1 Timotay 5 - Seysyo No Tao

Vazay do akma tey kakteh do cinai

¹ Ji mo sira oyyan o rarakeh rana mahakay an. Ta akmey inyapwan mo sira pamizngen. No nanawen mo sira o malalavayo a mahakay am pehngehngain mo sira do kakteh mo.

² No nanawen mo sira o rarakeh a mavakes am to mo peynara sira do ina mo an. No nanawen mo sira o malalavayo a mavakes am makapya ka so nakenakem a omnanao sira. So ikanoyong nyo a akmey meyketeketeh.

³ O vao rana mavakes a abo so mapeylamnay sira am peyveyveknen nyo sira an.

⁴ No myan so anak da no vao a mavakes a kano apwapo da am nanawen mo sira do vahay da mapeylamnay so inyapwan da kano akes da kano akay da. Ta ikakza na o akman sang ni Ama ta do to.

⁵ O vao a mavakes rana abwata so mapeylamnay sya am ipeyhanhan na si Ama ta do to kapangday na meynozi do maraw a kano mahep a mapasyasi jya somidong sya.

⁶ Am o makza no keylamnay da tao do karawan am tana mavyay o kataotao da am akmey nimawakwak o onowned da.

⁷ Ipanci mo jira do omanoyong ji Yeso o akman sang a nanao, ta ori o ikabo no tao a omraherahet sira.

⁸ No myan so tao a ji rana makanakem so zipos na kano kavavahay da am peymakarwan na o nanao ni Yeso. So ikaraherahet na pa kano ji nganoyong ji Ama ta do to.

⁹ O padketen a vao a mavakes so ngaran a azawen no kyokay am sikanem (60) o kakawakawan na. Ipisa nimacivahavahay.

¹⁰ Katenngan da no tao apya so vazay, makananao so anak na, mateneng a manaotao so apo do teysa ka ili a tao. Ji mapahama so nakenakem, kasidong na so amyan so alalaw a tao a kowyat na mahap so apya vazay.

¹¹ O malavayo pa vao a mavakes am ji da padketa pa o ngaran da, ta no si naknakmen da pa o kapacivahavahay da am aryan da na o kapeyvazay da ji Yeso Kizisto.

¹² So iyan na no raraten da, ta ji da hap o mina ciring da no kakwa pa a manci no kahap da so vazay na ni Yeso.

¹³ Sira rana am kalivolivon da meyyowyaw a abwata so vazavazay. O maraherahet pa vazay da am ikazyak da o beken a vazay da, kapeygamogamo da no marahet a ciriciring.

¹⁴ Am ori o ko apyapyan so malavayo a vao a mavakes a mirwa pa macivahavahay a mangahanas a kapeyveyveken da so kavavahay da. Ta ori o ikabo no iraherahet da jyaten no ji nganoyong ji Yeso a macioya jyaten a tao.

¹⁵ Ta yamyan do vao a mavakes so yamablis so nakenakem a somazap so vazay ni Satan.

¹⁶ No myan do sinjya so vao a mavakes am peyveyveknen na an. Ji da to meyhanhanan o kyokay yasomidong sya. Ta o makasi a vao a abo so mapeylamnay sira am ori o sidongen no kyokay.

¹⁷ O tomalamozong rana no kyokay a tao a makateneng do ahahapan da so vazay da do kyokay a yamowyat a meylimwang no ciriciring na ni Ama ta do to a kano mateneng amnanao so sinjya am ikanig nyo sira, kapanta nyo nira so apyahen da no nakem.

¹⁸ Ta maniring do Seysyo am, “O peyvazain a baka am ji ngakcina sira an.” Maniring pa am, “O meyveyvazay a tao am pakanen nyo sira an.”

¹⁹ Ano myan so tao a amraherahet so tomalamozong no kyokay am ji nyo anoyngi no si ji sira rarwa, tatlo o tao a macyanoyong jya.

²⁰ No amyan so meyraraten a tomalamozong no kyokay am vavagan nyo sira do ipacikaop no aro a sinjya. Ta ipaziman so aro a tao.

²¹ Yako myan do tangain na ni Ama ta do to a kani Yeso Kizisto a kano tinsi a yamanci nya jimo. So hapan mo so nanao eya an. No si myan so pacicin mo am amizngen mo o manoyong. Peyyangangain mo sira citahen so karatan.

²² Ji mo to minaknakman o kapamnek mo so tomalamozong no kyokay, ta citahen mo pa o iwawalam na, do kapya na, karahet na. Ta no si myan so raraten na am macilovot ka dang. Ji mo ablisi o apiya nakenakem mo.

²³ Beken a ka ranom na no yopen mo. Ta amyop ka so alikey a potaw cyo a kosozi no velek mo a kaji mo a sangiban a meyngen so kataotao.

²⁴ No mamnek ka so mimong no kyokay am naknakmen mo o yatatasa yamapengkad so raraten a tao. Am yamyan so tao a jyapengkad so raraten. Tana jyapengkad o raraten am cyaha, ta mangay kapeytotwaw na.

²⁵ Akman sang o tao a apya so vazay am katenngan ori. Am tana jyatenngi am abo makatayo sya.