1 Tesalonicya 1 - Seysyo No Tao

¹ Yaken rana am si Pawlo ko. Yamen rana sira Sila kani Timotay am namen ipeyteygami inyo a kyokay do Tesalonicya a omanoyong ji Ama ta do to a kani Yeso Kizisto a Panirsirngen ta. Inaoy si itoro na ni Ama ta do to o pangangarilawan na jinyo a katoro na nya jinyo so ikapiya no onowned nyo.

Isaray na ni Pawlo o iyangay da no manaralay a tao do Tesalonicya

² Namen masangib a somaray ninyo ji Ama ta do to. Namen masangib a yamakalavat jinyo do inozi namen.

³ No namen meynozi am namen isaray ji Ama ta do to o apiya vazay nyo a yongkad no nyo kapeyhanhan ni Yeso Kizisto a Panirsirngen ta, kano nyo kazikna yamangarilaw so tao, do nyo raralayan ni Ama ta do to a yatongbo so alalaw nyo a yaomapanala si Yeso Kizisto a Panirsirngen ta a yameygegcin.

⁴ Inyo rana manga kakteh a na ikarilaw ni Ama ta do to am namen katenngan o mina kapamnek na jinyo a omraralay nya.

⁵ Ta o namen nipeylimwang a Mapasaray a Ciriciring na ni Ama ta do to jinyo am beken a ciriciring namen ori. Ta namen ipeyhanhan o oyowyat no Seyzi a kano yameysominogat a onowned namen so ciriciring na ni Ama ta do to. Ta nyo mamimin a katenngan o onowned namen no kapacikaop namen pa jinyo do dang.

⁶ Tana aro o alalaw nyo am kamo masaray a na sidongen no Seyzi a yamahap so ciriciring na ni Ama ta do to a yaominara si Yeso, akman jyamen a yajyamama no alalaw namen.

⁷ Am ori o da peycitacittan jinyo no yana omraralay ni Yeso Kizisto do Maciton a kado Akayya.

⁸ So yana nikapo jinyo a yameylimwang no nanao na ni Yeso a Panirsirngen ta. O nakenakem nyo si Ama ta do to am beken a do Maciton a kado Akayya o na nispowan, ta yanisompo do peycyeylilyan na. So ji namen mapakaroi so ciring namen an.

⁹ Ta yaro o tao a yamanci nya jyamen so kapiya no nitaotawwan nyo jyamen no kangay namen jinyo do dang a kano yanyo mina kakaro rana do yamalas a niraralay nyo a yarana omanod ji Ama ta do to a yaomraralay nya a yamanoyong a yamavyay a Tao do to.

¹⁰ So yanyo nanalan so Anak na si Yeso Kizisto a meygegcin a apo do teyngato. Si Yeso Kizisto am nivyay na ni Ama ta do to a nimapo do heseb na. Iya o yata pakahatasan so peyoyaoyyan na ni Ama ta do to no makwa.