1 Timotay 2 - Seysyo No Tao

Peypeypangayan no meynozi do kyokay

¹ O yamanma pa yako inanao jinyo am ipeynozi nyo o tao do karawan ji Ama ta do to. Ipasyasi nyo ji Ama ta do to a kasidong na sira. So ji ta hamangi no kasaray ta no aryarilaw na jyaten.

² Ipeynozi nyo sira o kabtekan nyo a panirsirngen do teyrahem a kano aro a panipanirsirngen do peycyeylilyan na. Ipeynozi nyo sira a kateneng da tomalamozong no pongso da. Ta ori o ikapiya takamo do keymiminili ta, ji meyrahet so nakenakem.

³ O akman rana sang am tey yapya, ta tey kakza na o akman sang ni Ama ta do to. Iya o mapatazadang jyaten do teyngato.

⁴ Ta na ikakza o na kasidong so tao do karawan, kapakateneng da do manoyong a nanao.

⁵ O manoyong rana a nanao am asa si Ama ta do to. Asa o yamapanop jyaten ji Ama ta do to. Iya rana am si Yeso Kizisto do mina katazak na tao do teyrahem.

⁶ Apyapyahen na pa o kataotao na a mawakwak, a omalit do oyaoyyan na nyaten ni Ama ta do to a meyraraten a tao. O akman rana sang a vazay am nipeyvazay na rana ni Yeso a yongkad na ni Ama ta do to a ji mamyapya no tao do karawan a mangay do kararatan.

⁷ O nipamnekan na jyaken a omlivolivon no ciriciring na do beken a tao do Yotay am nanawen ko sira a kapakateneng da rana jya a meyhanhan no manoyong a nanao. So ko ji mangononongi so malas. Ta yamanoyong o ko ipanci.

⁸ Inaoy no si katenngan da no kamahakayan do peycyakyokyokayan na o kapeyneynozi da a ji rana meylimoteng so onowned a ji oyaoyahen a ji maciskaskadan.

⁹ O mavakes rana am ko kakzeben sira ji mapakazwazway no ayob da. Akman sang o avook da kano taktakzes da. Ney yapya na am ji sira meyyayob so tey masingat a ayob.

¹⁰ Ahapen da o apiya icicirawat, ta ori o manoyong a omraralay ni Ama ta do to a mavakes.

¹¹ O mavakes rana am ji sira meyzezyak, ta kapangamizing da so inanao da sira.

¹² Ko ji mya o mavakes a mangnanao so tao do kyokay a tomalamozong no mahakay. Ta ko kakzeben o kaji da makazyazyakan.

¹³ Ta si Ama ta do to rana am nimanmanma na nyamaog si Adam a kamamaog na rana si Iwa.

¹⁴ O nilittan na ni Satan am beken a si Adam an, ta si Iwa an. Ori nipacisalan na so nakenakem ji Ama ta do to.

¹⁵ Am o mangahanas rana mavakes am apzatan na sira ni Ama ta do to no si jyablis o nakenakem da si Ama ta do to a mangarilaw so tao, ji meylimoteng so onowned, apiya so vazay.