1 Pite 4 - Seysyo No Tao

Vayo a onowned

¹ Manoyong o kanimanngannga na ninyo ni Yeso Kizisto. Am ori an, no manngannga kamo do raralayan nyo ni Yeso Kizisto a kato nyo liliwan sya a makanakem si Kizisto a nisomabway no raraten nyo am manoyong kamo na nikomaro do peyraratenan nyo.

² Pamindahen nyo rana sicyaikwaya o kaji nyo rana mangozayan do malas a monganay jinyo a onowned nyo. Ta o apyahen na ni Ama ta do to o ahapen nyo, do ipeyigegen nyo pa do karawan.

³ Teywara o mina raraten nyo no kakwa. Ta meyyangay kamo pa so vazay a kano ji raralay ni Ama ta do to a tao a to meyvozaw a mapasagpyan so aktokto nyo a masakisakin, manaralay so malas a tao do to nyo, pacyangayan no makakaday a raraten nyo.

⁴ So yada na savasavakan ninyo no yaji manaralay a tao, do yanyo na kaji macikaopan jira a somagpyan so vazay. Am ori o da kazyakan ninyo.

⁵ Am cyaha, ta mangay o kasazap da si Ama ta do to a yamapeykapyapinpin so mavyay a kano nimawakwak a tao.

⁶ Ori o yarana nipamizngan no Mapasaray a Ciriciring na ni Ama ta do to so yarana nimawakwak a tao. Ta tana meyyangangay o tao a tana mawakwak a komaro do karawan am o pahad da no nimraralay ni Ama ta do to am macitovong ji Ama ta do to do teyngato.

⁷ Yarana masngen o ikavos no karawan. Makowyowyat kamo pa omzat do onowned no kataotao nyo. Ta ori o ikabo no raraten a makazazat do inozi nyo.

⁸ O ney makdeng na am ikarilaw nyo o kadwan jinyo. Ta o pangarilawan rana am mapeyyopowpas so makakaday a pasicyakaoyyan ta do karawan.

⁹ Masaray kamo a tomaotao so omatao jinyo a tao. Taosya o kaoya nyo so aktokto a amrapong sira.

¹⁰ To ta mangozai o teneteneng a nitoro na jyaten ni Ama ta do to a somidong so tao.

¹¹ O meylimwang no Ciriciring ni Ama ta do to am Ciriciring na ni Ama ta do to o malavat da. No manidong ta so icyatatao ta am ipeyhanhan ta si Ama ta do to a tomoro no oyowyat na jyaten. Ta no si macita da no tao o vazay ta a sidongen ni Yeso Kizisto am azwazwain da si Ama ta do to no aro a tao. Inaoy si mangay ji Ama ta do to o azwazway a kano oyowyat a mangay do kaidan no karawan! Amin.

To nazibo o alalaw a omraralay ni Ama ta do to

¹² Manga keypong, ji nyo ngyakan o keyyan no makdeng a alalaw nyo a ileylamdam na jinyo ni Ama ta do to. Ta kangay na ori no alalaw ta amraralay ni Ama ta do to a tao.

¹³ Kasaray nyo a macizanod so alalaw ji Kizisto. Ta ori o ikasaray nyo no mai rana si Kizisto.

¹⁴ Masaray kamo no amyan so peyleylakan da jinyo a mahap so vazay ni Kizisto. Ta padnadnahen na o nakem nyo no Seyzi na ni Ama ta do to a yamyan jinyo.

¹⁵ Inaoy no si ji monganay do panwakwakan nyo so tao a kano panakawan nyo a kano peyvonagan nyo so tao a kano kazyakan nyo no icyatatao nyo o yapwan no alalaw nyo.

¹⁶ Am no amyan so alalaw nyo do kapanaralay nyo am ji nyo macimasnekan. Isaray nyo ji Ama ta do to o yanyo kapacikazway do ngaran ni Kizisto.

¹⁷ Yarana marateng sicyaikwaya o araraw no yana ipeykapyapinpin so tao ni Ama ta do to. Am papwen na do omanoyong jya tao o pacicin na. No si panmahen na yaten a pacicin ni Ama ta do to am makongo paro sira so wanjin o jya niomanoyong do Mapasaray a Ciriciring na ni Ama ta do to a tao.

¹⁸ Akman so ciring do Seysyo. Maniring am, “Kakwakwan da no apiya so nakenakem a tao a masalit a patazadangen ni Ama ta do to, a ney manngo sira o yatey rako so raraten a tao. Ta jyabo kaji na meydednan jira no pasingsingtan na jira ni Ama ta do to a.”

¹⁹ Am ori an, no si nakem na ni Ama ta do to o kapakasazi da no tao so alalaw am ji da macimazai o kapanidong da so tao. Ta ipeyhanhan da si Ama ta do to a nimangamaog so tao do karawan a makasidong sira.