1 Yowani 1 - Seysyo No Tao

¹ Namen padketen do teygami eya o Ciring a yapwan no to meyyonong a ikavyay no pahad. Ori rana am Ciring na ni Ama ta do to a nimeycicinda a nimyan no kakwa. Nimamizing namen rana o ciring na. Nimacita namen rana ori. So na ikanoyong no kanimakacita namen sya do kanimacihza namen jya no keyyan na do teyrahem. Iya rana am si Yeso Kizisto.

² No kai na do teyrahem am manoyong o kanimakacita namen sya. Am ori o namen peylimwangan nya jinyo so to meyyonong a ikavyay no pahad ta. Ta iya o yapwan no to meyyonong a ikavyay no pahad ta, a nimacitovong ji Ama ta do to do teyngato a nimacikaop jyamen.

³ O nimacita namen a kano nimamizing namen am namen toywen jinyo. So ikanoyong nyo na macikaop jyamen a akma nyoy kakteh do cinai, do namen kapacikaop ji Ama ta do to a kano Anak na si Yeso Kizisto.

⁴ O namen padketan sang do vakong eya am namen ikakza inyo a macikasaray jyamen.

Akmey zezngang si Ama ta do to

⁵ Namen ipeylimwang jinyo o ciring a yanamen nimamizing ji Yeso Kizisto. So ikanoyong na akmey zezngang ni Ama ta do to. So ikabo no masari jya.

⁶ Am ori an, no si ipanci ta o kapacikaop ta jya kaji ta mamlisan a meyraraten akmey amyan do kasarisaryan am manoyong kapangalalas ta, do kaji na macipayokan no nakenakem ta.

⁷ Am no si amyan ta do kazngangan a akman si Ama ta do to am macikaop ta do akma tey kakteh do cinai a omraralay ni Ama ta do to. Ta o rala na ni Yeso Kizisto a Anak na ni Ama ta do to o amvonas so makakaday a raraten ta.

⁸ No si ipanci ta o kabo no raraten ta am alalasen ta o kataotao ta, do kaji ta mangononongan do nanao ni Ama ta do to a nimamizing ta.

⁹ Am no si ji ta naywa o raraten ta ji Ama ta do to a yaji mapeycyakaban so tao am vonasen na o raraten ta, do kapangononong na do ciring na. So icyakma tey nikowyasan a malavang so onowned a abo rana so karatan.

¹⁰ Am no si ipanci ta o kaji ta pa nimeyraraten am manoyong ta ipanci si Ama ta do to a mangalalas. Ta nipanci na rana ni Ama ta do to do Seysyo o kamimin no tao a meyraraten. So icyakma ney abo no ciring na ni Ama ta do to do onowned ta.