1 Yowani 2 - Seysyo No Tao

Sidongen na yaten ni Kizisto

¹ O yako peyteygamyan ninyo manga ovay am ko vavagan inyo a kakaro nyo do peyraratenan nyo. Am no si amyan so asa ka tao a meyraraten am cyaha, ta ipasyasi na yaten ni Yeso Kizisto ji Ama ta do to. Ta iya rana am abo o raraten na.

² Nimawakwak si Kizisto a omvonas so raraten ta. Am beken a yatehen, ta kazagoman no tao do karawan.

³ No si onotan ta o ciring na ni Ama ta do to am manoyong ta macikaop jya.

⁴ No amyan so tao a manci no kapakateneng na jya kaji na ngonotan do ciring na am mangalalas o akman sang a tao, do kaji na mangozayan jya peyvazain so nanao na ni Ama ta do to a nimamizing na.

⁵ Am o tao a mapeyvazay so ciring na ni Ama ta do to am manoyong ori a omraralay nya. So ipeyngongyod na rana a macikaop ji Ama ta do to.

⁶ O tao rana manci no kapacikaop na ji Ama ta do to am inarahen na an o icicirawat ni Kizisto no keyyan na pa do teyrahem eya.

Vayo a nanao ni Yeso

⁷ O vatvatek ko rana ya manga kakteh am o kapasicyakarilaw tamo an. Ta oya rana am beken a yavayo ya nanao. Ta nimamizing nyo pa no kavayo nyo pa omanoyong ji Yeso o akman sya nanao.

⁸ Am o yako vatvatkan a ciring jinyo am akmey yavayo ori an. Ta o nanao am yana nipacita jyaten ni Kizisto o manoyong a pangangarilawan na. So nyo ikakman sang a yamapatwaw sya. So yana rana ikaslin no masari a yana cirain no kazngangan.

⁹ No amyan so tao a manci no keyyan na rana do kazngangan a kaji na vonasan no pacioyyan na do akma ney kakteh do cinai am jyablis ori a amyan do kasarisaryan.

¹⁰ O tao rana marilaw no akma ney kakteh do cinai am amyan ori do kazngangan, do kabo rana no marahet do onowned na a pacikzan da no tao.

¹¹ Am o mapeyyan do onowned na so oyyan na no akma ney kakteh do cinai am amyan ori do kasarisaryan. So ikanoyong na akmey omalam do kasarisaryan a ji makacita so angayan na.

¹² Ko ipeyteygami inyo a akma koy anak, ta o raraten nyo am yana rana nivonas ni Ama ta do to, do kanimawakwak na nyaten ni Kizisto.

¹³ Ko ipeyteygami inyo a akma koy inyapwan, do nyo kanoyngan ji Yeso Kizisto a nimeycicinda mavyay no kakwa a Tao do to. Ko inyo ipeyteygami a mowva tao, ta yanyo rana niharag si Satan.

¹⁴ Yako ipeyteygami inyo akma koy anak, ta nyo anoyngan si Ama ta do to. Ko ipeyteygami inyo a akma koy inyapwan, ta nyo anoyngan si Yeso Kizisto a nimeycicinda amyan no kakwa. Ko inyo ipeyteygami a mowva tao, ta kamo tey makdeng so nakenakem a meyhanhan ni Ama ta do to, do nyo kapeyyan sya do onowned nyo so ciring na ni Ama ta do to, a yarana nimharag si Satan.

¹⁵ Ji nyo akzan o makakaday a ikeykakza no tao do karawan. Ta no si ikakza nyo ori am meyparai kamo ji Ama ta do to.

¹⁶ O makakaday rana marahet do karawan a akman so pangangagoman ta kano ta macita a ikeykakza ta marahet a kano pahaman ta so nakenakem ta am mamimin ori a monganay do raraten no tao do karawan. So ji na monganai ji Ama ta do to.

¹⁷ O karawan eya kano pangangagoman no tao am ji meyyonownay ori. Am o mapeyvazay so vazay ni Ama ta do to am amyan rana jya o to meyyonong a ikavyay no pahad na do teyngato.

Omalalas ji Kizisto a tao

¹⁸ Manga ovay, yarana makeykai o na pangavosan no karawan. Nimamizing nyo na o na kai no Omalalas ji Kizisto a tao. So yada ikanoyong no omalalas ji Kizisto a yarana meytotwaw. O vazay rana ori am ipakateneng ta na do kasngen na rana no pangavosan no karawan.

¹⁹ Sira rana omalalas ji Kizisto a tao am sya ji meyngongyod ori a omraralay ni Kizisto. Am ori o da rana ji macilovoci jyaten. O manoyong a omraralay ni Kizisto am macikaop sira jyaten. Am sya ji macikaop jyaten sicyaikwaya. Am ori o ta ipakateneng jira omalalas ji Kizisto.

²⁰ Am na rana nitoro jinyo o Seyzi ni Kizisto. Am ori o nyo ikamimin a yarana makateneng do nanao ni Ama ta do to.

²¹ O ko peyteygamyan ninyo am nyo katenngan o nanao na ni Ama ta do to. So nyo ipakateneng do malas a beken a apo do nanao ni Ama ta do to.

²² O mangalalas a tao am omalalas ji Yeso Kizisto a Tao do to. So ikanoyong no akman sang a omalalas ji Kizisto a tao, do kaji da nganoyngan ji Ama ta do to a kano Anak na.

²³ O ji nganoyong do Anak ni Ama ta do to am akman sang si Ama ta do to a ji da nganoyngi. Omanoyong do Anak ni Ama ta do to am akman sang si Ama ta do to a anoyngan da.

²⁴ O ciriciring na ni Ama ta to do a nimamizing nyo no kavayo nyo pa manganoyong am to nyo peyyononga pangozayan. No si manoyong kakman nyo sang am macikaop kamo na ji Ama ta do to a kano Anak na.

²⁵ Ta o ipanci na jyaten a mahap ta ni Kizisto am to meyyonong a ikavyay no pahad ta.

²⁶ O yadomket do teygami ko a ciring am yako ipaziman jinyo do kaji nyo ngamizngan so malas so ipangnanao a tao.

²⁷ Am inyo am na rana nitoro jinyo ni Yeso Kizisto o Seyzi. No si myan jinyo o Seyzi am ji nyo na ngakdaya o nanao da no tao. Ta nanawen na inyo no Seyzi a ipakateneng nyo do makakaday a vazay. O inanao na jinyo no Seyzi am abo do dang malas. Onotan nyo o nanao no Seyzi. Ta ori o ikanoyong nyo a macikaop ji Kizisto.

²⁸ Ji nyo ngawawan o kapacikaop nyo ji Kizisto, manga ovay an. Ta no si marateng o araraw no yai na am abo rana ikarahet nyo no onowned do tangain na.

²⁹ Katenngan nyo o kabo no kararatan ni Kizisto. O tao rana abo so karatan a mangozay do nanao ni Ama ta do to am manoyong a anak ni Ama ta do to.