1 Kedinto 5 - Seysyo No Tao

Oyaoya na ni Pawlo so somagpyan a tao do Kedinto

¹ Yamanoyong o kanimakamizing ko so keyyan na jinyo no mapasagpyan so kataotao na. O akman rana sang a vazay am ji da mya no ji manaralay a tao. O nimamizing ko am amyan so tao a mapasagpyan so nakenakem na do kaminan na.

² Ikongo dang o pazwain nyo. Manngwa, ji nyo a ratan so onowned o akman so sang so vazay a tao? Am ori o to nyo na pasyai so akman sang a tao.

^3-4 Yaken rana am tana yamarai o kataotao ko jinyo am onowned ko am yakmey to ngyan jinyo. So yako pangozayan do ngaran na ni Yeso a yamwoya no yakman sang so vazay a tao. So yako icyakmey yamyan jinyo do dang. No malwalovot kamo am akma koy to macilovot jinyo so onowned, do ko kapangozay do oyowyat na ni Yeso a Panirsirngen ta.

⁵ O akman rana sang a tao am to nyo macyozai a kapeyingnen na so kataotao na ni Satan. Si maliliw na o kataotao na meyngen am ori o ipamlis na rana a kavyay no pahad na no si pirwa mai si Yeso a Panirsirngen ta.

⁶ Taosya o kapakazwazway nyo. Nyo jyatenngi o ciring a manci no, “O likta kosozi no odong am mapeymway na o rako a odong.”

⁷ So pakarwan nyo so kosozi no odong a mapeyraraten jinyo, ta ori o ikanownaw no onowned nyo a nimavonas rana so raraten. Ta nimawakwak si Yeso Kizisto a yanimalit so raraten ta, akmey kagling a wakwaken da no tao do Yotay. So nipatastasan na sira no tinsi a jya nimwakwak so kabnekan da no yanan no rala no kagling a vahay.

⁸ Ori an, sarayan ta ni Yeso a nimawakwak no raraten ta. So ikanoyong ta rana komaro do peyraratenan ta. Taosya rana mangalalas a kano meyraraten a icicirawat an. Ta o manownaw a onowned a kano manoyong a nanao o ahapen ta, akman so kabwan no kosozi a odong.

⁹ O mina teygami ko jinyo no kakwa am nipaziman ko na jinyo o kaji nyo macihzan do mapasagpyan so nakenakem a tao.

¹⁰ O ko ipanci am beken a ji manaralay a tao a somagpyan, mangamkam, manakaw a kano manaralay so malas a iraralay. Ta no si karwan ta na o karawan saon o ji ta macikaopi jira.

¹¹ O peypeypangayan no ciring ko am ji macihza do mapasagpyan so nakenakem na, mangamkam, manaralay so malas a iraralay, mangangavain, masakisakin a kano manakaw a ji mamlis so nakenakem a sinjya. So ikanoyong no kaji nyo macihzan jira a ji macihanghang jira.

^12-13 Ji ta zyakan sira o ji manaralay a tao, ta si Ama ta do to o mapacici sira. Am o manaralay a tao am jyabo kaji ta mapatwawan so raraten da. Ta maniring do Seysyo am, “Pasyain nyo jinyo o meyraraten a tao.”