1 Timotay 6 - Seysyo No Tao

Ipamizing so peylamsoin da tao

¹ Omraralay ni Yeso a peylamsoin da am amizngen da o mapeylamsoy sira tao an. Ta ori o ji da rehrehci so ngaran na ni Ama ta do to a kano nanao na ni Ama ta do to.

² No si iraralay na si Yeso no mapeylamsoy jinyo a tao am ji nyo akwan a lamlamsoy da o kapeykakteh nyo sira do cinai. Ta ikowyowyat nyo pa somidong so vazay da. Ahapen mo o akman sya vazay a ipangnanao do amraralay ni Yeso a tao.

Malas a nanao a kano manoyong a meynakem

³ Ano amyan so tao a meylimwang no macisala do ciriciring na ni Yeso Kizisto a Panirsirngen ta, kapacitarek na do ipangnanao ta ciriciring na ni Ama ta do to am,

⁴ o akman rana sang a tao am mapahama, abwata so katatenngan. So ikanoyong da makza no kapaciskaskad da a manamwad. So iyan na rana do onowned da no panginanehtan da, pacililimanan da, ji da manganoyngi.

⁵ Ta ori o yapwan no kato da mangamaogan so malas a nakenakem a kano marahet a icicirawat da. O nakenakem da nira omraralay ni Ama ta do to am naknakmen da o kapeynizpi da nya.

⁶ Manoyong o katey yapya no omahap so vazay na ni Ama ta do to am tana abo nizpi am masaray an.

⁷ Matazak a tao ta do karawan am abwata o nipalolo ta an. Am si karwan ta rana o karawan eya am abo o palolwen taha.

⁸ Am ori an, no myan so kanen ta kano ayob ta am isaray ta an.

⁹ O komakzeb so karo no nizpi da am makeykai sira kalittan, ta masanga sira no abo so angangayan a vazay a maozoz so nakenakem. O kapalit no akman sang am mangay sira do makotokotod a lila no apoy a mangay no makwa.

¹⁰ O makza rana no nizpi am yapwan na no meycyamadadayan a raraten na. Ta amyan so tao a tey makza no nizpi a to ngaro rana do manoyong a nanao na ni Ama ta do to. So ikaro na rana no ikeyngen na no onowned.

Itaitaid na ni Pawlo si Timotay

¹¹ Am imo rana am na nipamnekan ni Ama ta do to a yamahap so vazay na. So peymakarwan mo na do akman sang a marahet a kahap mo so meysominogat a onowned. Macilolo ka do apyahen na ni Ama ta do to a kapeyhanhan mo nya. Ji mo a haywan o kapangarilaw mo. Ji ka hayohayowen. Ji ka oyaoyahen.

¹² Makowyowyat ka omahap so vazay na ni Yeso akman so macipalayolayo a komakzeb so kangay na do pacipanmanma na. Ji mo to nazibwan o nitoro na rana jimo a to meyyonong a ikavyay no pahad mo. Ta ori o na agagazan no na nipamnekan jimo ni Ama ta do to. So mo na nipeylimwangan no nang do tangain no aro a tao. So ikanoyong no akman sang.

¹³ O yako ipanci jimo am yongkad ko si Ama ta do to a nimangamaog so meycyamadadayan a kani Yeso Kizisto a jyanyahey a manci no manoyong a ciring do tangain na ni Pangsyo Pilato.

¹⁴ So hapan mo so manoyong a nipakolivava ko jimo a ciriciring. So ikabo no karatan mo mangay rana do araw na no yai ni Yeso Kizisto a Panirsirngen ta.

¹⁵ Si marateng rana o araraw a nipamnekan na ni Ama ta do to am mai rana si Yeso Kizisto. Ta iya o manoyong a azwazwain ta a maveyvow abwata so ikararwa a Panirsirngen do peycyamahamahatawan na.

¹⁶ Ta si Ama ta do to am jyawakwak. Meyvahay do ji macisngeni no tao a maniray. Abwata pa o nimakacita sya tao. So ikabo no macisazap jya. Inaoy no to meyyonong a azwazwain ta, katalamozong na nyaten. Amin.

¹⁷ Pazimanen mo do aro so kangangay sicyaikwaya an, ta ji sira mapakazwazway. Ji da meyhanhanan o aro a apzapzatan da, ta ji da tenngi o kato na meyyonongan no nang a ikapya da. Ta si Ama ta do to o ipeyhanhan da yamanta nyaten so meycyamadadayan.

¹⁸ So pancyan mo nira mapeyvazay so apya vazay, kazonos da a manidong so icyatatao da.

¹⁹ No si akman sira sang am akma dey peyparwen o peymeymasaodan da ji Ama ta do to a keyyan na pa no to meyyonong a ikavyay no pahad da.

²⁰ Imo rana mo Timotay, anak ko am ahapen mo o nipakolivava ko jimo a vazay eya an. Peyyanen mo do onowned mo o vazay eya an. Ta ji mo ngapa o abwata so angangayan a ciriciring.

²¹ Ta yamyan so yatatasa ka tao a mapakateneteneng a yamanci no da kapakateneng rana do akman sang. Am yajyakman sang, ta sira nimavozaw so nakenakem ji Ama ta do to. Inaoy si myan jinyo o pangangarilawan na ni Ama ta do to.