1 Kedinto 6 - Seysyo No Tao

No meygalagal sira o sinjya

¹ No amyan so ikazyak nyo a vazay no akma nyoy kakteh do cinai am ji nyo mancyan do ji manaralay a mapacicici a tao. Ta to nyo na zavata do akma nyoy kakteh do cinai.

² Manngwa, nyo jyatenngi yaten a italamozong na ni Ama ta do to o mapacici so tao do karawan no makwa? No si inyo eya mapacici so tao eya am manngwa, ji nyo rana zavat o likta a vazay?

³ Manngwa, nyo jyatenngi tamo kapacici so tinsi no makwa? Kakwakwan no nang a ney manngo rana o vazay do karawan.

⁴ No akman sang a keyyan no ikazyak nyo am manngwa, ipanci nyo sira o ji manaralay a tao a mangay omzavat sya?

⁵ Tey macimasnek o akman sang. Manngwa, yabwata rana jinyo o yasa ka mapatak a tao a mangay omzavat so ikazyak da no akma tey kakteh do cinai?

⁶ Ikeykongo kamo a yamakalavat so da karatan no kakteh nyo do tangain no ji nganoyong ji Yeso a tao.

⁷ O yongkad no nyo karatan am nyo kapaciraherahet. Ikeykong kamo a yajya todalpid so nakenakem.

⁸ Nyo apyapyahen pa o kalpid nyo sira. So nyo ikakman sang so nakenakem do akma nyoy kakteh do cinai.

⁹ Manngwa, nyo jyatenngi o kaji da macikaopan no makwa do italamozong na ni Ama ta do to no meyraraten a tao an? Ji nyo ngalalasi o kataotao nyo an. Ta o mapeyzavozavoz so tao na, manaralay so malas a iraralay, mangzakza so icyatatao, mangzakza so kehngehngay no kolit,

¹⁰ manakaw, mangamkam, masakisakin a kano manraherahet so icyatatao a kano amgacigat do tao a tomoro am o akman rana sang a tao am ji sira macikaop do italamozong na ni Ama ta do to no makwa.

¹¹ Yamyan jinyo so nimakman so sang no kakwa. Am kanivonas na rana so raraten nyo ni Ama ta do to. So nyo rana ipacikownongan ji Ama ta do to a kabnek na rana ninyo a abo so raraten do tangain na, do kapeyhanhan nyo ni Yeso Kizisto a Panirsirngen ta kano katalamozong na jinyo no Seyzi na ni Ama ta do to.

Azwazwain nyo si Ama ta do to no kataotao nyo

¹² Ala myan so tao a manci no, “Yabo ko jyapeyvazay a vazay.” Jyalas ori an. Am beken a todamimin o vazay a makarapa do onowned. So ko pancyan no yabo jyapeyvazay a vazay. Am ji ko mamyapyan o asa ka vazay a to mapeylamlamsoy jyaken.

¹³ Amyan so tao a manci no, “O kanen rana am ioran do velek. O cinamaog no velek am kanen.” So ji na alasi nang. Am beken a to meyyonong o yameykadwa ya. O cinamaog ta am beken a pasagpyanen ta o kataotao ta, ta o kararalay ta ni Ama ta do to. So ikanoyong na ni Ama ta do to a mapeyveyveken jyaten.

¹⁴ Si Ama ta do to o nimapeyvangon si Yeso do heseb na. So icyakman na sang ni Ama ta do to a mangozay do oyowyat na a mapeyvangon jyaten no makwa.

¹⁵ Nyo jyatenngi o na kaponged no kataotao nyo ni Kizisto? Manngwa, apya kapasagpyan ko so akma ney kataotao ni Kizisto? Tey marahet o akman sang!

¹⁶ Nyo jyatenngi o karahet no mahakay a mapasagpyan so kataotao na do somagpyan a mavakes? O akman sang a tao am akmey meytovong sira do vahay. Ta maniring do Seysyo am, “Akmey asa rana sira so kataotao o rarwa meytovong do vahay.”

¹⁷ Am o macikaop ji Yeso am macilovot o nakenakem na ji Yeso an.

¹⁸ Am ori o ji nyo pasagpyani so kataotao nyo an. O makakaday a raraten am ji mapeykaraherahet so kataotao. Am o mapasagpyan so kataotao da am peykarehrehten da o kataotao da.

¹⁹ Nyo jyatenngi o na keyyan jinyo no Seyzi na ni Ama ta do to a nitoro na jinyo? So ikabeken a inyo no kataotao nyo.

²⁰ Ta inyo rana am na nipalit inyo no rala na ni Yeso. Am ori o azwazwain nyo si Ama ta do to no kataotao nyo an.