1 Timotay 4 - Seysyo No Tao

Mapeycyakawad so tao

¹ Nipaziman na rana no Seyzi o keyyan no tao no makwa a tomaosya so manoyong a nanao a kahap da so malas a nanao no kalamsoyan ni Satan.

² O somala a nanao am apo do manlita tao. Sira rana am abwata rana o apya nakenakem da a somengseng do marahet a vazay.

³ Ipanci da o macivahavahay a kano mapasakay yamalas, a kapanci da no kaji nganan so karwan no kanekanen. Am o kanekanen rana am nyamamaog na ni Ama ta do to. So sarayan da nya kakan da rana sya no omanoyong ji Yeso a kano makateneng do ciriciring na.

⁴ O na nyamamaog rana ni Ama ta do to am yamamimin a yabo so karatan. Am ori o sarayan ta nya do onowned ta. So ji tanyo meyraci jya an.

⁵ Ta o ciriciring na ni Ama ta do to a kano inozi ta somaray nya jya am ori o ikabo na rana no marahet do kanekanen ta.

O manoyong a lamlamsoy na ni Yeso Kizisto

⁶ No si vahangsowen mo o aro a vazay eya do akma moy kakteh do cinai am manoyong ka lamlamsoy ni Yeso Kizisto, do kakdeng no nakenakem mo a mapeyvazay so manoyong a nanao ni Ama ta do to a yameypahagnat so onowned rana ji Ama ta do to.

⁷ Ji mo pasngesngena o abo so peypeypangayan a katatapilan nyo a ipanci. Ta apyapya pa o kowyat mo a meypahagnat so nakenakem ji Ama ta do to.

⁸ Manoyong kapya na no mapazigton so kataotao am makdekdeng pa o kapeypahagnat ta so nakenakem ji Ama ta do to. Ta ori o makasidong jyaten sicyaikwaya kano makwa no myan ta na do teyngato.

⁹ Manoyong o akman rana sang a ciring. So ikamimin ta mahap sya an.

¹⁰ O yata ikowyat a yamahap so vazay na ni Ama ta do to am ta ipeyhanhan si Ama ta do to a mapatazadang jyaten. Ta iya rana am to meyyonong a mavyay a Tao do to. Am o meyhanhan nya o avyain na.

¹¹ So pancyan mo no akman sang a vazay a kananao mo so kararay mo.

¹² Tana malavayo ka am apzatan mo o ciriciring mo a kano icicirawat mo a kano pangangarilawan mo so icyatatao mo. Akman sang o onowned mo. Ta peycitacittan da imo no omanoyong ji Yeso, kaji da rana ngolalai so ipangnanao mo.

¹³ So ji mo amtaji no kapeyvilang mo so Seysyo do kalwalovotan a kapeylimwang mo nya inanao sira.

¹⁴ Ji mo to nazibwan o oyowyat na jimo no Seyzi a tomalamozong no kyokay. Ta ori rana am nitoro na jimo do kanimanlanlag da nimo no lima da ipeynozi no tomalamozong no kyokay, do mina kapamnek da jimo a mapeyvazay eya.

¹⁵ O akman rana sang a vazay am makowyat ka mapeyvazay sya an. Ta ori o ipakacita da jimo a nimeypakatkat rana.

¹⁶ Meypepzat ka so kataotao an. Akman so sang o ipangnanao mo an. Ji mo macimazai o vazay mo. Ta ori o ipatazadang na jimo ni Ama ta do to do teyngato. So ikakman da sang no pamizngen mo a tao a patazadangen na.