1 Yowani 4 - Seysyo No Tao

Manoyong a nanao a kano malas a nanao

¹ Inyo rana manga keypong am ji nyo to peyzangkapa sira anoyngan o manci no keyyan na jira no Seyzi. Ta ileylamdamen nyo o kanoyong na, kalas na no ipanci da Seyzi a apo ji Ama ta do to. Ta yaro sira o yamangalalas no nanao da a tao.

² O ipakateneng nyo do tao a yanan no Seyzi na ni Ama ta do to am to nyo na tenngi o tao a manci ni Yeso Kizisto a nimatazak a tao, ta ori o manoyong a yanan no apo ji Ama ta do to a Seyzi.

³ Omalalas ji Yeso a tao am abo jya o Seyzi na ni Ama ta do to. O akman sang a tao am alalasan da si Kizisto. Nimamizing nyo na o kai no akman sang a tao do karawan. So na ikanoyong rana yamyan do karawan.

⁴ Am inyo rana manga ovay am yakamo macikaop ji Ama ta do to. So nyo ikanoyong a yarana nimharag so malas so ipangnanao a tao. Ta yarakorako o oyowyat no Seyzi a yamyan jinyo a kani Satan a tomalamozong nira.

⁵ Sira rana yamalas so ipangnanao a tao am sira macikownongan pa ji Satan. Ta o da ipangnanao am yaji macipayok do manoyong a nanao ni Ama ta do to. So da amizngan sira no ji nganoyong ji Yeso a tao.

⁶ Am yata rana macikaop ji Ama ta do to. Am sira rana yaomanoyong ji Ama ta do to a tao am da amizngen o ipeylimwang ta a nanao. Am sira rana yaji nganoyong jya am da ji ngamiznga yaten. Ori an o ipakateneng ta do manoyong a yanan no Seyzi na ni Ama ta do to a kano kabwan no Seyzi a mangalalas a tao.

Si Ama ta do to o yapwan no pangangarilawan

⁷ Masicyakarilaw tamo manga ovay an. Ta yapo o pangangarilawan ji Ama ta do to. O mangarilaw a tao am manoyong a anak ni Ama ta do to, do kapakateneng da ji Ama ta do to.

⁸ O abo so pangangarilawan na am beken a anak ni Ama ta do to. Ta si Ama ta do to rana am yapwan no pangangarilawan.

⁹ Na nitovoy ni Ama ta do to o veyvowen a Anak na a yamapacita no pangangarilawan na jyaten. So ikanoyong ta makahap so to meyyonong a ikavyay no pahad ta.

¹⁰ O pangangarilawan rana am beken a yaten marilaw ni Ama ta do to, ta si Ama ta do to am ori o marilaw nyaten. Ta iya o yapwan no meyngongyod a pangangarilawan. Am ori o nitovoyan na so Anak na mangay mawakwak no raraten ta.

¹¹ Masicyakarilaw tamo manga keypong an. Ta si Ama ta do to o yamarilaw nyaten.

¹² Abo tao a nimakacita si Ama ta do to. Am no si masicyakarilaw tamo am manoyong kapacikaop na jyaten ni Ama ta do to, do kanoyong ta na mapatwaw so pangangarilawan na.

¹³ Yamanoyong ta kapacikaop ji Ama ta do to. So na ikakman sang a yamacikaop jyaten. O ta ipakateneng do dang am na nitoro jyaten o Seyzi.

¹⁴ Si Ama ta do to am na nitovoy o Anak na do karawan a mapatazadang jyaten do teyngato. So namen nipakacittan so akman sang, a namen kapeylimwang rana no nang do tao.

¹⁵ No amyan so tao a manci no kanoyong na ji Yeso a Anak na ni Ama ta do to am manoyong o akman sang a macikaop ji Ama ta do to. So icyakman na sang ni Ama ta do to a macikaop jya.

¹⁶ Tamo anoyngan na karilaw nyaten ni Ama ta do to. Ta si Ama ta do to am yapwan no pangangarilawan. O yanan no pangangarilawan ni Ama ta do to a tao am macikaop ji Ama ta do to. So icyakman na sang ni Ama ta do to a macikaop jya.

¹⁷ O pangangarilawan na ni Ama ta do to am peypahagnat na o pangangarilawan ta. Ta no marateng rana o araraw no ipeykapyapinpin na so tao ni Ama ta do to am masaray ta so onowned. Ta inarahen ta o icicirawat ni Kizisto no keyyan na pa do teyrahem.

¹⁸ No katenngan ta rana si Ama ta do to a marilaw nyaten am abo rana o ikanyahey ta. Ta ji na rana pasingkaji yaten ni Ama ta do to. Ta o pangangarilawan ni Ama ta do to o mapakaro so kanyaheyan ta. No ikanyahey ta pa si Ama ta do to am ji ta pa meyhanhanan a marilaw nyaten.

¹⁹ O ta ipangarilaw am nimanmanma si Ama ta do to a nimarilaw nyaten.

²⁰ No amyan so tao a manci no kararalay na ni Ama ta do to a kapacioya na pa do akma ney kakteh do cinai am mangalalas a tao o akman sang. Ta kaji na aryarilawan no macita na akma ney kakteh do cinai a imanngo rana yajyacita ta Tao do to.

²¹ O ciring na jyaten ni Yeso Kizisto am o omraralay ni Ama ta do to a tao am ikarilaw na o akma ney kakteh do cinai.