1 Pite 5 - Seysyo No Tao

Akma ney kagling ni Ama ta do to a tao

¹ Inyo rana yakman jyaken a cyozo do kyokay am ko ipanci jinyo o kanimakacita ko si Yeso Kizisto a nipeyrarahet da kawakwak da sya. Ko ipanci jinyo o azwazway ta no makwa do teyngato.

² Pakapyahen nyo sira nanawen o akma ney kagling ni Ama ta do to a yana nitoro jinyo a yaponged nyo. Am taosya o kasalit nyo so onowned a mapeyveyveken sira. Beken a no panizpin da inyo o ipeyvazay nyo. Ta manoyong o kasaray no onowned nyo a somidong sira.

³ Taosya o kapeymetdeh nyo so nitoro na jinyo ni Ama ta do to a yaponged nyo a akma ney kagling. Ta peycitacittan da o apiya vazay nyo nira.

⁴ Ta no si makaranes rana o araraw ni Yeso Kizisto a yaomaponged ninyo am manoyong o kapakahap nyo rana so yazaw na jinyo a to meyyonong a azwazway nyo do teyngato.

⁵ Inyo rana a malalavayo a tao am onotan nyo o apya ciring da jinyo no rarakeh. So ko to zagomi jinyo a yapancyan no kapaveveh nyo so aktokto nyo a somidong so vazay no kadwan jinyo. Ta maniring do Seysyo am, “Ji na nidonga ni Ama ta do to o mapahama so nakem na tao. Apyapyahen na pa sidongen sira o mapaveveh so nakem da tao.”

⁶ Pavevehen nyo o nakem nyo do tangain ni Ama ta do to. Ta amyan so araraw na no pakatkatan na jinyo ni Ama ta do to.

⁷ To nyo mimina o alalaw nyo a itoro ji Ama ta do to. Ta iya o makasidong jinyo.

⁸ Meypepzat kamo. Taosya o kakma nyoy mitkeh so onowned. Ta si Satan a kavosoyan nyo am yakmey kokoman so tao a yaji yakneng do na yanan a yameykala so tao a na kanen a na pasyain so nakem ji Ama ta do to.

⁹ Pahadpeten nyo o nakem si Ama ta do to. Likodan nyo o vazay ni Satan. Ta nyo katenngan sira o akma nyoy kakteh do cinai a yakman jinyo a yamakasazi so alalaw da a yamraralay ni Ama ta do to.

¹⁰ Si Ama ta do to am yana yapwan no rako a pangangarilawan, do na kapazanod jinyo do azwazway na. Ta inyo rana am kamo rana macikaop ji Kizisto. Am ori an, no si mavitos rana o yaji meyyonownay a alalaw nyo am manoyong kamo na oyatan ni Ama ta do to, kahadpet nyo na so nakem.

¹¹ Inaoy no si mangay o azwazway a kano oyowyat ji Ama ta do to a mangay do kaidan no karawan! Amin.

Ney manowji rana aryarilaw na

¹² O teygami rana ya am si Sila akma tey kakteh do cinai o yanisomidong jyaken a yameyteygami ninyo. Ta ko katenngan o na katey makdeng so nakem ji Yeso Kizisto. Ko paiten inyo. Ko ipanci jinyo o manoyong a pangangasyan ni Ama ta do to. Ji kamo a haha so onowned an.

¹³ Sira rana akma nyoy kakteh do cinai do Papilon a kyokay am yada ipeyminaminasi inyo. Ta kamo meyyangangay a na nipamnekan ni Ama ta do to a omanoyong ji Yeso. Yakman sang si Make a akma koy anak a yameyminaminasi ninyo.

¹⁴ Ipeyminaminasi nyo o kadwan jinyo, do kapasicyakarilaw nyo amraralay ni Ama ta do to. Inaoy no si mamimin kamo a makahap so ikapiya no onowned nyo a meyhanhan ni Kizisto.