1 Pite 3 - Seysyo No Tao

Meyyaven do vahay

¹ Inyo rana mavakes am onotan nyo o kahanghangan nyo. Ta no si amyan jira ori so ji nganoyong do Ciriciring na ni Ama ta do to am anoyngan da rana, do pakacittan da so apiya icicirawat nyo. So ikapyapya no apya icicirawat nyo a kano aro a ciring nyo a inanao nyo sira.

² Ta macita da o kapiya no icicirawat nyo a kano kakdekdeng nyo amraralay ni Ama ta do to.

³ Taosya o kapeyhahama nyo no avok nyo a kano ovaovay nyo a kano aywayob nyo.

⁴ Ta ney makdeng o kapiya no onowned nyo. Ta o tey yapya so nakenakem do icyatatao na ji makazyazyak a mangay do ikararakehan na am tey mazway o akman sang do tangain na ni Ama ta do to.

⁵ Ta sira rana meyhanhan ni Ama ta do to a mavakes no kakwa am akman sang o ahahapan da so kataotao da a omonot do kahanghangan da.

⁶ O meyngaran so Salay mavakes am akman so sang a niomonot do kahanghangan na a meyngaran si Apolahan. Abneken na o kahanghangan na meymatmatngeh nya. No si manoyong kamo a apiya so icicirawat a jyanyahey no makakaday a vazay am manoyong kamo a akma ney anak ni Salay.

⁷ Inyo rana mahakay a katovong da am panadnaden nyo sira o katovong nyo do vahay a mavakes, do kaji da macingayan jinyo so kolit. Ori an, kanigan nyo nira. Ta meyyangay kamo a makahap so to meyyonong a ikavyay no pahad nyo. No si mahap nyo o akman sang am abo ji na ngamizing a inozi nyo ni Ama ta do to.

Ney yapiya na vazay nyo

⁸ Ko pakoyokoin jinyo am akma kamoy asa so ahahapan sya masicyakarilaw. Akman so aryarilaw nyo so kakteh nyo o karilawan nyo no akma nyoy kakteh do cinai. Makapiya kamo so nakem do kadwan jinyo. Masicyakanig kamo.

⁹ Ji nyo patonggali o karatan no kadwan jinyo. Ji kamo masyavavay. Ta kaovayovay nyo so kadwan jinyo. Ta no kapanop na jinyo ni Ama ta do to am akman so sang o nakenakem na jinyo.

¹⁰ Akman so ciring do Seysyo. Maniring am, “No kakzeben o kasaray do karawan am taosya o kapatwaw so marahet a ciring. Taosya o kapangalalas.

¹¹ Ney yapya na am peymakarwan na o marahet a vazay na a kasazap na so apiya vazay. To na noiban do karawan o kapiya na so nakem do icyatatao na.

¹² Ta singkadan na ni Ama ta do to o ji meylimoteng so onowned a tao. Amizngen na o inozi da. Ji na nidonga o meyraraten a tao.”

¹³ Sino to makagogad ninyo no si meyngongyod kamo a somazap so apya vazay.

¹⁴ Tana meyrarahet kamo do kanoyngan nyo am somaray kamo. Ji nyo anyaheyan o tatasa ka tao a omalalaw jinyo. Ji kamo a rahet so onowned.

¹⁵ Ji kamo a haha so nakem ji Kizisto. Iraralay nyo a panadnaden o Panirsirngen nyo. Mangday kamo do araraw a omnakenakem so itovis nyo do mapacici jinyo, do raralayan nyo ni Ama ta do to a mapatazadang jinyo do teyngato.

¹⁶ Am panalawbowen nyo o nakem nyo a tomovis do akman sang a tao. Ji kamo meylimoteng so onowned a kanig da no mapanyanig jinyo, do kapiya no icicirawat nyo a omahap so nanao ni Kizisto.

¹⁷ No nakenakem ni Ama ta do to o kapeyrarahet da jinyo do kanoyngan nyo am cyaha. Ta apyapya rana ori a kano peyrarehtan da jinyo do kalasan nyo.

¹⁸ Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

¹⁹ Nioyatan no Seyzi o pahad ni Yeso a mangay a mapamizing so pahad no nimawakwak rana tao.

²⁰ Sira rana am ji da nyanoyngan si Ama ta do to no kapamaring na ni Noya so avang na. Kakwakwan da ji manganoyong am ji na nikahayo sira ni Ama ta do to a nanalahen a mamlis. Tana wawao sira o nisomdep do avang ni Noya am nivyay na sira ni Ama ta do to do rako a henep.

²¹ O henep rana am kehngehngay na no ranom a da itaktak jyaten do kyokay. Am sicyaikwa rana ya am nyo rana ipeyhanhan si Yeso Kizisto a nimirwa a mavyay a mapatazadang jinyo do teyngato. So ji na monganai do kanownaw no kataotao nyo. Ta monganay jyaten a manci nya ji Ama ta do to so kanoyong ta na mahap so vazay na.

²² Yana myan si Yeso Kizisto do teyngato a yamlisna do wanan ni Ama ta do to a yatomalamozong no tinsi. So ji da makapeysopoi do oyowyat ni Kizisto no makakaday do teyngato.