1 Kedinto 7 - Seysyo No Tao

Vazay no meysinmo a tao

¹ O ciring nyo do teygami nyo am ko naknakmen o kapyapya pa no kaji mapazagpitan no mahakay.

² Am yana katey yaro no vazay da yamapasagpyan so kataotao da. Am ori o ikapyapya na rana no kapazagpit da no mahakay. Akman sira so sang o mavakes a macivahavahay.

³ O mahakay am panadnaden na o kahanghangan na. Akman sang o mavakes na.

⁴ Ta o kataotao no mavakes am italamozong no mahakay na. Akman sang o kataotao na no mahakay na, ta italamozong na no mavakes na.

⁵ Am ori o ji nyo mapasalai do kadwan jinyo an. No nakem no asa jinyo so kapeynozi na am manoyong o kapeytarek nyo so alikey. Am no komavos rana a meynozi am meytovong kamo na meyyaven do vahay. Ta littan na inyo ni Satan do kaji nyo makaparingan so nakem nyo.

⁶ O ciring rana ya am beken a ko ipasonson jinyo. Ta ko ikarilaw inyo.

⁷ Ko ikakza o kakman nyo jyaken a ji nimapazagpit. Am kaji na meyyangangayan no nakenakem do kataotao a nitoro na ni Ama ta do to. Ta myan so tao a akman sang. Amyan so tao a jyakman sang.

⁸ Sicyaikwa rana ya am ko pamizngen sira o ji pa nimeysinmo a tao a kano vao a mavakes a ominara jyaken. Ta apyapya pa o kaveyvow do vahay.

⁹ Am no si ji nyo apzaci o onowned nyo am apyapya o kapazagzagpit nyo. Ta maraherahet o kato na ngyanan do onowned nyo no kakey nyo a macivahavahay.

¹⁰ So iyan no ciring ko do nimeysinmo rana tao. Ta beken a nakenakem ko ya, ta nakenakem na ni Yeso. O mavakes rana am ji na ngaroi o kahanghangan na mahakay.

¹¹ No manoyong kanikomaro na rana am ji rana macivahavahay no ji rana meyoli do kahanghangan na. So icyakman na sang no mahakay, ta ji na to pakarwa o kahanghangan na mavakes.

¹² Akman sang, ta yamyan so ciring ko do karwan no tao. Am beken a nakenakem na ni Yeso. No myan so manaralay a nimapazagpit rana so ji manaralay a mavakes a kasaray na macitovong jya am apya o akman sang an. So ji na to pakarwi so kahanghangan na mavakes.

¹³ No myan so manaralay a mavakes a nisomeksek rana do ji manaralay a mahakay a kasaray na no mahakay a macitovong jya am ji na to ngaroi o mahakay na.

¹⁴ Ta o ji manaralay a mahakay a nimapazagpit rana so manaralay a mavakes am masidong na no mavakes na. So ipacyangay na do mavakes na masidong na ni Ama ta do to. So icyakman na sang no nimacivahavahay rana a ji manaralay a mavakes. Ta masidong na no mahakay na. Ta si ji sira akman sang am ji na nidonga ni Ama ta do to o ananak da. So ikanoyong da peypapyahen na ni Ama ta do to.

¹⁵ Am no karwan da sira o manaralay a kadwan da do vahay am to nyo na macyozai o akman sang. Tana mahakay a tana mavakes am ji nyo na ratan, ta o nipamnekan na jyaten ni Ama ta do to am kakzeben na yaten apiya so nakenakem do kavavahay ta.

¹⁶ Ta imo rana a yamanaralay a mavakes am ikongo mo ipakateneng do kapakasidong mo so kahanghangan mo a omanoyong ji Yeso. Inyo rana kamahakayan a yamanaralay am ikongo nyo ipakateneng do kapakasidong nyo so kamavakesan nyo a omanoyong ji Yeso.

¹⁷ Mamimin ta mangozay do nitoro na ni Ama ta do to a ahapan so kataotao ta an. So ji ta mapasalai jya. Ta ori o yako ipangnanao do peycyakyokyokayan na.

¹⁸ Inyo rana tao do Yotay a niyongkadan rana do kataotao a manoyong a Isedi a tao a yamraralay rana ni Yeso am cyaha, ji nyo naywa o yongkad nyo. Am inyo rana beken a tao do Yotay a omanoyong rana ji Yeso am tana abo yongkad do kataotao nyo am abneken na inyo a anak na ni Ama ta do to.

¹⁹ Tana niyongkadan a tana jya niyongkadan am meyyangay. O ney makdeng na am kownot ta ji Ama ta do to.

