1 Kedinto 3 - Seysyo No Tao

Lamlamsoy na ni Ama ta do to

¹ Manga kakteh, ji ko na naywa jinyo o ciring ko. No kananao ko pa jinyo no kakwa am ji ko meyhanhanan inyo a ipeypalanginan na no Seyzi. Ta monganay kamo pa do karawan. So nyo icyakmey kanakan pa so nakenakem a yaji meypahagnat a yamraralay ni Kizisto.

² Ori o ko peyyopan pa jinyo no meyzoko, ta marahet pa o kapakan ko jinyo no cinvevekeh. Ta ji nyo anget. So nyo ikakman sang sicyaikwaya a yaji ngahap so yamakdeng a yako inanao jinyo.

³ Ta inyo rana am nyo pa pangozayan o icicirawat no tao. Ta amyan pa jinyo so yamanginanahet a kano yamgalagal a tao. O na ikakman sang am kakownongan na no nyo kapacikaop pa do karawan.

⁴ Yamyan so yatatasa jinyo a yamanci no, “Yaken am yako macyanod ji Pawlo.” Yamyan so tao a yamanci no, “Yaken am ko macyanod ji Apolo.” So nyo ipeyyangay pa kano yaji nganoyong ji Yeso a tao.

⁵ Ikongo angangayan ni Apolo a ka nyaken. Yamen rana am na kapeylamlamsoy jyamen ni Ama ta do to a yamapalolo jinyo a yaomanoyong ji Yeso Kizisto. Ta namen to mangozai o nitoro na ni Ama ta do to a vazay.

⁶ Ko nimowa a na kataktak jya ni Apolo. O amzowazovo sya am si Ama ta do to.

⁷ O mapamowa sya kano tomaktak jya am todalapit pa ori a vazay. Am o amzowazovo sya am si Ama ta do to.

⁸ O mapamowa sya kano tomaktak jya am meyyangay a lamlamsoy na ni Ama ta do to. So to na palololoi sya ni Ama ta do to do lamlamsoy na so itoro na jira.

⁹ Yamen rana am namen macipeyvazay ji Ama ta do to. Inyo rana am kanyo akmey nihakawan na ni Ama ta do to a namen pirwahen pa. So nyo icyakmey vahay a na patneken ni Ama ta do to.

¹⁰ No ko pangozayan o nitoro na jyaken ni Ama ta do to a teneteneng am ko akmey mateneng a mangamaog so vahay a tao, do kanimapangay ko so soil na a katonton da jya pakapyahen do teyngato no karwan no tao. So pakapyan da so paringen da vahay.

¹¹ Ta abo ikararwa na ni Yeso Kizisto a nipamnekan na ni Ama ta do to a akma ney soil.

¹² O mangamaog so vahay a tao am amyan so mangamaog no vowawan. Amyan so mangamaog no lalitan. So iyan no tao a mamaring no kayo a kano vocid.

¹³ Am o mina vazay ta am macita ta rana no makwa o kehni na a kaji nehniyan. Ta no marateng rana o araraw na no yai ni Yeso am patwawen na rana. Ori o ipakateneng rana jya. Ta no makwa am askadan na rana ni Yeso o mina vazay ta.

¹⁴ O mehni so niparing a tao am ori o mavezed. O akman rana sang a tao am ori azawen na.

¹⁵ Am o jyehni so niparing am abo azaw na. Am ahapen na ni Ama ta do to do teyngato, do kakma ney nimakagag so kataotao na do apoy.

¹⁶ Manngwa, nyo jyatenngi o na kapacilovot jinyo ni Ama ta do to? Manngwa, nyo jyatenngi na keyyan jinyo no Seyzi?

¹⁷ Am ori an, no si amyan so tao a mapeykaraherahet so kataotao na a na pacikaopan ni Ama ta do to am jyabo kaji na patovilan jya. Ta o pacikaopan ni Ama ta do to a tao am abo karatan na. Inyo rana am yamyan jinyo si Ama ta do to.

¹⁸ Ji nyo ngalalasa o aktokto no kataotao nyo an. No amyan jinyo so ominara so icicirawat no tao do karawan a mapazway so teneng na am iptad na rana o kapakateneteneng na. Ta ori o ikanoyong na mateneng a tao.

¹⁹ Ta o ipanci no tao do karawan a mateneng am ipanci na ni Ama ta do to a jyateneng a tao. Akman so ciring do Seysyo. Maniring am, “O mateneng a tao am kalittan sira no teneng da kaji na mangononongan no vazay da.”

²⁰ O ciring pa do Seysyo am, “Katenngan na ni Ama ta do to o kabo no peypeypangayan na no naknakmen da no mapakateneteneng a tao.”

²¹ Am ori o ikabo no tao a mapazway a manci no kownot na do kadwan jyamen. Ta yamen rana a yamangnanao am nitovoy na yamen jinyo ni Ama ta do to a amnanao jinyo.

²² Yamen rana si Apolo a kani Pite am namen meyyangangay a nitovoy na ni Ama ta do to a somidong jinyo. Tana karawan a tana mavyay kano mawakwak a tana sicyaikwaya kano makwa am o yamakakaday rana ya am nitoro na ni Ama ta do to a ipeypapya nyo.

²³ Am naknakmen nyo an, ta inyo am na italamozong ni Kizisto an. Si Kizisto am amizngen na si Ama ta do to.