1 Yowani 5 - Seysyo No Tao

Ipeyhanhan ta si Yeso Kizisto

¹ O tao rana omanoyong ji Yeso Kizisto a Misayya am manoyong o akman sang a anak na ni Ama ta do to. O tao a omraralay ni Ama ta do to am akman sang a marilaw no akma ney kakteh do cinai, ta meyyangangay sira anak na ni Ama ta do to.

² No si iraralay ta si Ama ta do to a mahap so nanao na am katenngan ta rana o kapeyngongyod ta marilaw no akma ney anak ni Ama ta do to do karawan.

³ O peypeypangayan no kararalay ta ni Ama ta do to am onotan ta o ciring na. Ta jyasalit o ciring na ni Ama ta do to a onotan.

⁴ Mamimin o anak ni Ama ta do to o makaharag so marahet a vazay do karawan. O ipakaharag da so marahet a vazay am voovoo da o kapeyhanhan da ni Yeso Kizisto.

⁵ Sino sira o makaharag so marahet a vazay do karawan. Omanoyong ji Yeso Kizisto a Anak ni Ama ta do to a tao am ori saon o makaharag sya.

⁶ O nimai do teyrahem a nitaktakan no ranom a nimvoyog so rala am si Yeso Kizisto. O ranom a kano rala na am yongkad no ka Misayya na. So icyakman na sang no Seyzi na ni Ama ta do to a macyanoyong jya. Ta o Seyzi rana am tey manoyong.

⁷ Meykatlo o macyanoyong jya.

⁸ Ori rana am Seyzi a kano ranom a kano rala na a nimvoyog a nimawakwak no raraten ta. So icyakma dey asa nira ori a yongkad na Misayya.

⁹ Tamo anoyngan o yada ipeylimwang no tao. Am maharahara pa si Ama ta do to a meylimwang no Anak na.

¹⁰ Am o tao rana omanoyong do Anak na ni Ama ta do to am manoyong keyyan na do onowned na no ciring na ni Ama ta do to. Am o ji nganoyong ji Ama ta do to am alalasen na si Ama ta do to. Ta ji na nganoyngi o ciring na ni Ama ta do to a meylimwang no Anak na.

¹¹ O ciring rana nipeylimwang na ni Ama ta do to am nitoro na rana jyaten o to meyyonong a ikavyay no pahad ta. Am o yapwan na no nang am Anak na ni Ama ta do to.

¹² O tao a omanoyong do Anak na am amyan jya o to meyyonong a ikavyay no pahad na. O ji nganoyong do Anak ni Ama ta do to am abo jya o to meyyonong a ikavyay no pahad na.

To meyyonong a ikavyay no pahad

¹³ O ko vatvatkan do jya am ko ipanci jinyo o na rana keyyan jinyo a yaomanoyong do Anak na ni Ama ta do to no to meyyonong a ikavyay no pahad nyo.

¹⁴ Abo ikanyahey ta do tangain ni Ama ta do to, ta tamo ipeyhanhan o na kamizing so inozi ta no si pangozayan ta o nakenakem na ni Ama ta do to a mapasyasi jya.

¹⁵ Tamo anoyngan o kamizing na so inozi ta ni Ama ta do to a tomoro no amin ta jya.

¹⁶ No makacita kamo so akma nyoy kakteh do cinai a meyraraten am ipeynozi nyo ji Ama ta do to a kavonas na jya kapanta na nya so to meyyonong a ikavyay no pahad na. Am o omalalas do Seyzi am ji ko na mancyan o kapeynozi nyo nya. Ta manoyong o akman sang a peydednan no peyoyaoyyan na ni Ama ta do to.

¹⁷ O malas a vazay am mamimin a raraten o akman sang. Am amyan dang so jyavonas.

¹⁸ Yaten rana anak ni Ama ta do to am ji ta rana ngakdaya o kapeyraraten ta. Ta apzatan ni Yeso Kizisto o onowned ta. So ji na rana makagogaji nyaten ni Satan.

¹⁹ Tamo katenngan o kapacikaop ta ji Ama ta do to. So ta pakatenngan do kapacikownongan da ji Satan no yaji manganoyong a tao do karawan.

²⁰ Tamo katenngan o Anak ni Ama ta do to a yanimai rana a yamanta nyaten so teneteneng ta a ta ipakateneng do manoyong a Tao do to. So ta ikanoyong a macikaop do ney manoyong na a Tao do to a kani Yeso Kizisto a Anak na. Iya rana am manoyong a Tao do to a yapwan no to meyyonong a ikavyay no pahad ta.

²¹ Inyo rana manganako am makowyowyat kamo pa mapahawa so kataotao nyo do malas a iraralay da.