1 Kedinto 9 - Seysyo No Tao

Ipanci na ni Pawlo o kanoyong na nipamnekan ni Kizisto amlivolivon no ciriciring na

¹ Jyabo kato ko ngonongonongan do vazay ko a, ta na nipamnekan yaken ni Kizisto amlivolivon no ciriciring na. Manngwa, ko jya nimacita si Yeso a Panirsirngen ta? Manngwa, beken a inyo na kakownongan no vazay ko ji Yeso?

² Tana ji da panadnada yaken a nipamnekan ni Kizisto am cyaha, ta nyo panadnaden yaken a nipamnekan ni Kizisto. Ta inyo o yongkad na no kanimamnek na jyaken ni Kizisto a Panirsirngen ta.

³ No tamwaden da yaken a manci no kaji ko meyngongyodan a nipamnekan ni Yeso a omlivolivon no ciriciring na am oya o itovis ko jira.

⁴ Jyabo kanig ko a patodahan da no sinjya so kanen ko do kapeylimwang ko no Mapasaray a Ciriciring na ni Ama ta do to a.

⁵ Jyabo kapacitarek ko do karwan namen a nipamnekan ni Kizisto a. Akman so kakteh ta si Pite a ka nira wari na ni Yeso a mapalololo so kahanghangan da mangilili.

⁶ Manngwa, abo nakenakem nyo jyamen si Parnapo a yamnanao jinyo no ciriciring na ni Ama ta do to a kato namen ngonongonongan do kahakakaw namen a amyaw so velek namen?

⁷ Sino o mangay do itaysang a tao a to ngonongonong do kanen na palolwen. Sino o meymowa so asi no kayo a jyangan so asi na. Sino jinyo o mangonong so kagling a ji meyyakan so kagling.

⁸ Beken a ko to mancyan o akman sang a ciring. Ta yakman sang o ciring do iwawalam na ni Moyse.

⁹ Ta maniring am, “No peyvazain o baka am ji bengbenga o ngongoy da.” Manngwa, makdekdeng pa o baka a na ikarilaw ni Ama ta do to?

¹⁰ Jyabo na kaji ngagazan jyamen no ciring eya. Tana mangay meymowa kano manlangi so mojis am abo ji ngakzeb so kapavonong da sira do nilangi da a mojis.

¹¹ Yamen rana am namen nipanokos jinyo o manoyong a nanao na ni Ama ta do to. No nipanta nyo yamen am jyabo kalas namen a omahap so itoro nyo jyamen a.

¹² No akman sang o karwan no tao a mangakday jinyo am ikongo ikarahet namen akman sang so nakenakem jinyo. Am namen kajyakmanan so sang. Ta namen to liliwa o namen kakcin a kano namen kahen. Ta ikasengseng na meylimwang no Mapasaray a Ciriciring na ni Kizisto no si myan so tao a manci nyamen a magom so itoro nyo.

¹³ Manngwa, nyo jyatenngi o kapanta no meyvazay do rako a panaralayan a tao so kanen da? Akman sang o mapatanang so baka do rako a panaralayan, ta ipanta sira so vonong da do nipatanang ji Ama ta do to.

¹⁴ Akman sang o meylimwang no Mapasaray a Ciriciring na ni Yeso, ta pakanen sira.

¹⁵ Am kaji ko nimangapan so kakzeben ko jinyo. O ko vatvatkan do akman sang a ciring am beken a ko yagom o kataotao ko an. Tana mawakwak ko no kakcin ko am apyahen ko o kabo no ngina na no inanao ko jinyo.

¹⁶ Am ikongo o pazwayan ko so kapeylimwang ko no Mapasaray a Ciriciring na ni Ama ta do to, do nitoro na jyaken a vazay ko ni Ama ta do to. No si ji ko meylimwangan no ciriciring na am jyabo kapya ko a.

¹⁷ No si to ko minaknakman o kapeylimwang ko no ciriciring na ni Ama ta do to am manoyong o kapangakday ko jinyo. Am na kanitomoro nya jyaken so akman sya vazay ko. So ko anoyngan jya ney makdeng na vazay ko.

¹⁸ Am ikongo o azaw ko ang. O mahap ko am kasaray ko a meylimwang no Mapasaray a Ciriciring na ni Ama ta do to a ji ngahap so itoro da jyaken a kahanhanan na ni Ama ta do to.

¹⁹ Yaken rana am yabo mapeylamlamsoy jyaken a tao. Am nakenakem ko o kakma koy lamlamsoy da no aro a tao, do ko kapanop sira.

²⁰ No macivazay ko do tao do Yotay am inarahen ko sira o tao do Yotay, do kakza ko no kapanop ko so aro a tao do Yotay. Tana ko na ji mangozai o iwawalam na ni Moyse am ko ahapen o iwawalam da, do ko kapanadnad sira a yapanopen.

²¹ Akman sang no kapacikaop ko do beken a tao do Yotay. Ta ko inarahen sira a ji ngahap so iwawalam na ni Moyse, do ko kahap sira yapanopen. Am beken a kaji ko ngonotan do iwawalam na ni Ama ta do to. Ta yako pangozayan o iwawalam na ni Kizisto.

²² No macikaop ko do malelma so nakenakem a tao am panadnaden ko sira do kahap ko sira panopen. Am ori o panadnadan ko so iwawalam da no pacikaopan ko a tao, ta ori o ipanop ko sira a omanoyong ji Yeso.

²³ Ko akmanan sang so vazay ko am ko ipatak o Mapasaray a Ciriciring na ni Ama ta do to. Ta ori o ipakarara ko so karwan no tao a macizanod a somaray no ciriciring na ni Ama ta do to.

²⁴ Katenngan nyo an. Tana aro o macipalalayo a tao am asa saon o azawen da am. Akman kamo so sang an, a makdeng a malalayo a kapakahap nyo so yazaw na jinyo ni Ama ta do to.

²⁵ O abwangen da macipalalayo a tao am tey mazikna sira ori. Ta ori o ipakahap da so azaw da. Am o yata kakzeben am jyararalaw a azaw ta ji Ama ta do to.

²⁶ Am ori o ko to mangononongi do ko kapalalayo, akman so maciopaopag do icyatatao, ta ji na to pazazaba o opaopagan na sya.

²⁷ So ko apzatan do onowned ko. So ji ko to mangozai do apyahen ko. Ta ori o ji na wakwaki no azaw ko ji Ama ta do to. Ta maraherahet o kavozcin jyaken a kapakahap da sya no pamizngen ko a tao.