1 Yowani 3 - Seysyo No Tao

Macikownongan ji Ama ta do to a tao

¹ Yatey makdeng o aryarilaw na jyaten ni Ama ta do to. Yatey rako o pangangarilawan na a makanket jyaten a abneken a anak na. So ikanoyong no nang a ciring. O yada ji makatenngi jyaten a anak ni Ama ta do to no ji nganoyong jya tao am da ji nganoyngi si Ama ta do to.

² Manga ovay, yaten rana sicyaikwaya am anak na yaten ni Ama ta do to. Am yapa jyatenngi sicyaikwaya o keyteytawan ta no makwa. Am katenngan ta o kakman ta si Kizisto so kataotao no mai, ta manoyong o kapakacita ta sya no mai.

³ O tao rana mapananala so araraw no yai ni Kizisto am ji meyraraten. Ta inarahen na si Kizisto a ji meylimoteng so onowned.

⁴ O tao a mapasobna do iwawalam ni Ama ta do to am raraten o akman sang. Ta o raraten rana am mapasobna do iwawalam ni Ama ta do to.

⁵ O peypeypangayan no na kai ni Kizisto am na vonasen o raraten no tao, do na kabo no raraten na.

⁶ O macikaop rana ji Yeso a tao am ji ngakdaya rana o kapeyraraten. Am o ji ngaro do raraten na am ji sira pa meyngongyod a omanoyong ji Kizisto.

⁷ Manga ovay, ji kamo a litai an. O apya so icicirawat a tao am manoyong o akman sang a ji meylimoteng so onowned a tao, akman si Kizisto a ji meylimoteng so onowned.

⁸ O meyraraten pa tao am macibedbed pa ori ji Satan. Ta nimeycicinda no kakwa o kapeyraraten na ni Satan. Ori na nyai no Anak ni Ama ta do to a ombalinas so vazay ni Satan.

⁹ O anak na rana ni Ama ta do to am ji da rana ngakdaya o kapeyraraten da. Ta macikaop jira si Ama ta do to. Am ori o ji da rana meyrarateni, ta Ama da rana si Ama ta do to.

¹⁰ O peytarkan no anak ni Ama ta do to a kano macibedbed pa ji Satan am o macibedbed pa ji Satan am ji dakzan o apya. Ji da arilawan o icyatatao da.

Ikarilaw nyo o kadwan jinyo

¹¹ O ney manma na nimamizing nyo a nanao am masicyakarilaw takamo an.

¹² Ji tamo nginara si Kayin. Ta iya rana am macibedbed pa ji Satan a to wakwak so kakteh na a meyngaran si Yapo. Am ikongo to na wakwaki sya ni Kayin. O ikakman na sang am ikeynanahet na si wari na, do kanoyonoyong no nyahahapan na sya ni wari na.

¹³ Am ori o ji nyo angyaki nya, manga kakteh, no ikaoya da inyo no ji pa nganoyong ji Yeso a tao.

¹⁴ Yata rana katenngan o yata kanimablis rana so onowned. O ta ipakateneng dang am ta ikarilaw o akma tey kakteh do cinai. O abo so pangarilawan na am mavaod pa ori no raraten.

¹⁵ O macioya do akma ney kakteh do cinai am akmey to mangap so tao. O mangap so tao am abo pa jya o to meyyonong a ikavyay no pahad na.

¹⁶ O ta ipakateneng do pangangarilawan na ni Ama ta do to am si Kizisto nitomoro no inawan na jyaten. Am ori o ikasaray ta manidong so tao. Tana mangay rana o inawan ta do panidongan ta so akma tey kakteh do cinai am cyaha. Apya akman sang.

¹⁷ No myan so mabsoy a tao a makacita so akma ney kakteh do cinai a ji makananaob a kato na ngilikan sya am ji na mancyan keyyan na jya no pangangarilawan ni Ama ta do to.

¹⁸ Manga ovay, taosya o ciring so pangangarilawan an. Ta o manoyong a pangarilawan na am macita do icicirawat na o panidongan na so tao.

Masaray so onowned do tangain ni Ama ta do to

¹⁹ O ikanoyong ta makateneng do kahap ta so manoyong a nanao ni Ama ta do to am amyan jyaten o pangangarilawan na ni Ama ta do to. Am ori o ji ta nyahei do tangain ni Ama ta do to

²⁰ a makanakem so mina raraten ta. Ta ipeyhanhan ta o kavonas na ni Ama ta do to so raraten ta, do katey rako no pangangarilawan na ni Ama ta do to.

²¹ Manga ovay, no abo rana o ikarahet ta do tangain ni Ama ta do to am masaray ta so onowned a omanop rana si Ama ta do to.

²² No myan so amin ta ji Ama ta do to am itoro na jyaten. Ta ta onotan o nanao na a yamapeyvazay so isaray na vazay.

²³ O ciring na jyaten ni Ama ta do to am anoyngan ta o Anak na si Yeso Kizisto a manci no kapasicyakarilaw ta.

²⁴ O tao a omonot do ciring na ni Ama ta do to am manoyong o akman sang a macikaop ji Ama ta do to. So icyakman na sang ni Ama ta do to a macikaop jya. O ta ipakateneng ji Ama ta do to a yamacikaop jyaten am Seyzi a yamacitovong jyaten.