1 Timotay 1 - Seysyo No Tao

¹ Yaken rana am si Pawlo ko a lamlamsoy ni Ama ta do to a manoyong a mapatazadang jyaten do teyngato. Yana nipamnekan yaken ni Yeso Kizisto a omlivolivon no ciriciring na. So ikanoyong na ni Yeso Kizisto a hanhan ta.

² Ko ipeyteygami imo, mo Timotay, akma koy manganak do ta kapeyyangay a omanoyong ji Yeso Kizisto. Inaoy no si itoro na jimo ni Ama ta do to a kani Yeso Kizisto o pangangarilawan na kano pangangasyan na kano ikapiya no onowned mo.

Pazimanen na ni Pawlo o malas so ipangnanao

³ Apyapya kato mo ngyanan do Ivoso akman so mina ciring ko jimo no kapeypangay ko do Maciton a omzazat do yameylimwang no malas a nanao.

⁴ Ta peymakarwan da rana o abo so angangayan a kavavatanen a kano katatapilan no ineynapo da a ononongan da. Ta o akman rana sang am mapeyliliman. So ji na makasidongi so tao a makateneng do vazay na ni Ama ta do to. Ta no anoyngan ta am ori o ipakateneng ta jya.

⁵ O agagazan no akman sang a ciriciring ko am ko kakzeben o kapakateneng da do pangangasyan da so tao apo do ji meylimoteng a onowned da a manoyong a meyhanhan ni Ama ta do to. So ikabo na no vazay da a somala do nakenakem da.

⁶ Ta yamyan so tao a yaji ngonot jya. So da ikanoyong a yanisomala do manoyong a nanao a da kaononong do abo so peypeypangayan a ciriciring da.

⁷ Da naknakmen o kapangnanao da no iwawalam na ni Ama ta do to a nitaid na ji Moyse. Am da jyatenngi o da ipanci a kano imakdeng na ipangnanao.

⁸ Katenngan ta an, ta no apiya o ahapan ta so iwawalam ni Moyse am jyabo kaji na apyan no nang a.

⁹ Am ori o naknakman ta sya an. Ta o iwawalam rana ni Moyse am beken a isidong so apya so nakenakem a tao an. Ta o marahet so nakenakem am ori o cinamaog na a izazat do marahet a vazay da. O ipanci da marahet so nakenakem a tao a kano ji mangozay do iwawalam na ni Moyse am ji ngahap so nanao, ji raralay ni Ama ta do to, meyraraten, komolala so ipeylimwang da ciriciring na ni Ama ta do to, makza no marahet a icicirawat no tao do karawan, manwakwak so inyapwan a kano icyatatao,

¹⁰ mangzakza so icyatatao, mangzakza so kehngehngay na so kolit, manakaw so kanakan, manlita, mangononong so malas, jyanoyong so ipanci do pacicicyan a kano mapasala do manoyong a nanao.

¹¹ O manoyong a pangozayan a ciring am yapo do Mapasaray a Ciriciring na ni Ama ta do to a somidong jyaten. Am ori o azwazwayan ta si Ama ta do to an. So na ikanoyong no nang a yako ipeylimwang a ciriciring.

Isaray ni Pawlo o pangangarilawan na ni Ama ta do to

¹² Ko tey saray ji Yeso Kizisto a Panirsirngen ta. Ta nipanta na yaken so oyowyat ko a meylimwang nya. Ta na ji ngolala yaken. Ori na nipamnekan jyaken a mahap so vazay na.

¹³ Am tana niraherahet ko si Yeso no kakwa pa a kapakakasi ko sira pasnesneken so omanoyong jya am na ikarilaw yaken ni Ama ta do to, ta no kanang am ji ko nganoyngi pa si Yeso. So ji ko makatenngi do vazay ko.

¹⁴ O Panirsirngen ta rana si Yeso Kizisto am yatey rako o pangangarilawan na a na nitoro jyaken a na kapanta pa nyaken so onowned ko a meyhanhan nya kano pangangarilawan ko so icyatatao ko, ta yako macikaop rana jya.

¹⁵ Yamanoyong o ciring eya an. Inaoy no si mamimin o tao a omahap so sya. Nimai si Yeso Kizisto do teyrahem a mahap so meyraraten a tao. Yaken rana am ney rako o raraten ko.

¹⁶ Am kanikasi na nyaken ni Ama ta do to. Ta si Yeso Kizisto am manoyong a nimapapalit do nakenakem ko a meyraraten a tao. Na jyahaywan yaken a tey rako so raraten a tao. So ipakateneng da rana do pangangarilawan na ni Ama ta do to no manownowji amraralay nya tao, kapakahap da rana so to meyyonong a ikavyay no pahad da.

¹⁷ Inaoy no to ta meyyonong a omazwazway si Ama ta do to a Panirsirngen ta. Ta iya rana am jyawakwak a jyacita a meyngongyod a Tao do to. Amin.

¹⁸ Manganako, mo Timotay, ko pakoyokoin pa jimo am ji ka onib so onowned an. Si myan so somengseng do ipeylimwang mo a ciriciring na ni Ama ta do to am naknakmen mo o mina kapamnek da jimo no kararay ta a meyvazay ji Ama ta do to.

¹⁹ So peyhanhanan mo ni Yeso a kahap mo so apiya nakenakem mo. Ta amyan so tao a mapasala so nakenakem da. Am ori o ikatarek na no anoyngan da.

²⁰ O akman rana sang a tao am si Siminay a kani Yadisanta. So ko na nitorwan nira ji Satan a italamozong na, ta ori pa o ipakateneng da do apya, kaji da na rehrehtan si Ama ta do to.