1 Kedinto 2 - Seysyo No Tao

Nanao do jyojika ni Kizisto

¹ No kangay ko pa jinyo no kakwa pa am ji ko nipatwaw o makdeng a ciriciring ko jinyo a kano teneteneng ko a inanao ko jinyo no kapeylimwang ko no ciriciring na ni Ama ta do to jinyo.

² Ta mina to ko na mamneki do kabo no yamatarek a yako inanao jinyo. Ta si Yeso Kizisto a nipadket da do jyojika o yako inanao jinyo.

³ Am ori an, makaranes ko jinyo do dang am malma ko so kataotao amzikzik do kanyahey ko. Ta ihawa ko kaji ko makatenngan do vazay na ni Ama ta do to.

⁴ O nipeylimwang ko a ciriciring am beken a masalit a amizngen. So ko ji meyhanhani no ciring ko. Ta yako ipeyhanhan o Seyzi a omoyat jyaken a mapatwaw sya.

⁵ So ikanoyong no nakenakem nyo ji Ama ta do to. Beken a monganay do teneteneng no tao. Ta monganay do oyowyat na ni Ama ta do to.

Mapeyzokab a teneteneng na ni Ama ta do to

⁶ Am o yamakekdeng so nakem ji Ama ta do to am yako peylimwangan no yamakdeng a nanao. Am beken a monganay do tao do karawan o teneteneng. So ji ko makalavaci so teneteneng no panirsirngen do karawan. Ta amyan so kasaraw a kabo na no teneteneng da.

⁷ O yako ipeylimwang eya am ji da pa nipatwaw no tao no kakwa a teneteneng na ni Ama ta do to. Ta no kaji na pa mamaogan no karawan am amyan rana ori a nakenakem na ni Ama ta do to do kapacikaop ta jya no makwa.

⁸ O panipanirsirngen do karawan am abo jira o manoyong a makateneng do pamnemnekan na ni Ama ta do to. No nikatenngan da am jyabo kato da padketan so mazway a Panirsirngen ta do jyojika.

⁹ Akman so ciring do Seysyo. Ta maniring am, “O nakem na ni Ama ta do to a itoro na do amraralay nya tao am ji da pa nimacita no mata da. Ji da pa nimamizing no cicilwan da. Ji da pa nimanakem no tao.”

¹⁰ Am na kasidong jyaten no Seyzi na ni Ama ta do to a ta ipakateneng jya. Ta katenngan no Seyzi o makakaday a vazay. Katenngan na o jyatenngi a vazay na ni Ama ta do to.

¹¹ Ji ta tenngi o nakenakem da no tao, ta o kataotao da o makateneng jya. Akman sang an, ta o Seyzi na ni Ama ta do to o makateneng do makakaday a vazay na ni Ama ta do to.

¹² Tanyo jya nyahap o teneteneng da no tao do karawan. Ta o nitovoy na ni Ama ta do to a Seyzi am ori o ta nyahap. Ori o ta ipakateneng do makakaday a aryarilaw na jyaten ni Ama ta do to.

¹³ Ori an, ikabeken a teneteneng no tao o namen inanao jinyo a ciriciring. Ta ciriciring no Seyzi o namen ninanao jinyo a na yanan rana no Seyzi na ni Ama ta do to.

¹⁴ O kabwan no Seyzi na ni Ama ta do to am ji na hap o itoro no Seyzi na ni Ama ta do to. Ta o akman rana sang a tao am ji da tenngi o akman sang a vazay. Ta ipanci da abo so angangayan. Ta o yanan no Seyzi na ni Ama ta do to o makateneng jya.

¹⁵ O yanan no Seyzi na ni Ama ta do to a tao am ori o makateneng do monganay ji Ama ta do to a vazay. Am o kabwan no Seyzi a tao am ji da tenngi o monganay ji Ama ta do to a vazay. Am ori o ji da zyaki no akman sang a tao.

¹⁶ Akman so ciring do Seysyo. Maniring am, “Sino makateneng do onowned na ni Ama ta do to. Sino makayokod nya.” Am yaten takamo a yana yanan no Seyzi na ni Ama ta do to am katenngan ta o onowned na ni Kizisto.