalalas a beken a lamlamsoy ni Kizisto, do kabo no pacicingayan no vazay da jyamen.

¹³ Sira rana mangalalas a tao am beken a meyngongyod sira a lamlamsoy ni Kizisto. Ta sira ji macipayok so icicirawat.

¹⁴ Am jyabo kazyak no akman sang a. Ta kakwakwan ni Satan a mapatpetpeh akmey maniray a tinsi ni Ama ta do to.

¹⁵ Am ori o ji ta ngyaki no mangalalas a tao a peylamsoin ni Satan a akmey apiya so ciring. Ta to rana tenngi o pangavosan no vazay da no akman sang a tao pasingsingtan na ni Ama ta do to.

Alalaw ni Pawlo

¹⁶ So ko olyan pa sya ipanci. Jyabo kapasagsagpyan da jyaken no tao a. Tana pasagsagpyanen nyo yaken am amizngen nyo yaken an a mapazway so aliket a vazay.

¹⁷ O ciring ko na sicyaikwaya am beken a si Yeso Kizisto o yamapahanhan jyaken a yamanci nya. Ta monganay jyaken a mapazway so kataotao ko.

¹⁸ Am da katey yaro no tao a mapazway so monganay jira vazay. Ori o ko ikakman sahang.

¹⁹ Inyo rana am kamo todamimin a yamateteneng a tao. Am ikeykongo kamo eya to mamyapya no jyapsepsek so onowned a tao!

²⁰ Ta no peylamsoin da inyo am littan da inyo am soziban da inyo am ji da ninigan inyo am somiplang so posngi nyo am nyo to macyozai sira.

²¹ Ji ko nasnek a manci nya jinyo am o akman rana sang a vazay am namen jyadkeci a peyvazain. Am no myan so tao a mapazway so vazay da am to ko na mancyan o kateneng ko a mapazway.

²² No si Sipolay a tao sira am Sipolay ko an. No si Isedi a tao sira am Isedi ko an. No si apwapo na sira ni Apolahan am apo na yaken an.

²³ No si lamlamsoy na sira ni Kizisto am ji ko pazway a ciring ko am jyabo kaji ko a haraharan pa ka nira. Ta yarakorako o zikzikna ko so vazay na ni Ama ta do to. Yako ipiro a da aptengen, yada bakbakan, kaji ko angayan no inawan.

²⁴ Ipeylima ko a bakbakan da no tao do Yotay. No sipzotan da yaken am asyam o kasikapat na (39) no karwaro na no ibakbak da jyaken.

²⁵ Ipitlo da yaken a bakbakan no sisipzot no tao do Loma. Ipisa da yaken no tao a nigsahan. Ipitlo ko a apwaro do karakwan no awa. Ipisa ko a kasaraw a kano kasahep do karakwan no awa a to meyyawawat.

²⁶ No kalivon ko am apokwaro no kapeykaranom na, apokwaro do marahet so nakenakem a tao, pacyangayan no alalaw ko do tao do Yotay a kano beken a tao do Yotay a kano alalaw ko do rako a ili da no aro a tao a kano alalaw ko do kabwan no nihakawan no tao a kano alalaw ko do karakwan no awa, a kapacyangay no alalaw ko do ji meyngongyod a akma koy kakteh do cinai.

²⁷ Jingwan sang am masangib ko a ji makaitkeh do katey mazikna ko no kataotao. No makcin ko, mawaw ko, abo isanan ko, mahen ko am akman sira sang o ikarahet ko.

²⁸ Beken a ori an, ta akma koy malpid no kataotao no masagpaw a rara ko, do kaji ko angnedan no ninyakan a makanakem so peycyakyokyokayan na.

²⁹ Ta sino ji ko ingenen no onowned a malma so onowned. Sino ji ko a zababan so onowned a meyraraten a tao.

³⁰ Si zowain ko o kataotao ko am apyapya pa kapazway ko so makakaday a alalaw ko.

³¹ Si Ama ta do to a Ama na ni Yeso a Panirsirngen ta o makateneng jyaken a ji mangalalas. Iya o manoyong a azwazwain ta so ngaran mangay do kaidan no karawan.

³² No keyyan ko pa do Tamaseke am o kalamsoyan no panirsirngen a meyngaran so Aleta am nitovoy na o pamzaten da do ngoso no ili da amrakep jyaken.

³³ Am keyyan no sinjya a nitomonton jyaken no kolili do yala a pakasen do pazevngen no makarang a atoy no ahad no ili da. Ori o nipakasaway ko. So ji na nimakarakepi jyaken.