1 Kedinto 16 - Seysyo No Tao

Kingking a isidong so kakteh do cinai

¹ O peysinsinmowen rana isidong so sinjya do Yelosaleng am to nyo manginarai o mina ciring ko so peycyakyokyokayan na do Cyalatay.

² Mangday ka niciyo na o kamimin nyo a mapasina do nizpi nyo a nimahap nyo a kakpeh nyo sya. Am to nyo palolwa do karwaro no nimahap nyo a nizpi o pasinahen nyo. Ji nyo nanala yaken, ta to nyo ngonongonongi o kapeysinsinmo nyo sya.

³ No si makaranes ko na am manovoy ko so ipeyhanhan nyo a tao a maciralay do teygami a kano nipeysinsinmo nyo a nizpi a yangay da do Yelosaleng.

⁴ Am no si paciralayan ko nizpi am to sira na macihza jyaken a mangay.

Naknakmen na ni Pawlo a mangay jira do Kedinto

⁵ Yaken rana am ko meyliktaw do Maciton. Si mateyka ko a itazogaw o aro a kyokay do Maciton am mangay ko jinyo.

⁶ Ala miseysan ko jinyo do dang so makanateng a araw. Ala si mavitos rana o amyan am ori o yangay ko rana mangilili a sidongen nyo pa yaken a meypangay do angayan ko.

⁷ Ta no si apyahen na ni Ama ta do to am ko ikakza o kownay ko pa a macikaop jinyo do dang.

⁸ Am to ko pa vezed do Ivoso eya mangay do araraw no ipamarimaring ta so kanen a somaray no nihakawan ta.

⁹ Tana yaro yamrahet jyaken a yameylimwang no ciriciring na ni Ama ta do to am ko ji macimazai. Ta yatey yaro o makza no ciriciring na ni Ama ta do to.

¹⁰ No si mangay si Timotay jinyo dang am taotawwen nyo an, a kapiya na no onowned na an. Ta yanamen meyyangay a yamahap so vazay na ni Ama ta do to.

¹¹ Ji nyo ngolala. Ta sidongen nyo a meypangay jyaken do jya. Ta yako nanalahen si Timotay a kano kakehza na a mai jyaken do jya.

¹² O kakteh ta si Apolo am ko masangib a ipanci jya o kakekehza da sira kakteh ta mangay tomazogaw ninyo. Am na sapasapan pa. Cyaha, ta amyan so kasaraw a yangay na jinyo.

Ney manowji a ciring na

¹³ Meytataziman kamo an. Makahadpet kamo so nakenakem a omraralay ni Ama ta do to. Ji kamo a nyahey.

¹⁴ Pangozayan nyo o pangangarilawan na do makakaday a vazay nyo.

¹⁵ Nyo katenngan sira Setiva yasa ka vahay, ta sira rana yasa ka vahay do Sila am ney manma sira niomanoyong ji Yeso a tao a tey mowyat a somidong so sinjya.

¹⁶ Am ori o amizngen nyo so akman sang a tao a kano kararay da mahap so vazay na ni Ama ta do to. Amizngen nyo o yokodan da ninyo.

¹⁷ Ko masaray do da kanimai da Setiva kani Votonato a kani Akayko. Yakmey kataotao nyo sira do nyo ikabo do jya.

¹⁸ Tana yaken a tana inyo am tamo meyyangay a yasomaray nira. O akman rana sira ya am ikanig nyo sira ya an.

¹⁹ Da ipeyminaminasi inyo no peycyakyokyokayan na do Yasiya. Tana si Akwila kani Paycila kano aro a sinjya a meyneynozi do vahay da am yakman sang sira yameyminaminasi ninyo do tamo kakmey yasa yamraralay ni Yeso.

²⁰ Sira mamimin o kakteh ta do jya yameyminaminasi ninyo. Inyo rana am masicyakarilaw kamo a meyminaminasi no kadwan jinyo.

²¹ Yaken rana am si Pawlo ko a yamapadket so aryarilaw ko jinyo do vakong eya. Makapya kamo an.

²² No myan so ji raralay ni Yeso Kizisto a tao am manoyong kapeygegcin na jya no oyaoya na ni Ama ta do to. Mo Yeso Kizisto, inaoy si mai ka na.

²³ Inaoy si itoro na ni Yeso a Panirsirngen ta o pangangarilawan na jinyo.

²⁴ Ko ikarilaw inyo, ta kamo macikaop ji Yeso Kizisto.