²⁰ So ji ta ngezsangi no kasasaodan ta tao.

²¹ Tana nimeycicinda ka kalamsoyan da no tao no kapanaralay mo am ji mo a ratan. Akman ka sang so nakem no si ji da rana peylamlamsoya imo.

²² Ta o lamlamsoy da tao a omanoyong ji Yeso am to naliway rana sira do tangain na ni Ama ta do to. Akman so sang sira o to naliway a tao a omanoyong ji Yeso, ta lamlamsoy na sira ni Yeso Kizisto.

²³ Inyo rana am yatey rako na nipalitan jinyo ni Ama ta do to. Am ori o ji nyo mamyapyai no tao a tomalamozong ninyo. Ta italamozong na rana inyo ni Ama ta do to.

²⁴ Manga kakteh, ji nyo ngezsangan o kasasaodan nyo do tangain na ni Ama ta do to.

Inanao na ni Pawlo so jya nimacivahavahay pa kano vao a mavakes

²⁵ Omagaz rana do ji pa nimacivahavahay a tao am abo nimahap ko a nakenakem na ni Yeso Kizisto. Am kanimarilaw na nyaken ni Ama ta do to a meyhanhan nya. So ko pangozayan do kataotao ko a yamapatwaw so ciring ko.

²⁶ No ko citahen o alalaw do teyrahem am ko apyapyahen pa kakman ta sya tao a ji macivahavahay.

²⁷ No yarana myan jinyo so tao am ji nyo naknakma o kapakaro nyo sya. Am no si abo pa jimo tao am ji mo naknakma keyyan na jimo no tao.

²⁸ Am no si ikakza mo o kapazagpit mo am cyaha, ta beken a raraten ori. Am ko apyapyahen pa kaji nyo nginaran sira masanga no meykamadadayan a vazay da do kavavahay da.

²⁹ O ko ipanci pa jinyo, manga kakteh am yalikey rana ta yahap so vazay na ni Ama ta do to. Am ori an, inyo rana yamyan so kahanghangan a mavakes am akman kamo rana so kabwan no tao a abo rana so ikasanga a mahap so vazay na ni Ama ta do to.

³⁰ Tana meyngen o onowned a tana masaray, tana aro so apzapzatan a tana abo am taosya o kasanga na jinyo no makakaday a vazay a omraralay ni Ama ta do to.

³¹ O nimakataptap rana so kanekanen do karawan am akman sira so ji nitomaham do kanekanen. Ta o karawan eya am makeykai a komavos.

³² Ji kamo a rahet so onowned. Ta o mahakay a kabwan no tao am to nangdengi o kanakenakem na so vazay na ni Ama ta do to a ipasaray na sya.

³³ O manakem da no mahakay a yanan rana no tao am naknakmen da o kapasaray da so mavakes da.

³⁴ So ikanoyong da meykarwa rana so nakenakem ji Ama ta do to. O ji nimacivahavahay pa a mavakes am vazay na ni Ama ta do to o manakem da. Ta isaray da kapeykingking da no oyowyat da kano onowned da. O manakem da no nimacivahavahay rana a mavakes am vazay do kavavahay da. Ta naknakmen da o kapasaray da so mahakay da.

³⁵ O ko peycirngan sang am ko sidongen inyo. So ko ji mapasonsoni jinyo. Ta ori o ikakdekdeng nyo pa mahap so vazay na ni Ama ta do to a ji mangbeywan jya.

³⁶ O nitamtamkan da rana tao a kaji da na ngapan sira am no ji na apzaci no mahakay o onowned na makza no kapapapen na pa am apyapya rana kato na rana mapapenan so yanan na so nakem a mavakes. Ta o akman rana sang am beken a raraten o akman sang.

³⁷ Am no myan so tao a jyakza no kapapapen na am to na rana mamneki do onowned na o kapzat na do onowned na. So ikapyapya na rana no kaji na mapapenan.

³⁸ Tana ipanci da o kapya no mapapapen am arakorako pa o kapyapya na no kaji mapapenan.

³⁹ O nimacivahavahay rana mavakes am ji neksek do tao do iyan na pa no kahanghangan na do karawan. Am no mawakwak rana o mahakay na am apya o kapirwa na pa so kapacivahavahay na. Am ney yapiya na kangay na someksek do manaralay a tao.

⁴⁰ Am no ji na ranakzan o kapacivahavahay na am apyapya rana o akman sang. Ori rana am nakenakem ko ori do kataotao ko. Am ko naknakmen o katalamozong na nyaken no Seyzi na ni Ama ta do to.