1 Timotay 3 - Seysyo No Tao

Icicirawat no tao a tomalamozong no kyokay

¹ No myan so tao a amnakenakem so katalamozong na no kyokay am apiya o akman sang a vazay an. So ikanoyong no akman sang a ciring an.

² O tomalamozong rana no kyokay am abo oyaoyyan da nya no tao an. Asa o katovong na do vahay. Ji na peyzavozavoza o vazay na. So apzatan na do kataotao na, katwatonton na so vazay na. Ikanig na o icyatatao na, kasaray na manaotao so apo do teysa ka ili a tao a kateneng na mangnanao so tao,

³ jyasaki, ji macililiman, apiya o nakenakem so icyatatao, ji mangamkam so nizpi.

⁴ O vazay na rana do vahay da am pakapyahen na a makatalamozong no katovong na do vahay a kananao na so minapodpod jya. Ta ori o amizngen da so nanao na no minapodpod jya.

⁵ Ta no ji na tenngi o vazay na do vahay da am jyabo kapakatalamozong na no kyokay a.

⁶ O tomalamozong no kyokay am taosya o kapahanhan so vayo pa omanoyong ji Yeso an. Ta ala mapakarakarang sira so nakenakem akman si Satan a nikaoya na ni Ama ta do to, do kapakakarakarang na so nakenakem.

⁷ O makdeng pa am apzatan na o icicirawat na do tangain da no ji pa nganoyong ji Yeso a tao, ta si marahet o vazay na am matamwad do katalamozong na nya ni Satan.

O somidong so tomalamozong no kyokay a tao

⁸ O somidong rana so tomalamozong no kyokay a tao am akman sang, ta apiya o icicirawat da. So ji da mangononongi so malas a ciriciring. Jyasakisakin. Beken a nizpi o manakem da.

⁹ Ney yapya na am ji meylimoteng o onowned da omanoyong do nanao ni Yeso Kizisto.

¹⁰ Am citahen pa o icicirawat da. No si abo o karatan da am apya rana o kahap da so vazay do kyokay.

¹¹ O katovong da do vahay a mavakes am apiya o icicirawat da. Ji sira manamwadan. Taosya o kapangalalas da no makakaday a vazay.

¹² O somidong so tomalamozong no kyokay a mahakay am asa o katovong da do vahay an. Akman sang o minapodpod jira, ta katenngan da nanawen. So ikapiya no kavavahay da.

¹³ No apya o sidongan da so vazay da no tomalamozong no kyokay am admain da rana sira no icyatatao da a kaji da rana mogawan a mangononong so nanao ni Yeso Kizisto a ipeylimwang do icyatatao da.

O makdeng a anoyngan ta

¹⁴ No kavatvatek ko do teygami ya am to ko naknakma o kakeykai ko a mangay tomita jinyo.

¹⁵ Am no si kahahay ko am cyaha, ta to ko na mancyan jinyo do teygami ko o iwawalam ta. Ta yaten rana amraralay ni Ama ta do to am akma tey asa ka vahay rana, do yana katketken jyaten ni Ama ta do to no ciriciring na no to meyyonong a mavyay a Tao do to.

¹⁶ Yata katenngan an, o makdeng a nanao a nipatwaw ni Ama ta do to a yata anoyngan. Nimatazak a tao si Kizisto. O Seyzi am yongkad na a abo so raraten. Nimacita da no tinsi, a yarana meylimwang do peycyamahamahatawan na, a yada rana anoyngan no aro a tao do karawan. So nikatkatan na sya ni Ama ta do to a yangay do teyngato.