1 Kedinto 8 - Seysyo No Tao

Malavat na ni Pawlo o kanen do pazos

¹ O nipazos da kanen am tamo mamimin a makateneng do akman sang. O teneteneng rana ya am yapwan no kapazway no tao. Am o pangarilawan am ipeypapya so tao.

² O mapakateneteneng a tao am jyanoyong o katenngan na.

³ Am o amraralay ni Ama ta do to a tao am ori o ipanci na ni Ama ta do to a anak na.

⁴ Oya rana o ipanci ko jinyo a omagaz do nipazos da kanen. Tanyo katenngan o kaji da anoyngan no malas a iraralay da. So tanyo ipakateneng do na kasa ni Ama ta do to a ta iraralay.

⁵ Tana aro o malas a iraralay da kano ipanci da tomalamozong no hanit a kano teyrahem a iraralay da am,

⁶ yaten rana a yamraralay ni Ama ta do to am yasa si Ama ta do to a na yapwan no meycyamadadayan. So yana ikanoyong a tomalamozong nyaten. Akman sang, ta abo ikararwa na ni Yeso Kizisto a Panirsirngen ta a nimangamamaog so meycyamadadayan a yana yapwan no ikavyay no pahad ta.

⁷ Am yamyan pa so akma tey kakteh do cinai a yaji makateneng pa do kabo na no oyowyat no malas a iraralay da no karwan no tao. Ta yamangday da kakan so nipazos o da kapanci no da kapacizanod jira do amraralay no malas a iraralay da. Am ori o da karehtan nya so onowned no yakoman sira so yada nipazos.

⁸ O kanen rana ya am ji na novili ni Ama ta do to. Tana koman ta do nipazos da am tana ji ta ngan am jyablis o nakenakem na jyaten ni Ama ta do to.

⁹ Am azimanen nyo. Ta ji nyo akwan kapya na jinyo o kato nyo mangozayan do kataotao nyo. Ta panadnaden nyo sira o malma pa so onowned a amrahet pa sya.

¹⁰ No myan pa so tao a marahet pa nya kapakacita na jinyo a makateneng jya tao a makapya koman so nipazos do panaralayan so malas a iraralay da am jyabo kaji nyo akmey to ngingitan sira koman so nipazos a.

¹¹ O malma pa so onowned a akma tey kakteh do cinai a nikawakwak ni Kizisto am jyabo kaji na ratan so kangangay a makacita jinyo a.

¹² O akman rana sang a vazay nyo am manoyong kanimeyraraten nyo do akma nyoy kakteh do cinai. So yanyo icyakmey amhaha so nakenakem da no yamalma pa so onowned a tao. So nyo ikanoyong a yameyraraten do tangain na ni Kizisto.

¹³ Am ori o no si ikarahet da o kanen ko no akma koy kakteh do cinai am ji ko na nganna o akman sang a kanen mangay no makwa. Ta maraherahet o kapacinara da jyaken no akma koy kakteh do cinai a marahet nya so onowned.