1 Pite 2 - Seysyo No Tao

Si Yeso am akman so lalitan a soil no vahay a tey mehni

¹ Am ori o karwan nyo do makakaday a marahet a vazay. Taosya o kapangononong so malas. Taosya o kapakatanteneteneng nyo. Taosya o kapanginanahet nyo. Taosya o kapanraherahet nyo so tao.

² Akman kamo so nimatazak a kanakan a komakday so meyzoko a akmey kanen no pahad nyo. So yopan nyo so sang a ipeypahagnat nyo a macikaop ji Ama ta do to.

³ Ta nyo nimapeyneynara o na karilawan ninyo ni Ama ta do to.

⁴ Omasngen kamo so nakem ji Yeso Kizisto a Panirsirngen ta. Ta iya rana am yamanta nyaten so to meyyonong a ikavyay no pahad ta. So na icyakmey lalitan a tey mehni. Tana to da nazibwan no tao am jyakman sang si Ama ta do to a to nazibo nya. Ta si Yeso am nitenngan na ni Ama ta do to akmey lalitan a ikehni no onowned ta.

⁵ Inyo rana a tao a na yanan no to meyyonong a ikavyay no pahad nyo am itoro nyo o kataotao nyo ji Ama ta do to. So icyakma nyoy vato a ipatnek na so panaralayan. So nyo icyakmey mapatanatanang so nakem ji Ama ta do to. Am o patanangen nyo am sarasaray nyo. So sarayan na nya jinyo ni Ama ta do to so akman sang a nakem nyo sya, ta kamo na macikaop ji Yeso Kizisto a na rana yanan no Seyzi.

⁶ Ta maniring do Seysyo am, “Ko nimangata so jya toda ka vato a lalitan a soil no vahay do Sian. Sira rana a meyhanhan nya am amyan so nakem na jira ni Ama ta do to.”

⁷ O akmey lalitan rana am tey makdeng jinyo a omraralay ni Ama ta do to. Am o lalitan rana do ji raralay ni Ama ta do to a tao am ji da tenngi o kakdeng na. Akman so ciring do Seysyo. Maniring am, “O Vato a niwalit da no mapatnek so vahay am nimeyvoga a ney makdeng na aslet no ai no vahay.”

⁸ Maniring pa do Seysyo am, “O Vato rana ori am cikadan da no tao a ikalektek da.” O icikad da no tao am ji da nganoyngi o ciriciring na ni Ama ta do to. Ori rana am ahapan na ni Ama ta do to so ji manaralay a tao.

⁹ Am inyo am na nipamnekan inyo a yasa so inawan a mapatanatanang so nakem ji Ama ta do to a Panirsirngen ta. So ikanoyong nyo a abo so karatan a asa ka mahataw a italamozong ni Ama ta do to, a na nipamnekan a meylimwang no yamapeyzokab a vazay na. Ta inyo am na nyagag inyo do kasarisaryan a yameyraratenen. So nyo rana iyan do kazngangan.

¹⁰ No kakwa am beken a italamozong na inyo ni Ama ta do to. Am sicyaikwaya am na rana italamozong inyo. No kakwa am ji nyo a tenngi o pangangasyan ni Ama ta do to. Am sicyaikwaya am nyo na nimahap o pangangasyan na.

To nganod so onowned ji Ama ta do to

¹¹ O ko ipanci pa jinyo manga keypong am tamo akmey miseysan do karawan. Ji nyo to ngonongonongi o nakenakem nyo. Ta o marahet a onowned ta am ipeyparai ta ji Ama ta do to.

¹² Ji nyo nginara o icicirawat da no ji nganoyong ji Ama ta do to a tao, ta arako o kapyapyan no iwawalam nyo a ka nira. Ta no si macita da inyo apiya so icicirawat no yatomamwad jinyo a kano yamazyak ninyo a tao am azwazwain da na si Ama ta do to no mai si Yeso Kizisto.

^13-14 Am ori an, onotan nyo do makayokod ninyo a tao do karawan, do kapanadnad nyo si Ama ta do to. Akman sang sira o nipamnekan no panirsirngen a omzat do apiya so nakenakem a tao a kano oyyan da no marahet so vazay a tao. Ta onotan nyo sira.

¹⁵ Ta o nakenakem na jinyo ni Ama ta do to am zazatan nyo no apiya icicirawat nyo o ji mamayok a ciring da no macioya ji Ama ta do to a tao.

¹⁶ Inyo rana am kamo manoyong a italamozong ni Ama ta do to. Am ori o ji nyo rana pasngesngeni so marahet do onowned nyo. Ta manakem nyo o kakma nyoy lamlamsoy ni Ama ta do to.

¹⁷ Ikanig nyo o kadwan jinyo. Ikarilaw nyo sira o akma nyoy kakteh do cinai. Panadnaden nyo si Ama ta do to. Ikanig nyo sira o makayokod ninyo a tao.

Inarahen si Yeso Kizisto a to nazibo no alalaw na

¹⁸ Inyo rana a lamlamsoy da am onotan nyo sira o mapeylamsoy jinyo a tao ipakateneng da jinyo a manig nira. Am beken a marilaw ninyo o ikanig nyo, ta ikanig nyo sira o ji ngarilaw ninyo a lawpan.

¹⁹ No abo kalasan nyo a to nazibwan no peyrarehtan da jinyo am isaray na o akman sang ni Ama ta do to. Ta onowned nyo am ahapen nyo o vazay na ni Ama ta do to.

²⁰ No si kalasan mo o bakbakan da jimo a kato mo liliwan sya am cyaha, ta kalasan mo o akman sang. Am no abo o kalasan mo a kato da oyyan nimo a kato mo peykabobwan sya am cyaha, ta isaray na o akman sang ni Ama ta do to.

²¹ Ori o peypeypangayan na no na panopan jinyo ni Ama ta do to. Ta akman sang si Yeso Kizisto a nimanngannga ninyo. So inaran nyo sya a to nazibo no alalaw nyo.

²² Abo o raraten na. Abo o malas a ciring na.

²³ No kavay da sya am abo o asa ka ciring na nipasapan na jira. No kapeyyalilima da jya am abo o asa ka ciring na yalalaw na sira. Ta kapasyasi na ji Ama ta do to a yamapeyyangangay so tao.

²⁴ Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

²⁵ Kamo akmey mavozaw a kagling a ji makateneng do rarahan. Am na rana nipaoli inyo. So yanyo ipacilolo rana jya a yana apzatan so pahad.