2 Kedinto 10 - Seysyo No Tao

Ipaciwarawara na ni Pawlo o vazay na

¹ Yaken rana am si Pawlo ko a yamvavaga jinyo. No kamo maniring am, “Ka apiya so ciring no ka macikaop jyamen. No ka ji macikaop jyamen am mo ji ngeypeypepzaci yamen do teygami mo,” kwan nyo yaken. Am sicyaikwa rana ya am ko na hapen o kapyapya na ni Kizisto a yamapasyasi jinyo.

² Ji nyo ngakzeba o kanig ko ninyo no si mai ko an. Ta jyabo kanig ko no yatomamwad jyamen a, a yamanci no namen kapazway so aktokto namen.

³ Tana namen macizavoz do tao do karawan am o namen ipacirawarawa am beken a yamonganay do karawan.

⁴ Ta o voovoo namen am beken a yamonganay do oyowyat a kano teneteneng do karawan. Ta o oyowyat na ni Ama ta do to o voovoo namen a yato manbalinas so vazay ni Satan a yamangalalas so tao.

⁵ Namen pahawahen so makakaday a mapazway a ciriciring a kano malas a nakenakem a yada izazat do tao a makateneng ji Ama ta do to. So namen pangozayan do oyowyat ni Ama ta do to a yamapanod so ji manaralay a tao ji Kizisto.

⁶ No si manoyong o kanod nyo rana ji Ama ta do to am ioya namen sira o ji ngonot a tao.

⁷ O vazay no tao o macita nyo. Am nyo jyacita o onowned no tao. No si amyan so tao a manci no katalamozong na ni Ama ta do to am manakenakem pa an. Ta beken a iyaha o yamonganay ji Kizisto. Ta namen akman sang a yamonganay ji Kizisto.

⁸ O na nitoro jyamen ni Yeso Kizisto a vazay namen am namen sidongen inyo. Beken a namen ipeyparaherahet inyo. Am ori an, tana teywara o pazwayan namen so vazay namen am jyabo kanig namen a.

⁹ Ji nyo mancyan o kangangamo ko jinyo no ciring ko do teygami an.

¹⁰ Yamyan so tao a yamapeyciring so, “No yameyvatvatek si Pawlo am tana yamangdet pa, yajyowyat am. Am no yana to macimata eya am malma, yabo so oyowyat a yamarahet so ipanirisiring.”

¹¹ O mapeyciring sya a tao am naknakmen da an, no kabo namen an. Ikongo ciring namen do teygami. Jyabo namen kapacitarek so yanamen ahahapan sya do namen yai rana.

¹² Namen jyadkeci namen kapazanod so kataotao namen do yamapakarakarang so kataotao da. Ta yamanoyong da kakmey ji makownong jya an, a yamapehngay so kataotao da do kadwan jira.

¹³ Jyabo na kateywara no namen pazwayan so kataotao namen. Ta o vazay namen ji Ama ta do to na pamindan. So na nipaminda jinyo no vazay namen a namen pazwain.

¹⁴ No manoyong na kapaminda jinyo am yajyalas o na kaji meyhavasan no ciring ni Kizisto a yanamen ipamizing jinyo, do kaney manma namen a yameylimwang no Mapasaray a Ciriciring na ni Kizisto jinyo.

¹⁵ O yanamen jya nimatokod rana a ili am namen jyadkeci a yapazwain a manci no kanimapeyvazay namen sya. Am namen isaray o kapeypahagnat no onowned nyo. Ta ori o karakorako na pa no vazay namen jinyo,

¹⁶ a yangay namen pa do peycyeylilyan na a peylimwangan no Mapasaray a Ciriciring na ni Ama ta do to. So ji namen mapazwai so nipakavos da vazay no tao a kazwayan namen.

¹⁷ Akman so ciring do Seysyo. Maniring am, “O mapazway a tao am apyapya o kapazway na so vazay na ni Ama ta do to a Panirsirngen ta.”

¹⁸ Ta o ipanci na ni Ama ta do to apya so vazay am ori o manoyong a azwazwain. Ta o mapazway so kataotao na am ji na narayan ni Ama ta do to o akman sang.