1 Kedinto 14 - Seysyo No Tao

Apiya ahahapan ta so teneteneng a kano oyowyat apo do Seyzi

¹ Am ori o ikakdekdeng nyo pa mangarilaw so icyatatao nyo. Akman sang, ta ikakza nyo o teneteneng a kano oyowyat a itoro na jinyo no Seyzi. Am ney makdeng na am mangononong so ciriciring na ni Ama ta do to.

² Ta o meyzezyak so macitarek a ciring apo do Seyzi am beken a tao o peycirngan na sya, ta si Ama ta do to, do kabo no tao a makateneng jya amizngen.

³ Am o mangononong so ciriciring na ni Ama ta do to am tao o nanawen na. Ta isidong na sira, ipait na sira, ipasaray na so onowned da no amyan so alalaw da.

⁴ O manci no macitarek a ciring am kataotao na o masidong na. O mangononong so ciriciring na ni Ama ta do to a tao am masidong na o tao do kyokay.

⁵ Inaoy si mamimin kamo a meyciring so macitarek a ciring. Am ko apyapyahen pa inyo a mangononong so ciriciring na ni Ama ta do to. Ta no myan so tao a mapeyvaliw so macitarek a ciring am ori o ipakasidong na so tao do kyokay. No si abo o mapeyvaliw sya am makdekdeng pa o kapangononong so ciriciring na ni Ama ta do to a kano meyciring so macitarek a ciring.

⁶ Am ori an, manga kakteh an. No si mangay ko jinyo a kapangononong ko no ji nyo a tenngi a ciring am ikongo peypeypangayan na no akman sang. Si ahapen ko saon o ciring nyo a mangononong so ciriciring na ni Ama ta do to am ori o ipakasidong ko jinyo saon am.

⁷ No si malas o patbokan da so anood am abo tao a makateneng do anwanood.

⁸ No avyotan o ipaziman so tao a kaji na pengkadan am sino do itaysang o makateneng do kapeyliliman da.

⁹ Akman sang o macitarek a ciring nyo an. Ta no abo tao a makateneng do peypeypangayan na am akma kamoy macisirsiring do pagpag.

¹⁰ Yaro yamakakaday a ciring do karawan am abwata yasa dang a yajyatenngi no tao so peypeypangayan.

¹¹ No ji ko a tenngi o peypeypangayan no ciring a ipanci da jyaken no macisirsiring jyaken a tao am akma nameney apo do matarek a pongso a ji makateneng do ciring no kadwan jyamen.

¹² No nyo tey kakza o teneteneng a kano oyowyat apo do Seyzi am naknakmen nyo o kakza nyo no makasidong so nakenakem da ji Ama ta do to no akma nyoy kakteh do cinai.

¹³ Am ori an. Ta o makza no kapeyciring so macitarek a ciring am ipeynozi na o kapakateneng na jya peyvaliwen.

¹⁴ Ta no meynozi ko no macitarek a ciring am onowned ko o meynozi. Am abo do pangtoktwan ko.

¹⁵ No akman sang am makongo so wanjin. No meynozi ko am meynozi o onowned ko a kano akman sang a aktokto ko a meynozi. Akman sang no meyyanwanood ko.

¹⁶ No si isaray mo ji Ama ta do to no macitarek a ciring am manngwa, katenngan da o inozi mo no macipeynozi jimo? No si manoyong o kakman na sang am makongo sira macizanod jimo a manci no, “Amin,” do ji da tenngi.

¹⁷ Tana apya o inozi mo ji Ama ta do to am ji na sidong o karwan no tao.

¹⁸ Ko isaray ji Ama ta do to. Ta yabo yamakataha jyaken a masangib a makalavat so macitarek a ciring.

¹⁹ Am no malwalovot a meynozi am apyapyahen ko pa o alima ka ciring a katenngan da amizngen no tao a makananao sira a kano meykazivozivo a ciring a ji da tenngi amizngen no tao.

²⁰ So ipeypakatkat nyo, manga kakteh so pangtoktwan an. Akman kamo so mina tazak a tao a ji nakenakem so raraten.

²¹ Maniring do Seysyo am, “Pacisirsirngan ko o aro a tao no macitarek a ciring. Mamnek ko so tao do matarek a pongso a macisirsiring jira. Am yada yaken ji ngamiznga.”

²² So ikanoyong na no macitarek a ciring a yongkad no oyowyat na ni Ama ta do to. Am ori rana am ipaziman so ji nganoyong ji Yeso a tao. Am o mangononong so ciriciring na ni Ama ta do to am ipeypahagnat so nakenakem da no amraralay ni Ama ta do to a tao.

²³ No malwalovot kamo do kyokay a meynozi a kamimin nyo meyzezyak so matarek a ciring am no somdep sira o ji manaralay a tao am jyabo kaji da mancyan ninyo a zomyak a.

²⁴ Am no malovot kamo a mangononong so ciriciring na ni Ama ta do to a kasdep da no ji manaralay a tao am jyabo kaji da makanakman so raraten da, do pakamizngan da so ipanci nyo a ciriciring na ni Ama ta do to.

²⁵ O meyyomomon do onowned na a raraten am jyabo kaji na ngablisan jya a omraralay rana ni Ama ta do to, do kanoyong na do kapacikaop na jinyo ni Ama ta do to.

Pangozayan do kyokay a iwawalam

²⁶ Manga kakteh, akman so wanjin o pangozayan nyo. No malovot kamo a meynozi am amyan so meyyanwanood. Amyan so mangnanao. Amyan so mangononong so ciriciring na ni Ama ta do to. Amyan so macitarek so ciring. Amyan so mapeyvaliw sya. Naknakmen nyo o kapeypahagnat da so nakenakem no makakaday a vazay no sinjya. Ta ori o manoyong an.

²⁷ No myan so meyzezyak so macitarek a ciring am karwan na o tatlo a mapalipalit. Am amyan so mapeyvaliw so peypeypangayan na no nang.

²⁸ No si abo tao a mapeyvaliw so ciring na am ji rana meyzezyak o macitarek so ciring a tao an. Apyapya rana kato na ngyanan do onowned na a manci nya ji Ama ta do to.

²⁹ Am o mangononong so ciriciring na ni Ama ta do to am apya ka rarwa da am tatlo no manci nya. O mangamizing a tao am pakamizngen da o kanoyong na kalas na no ciring da.

³⁰ Am no si myan so amlisna tao a yanan no nimapo ji Ama ta do to a ciring am o nimanmanma a nimyan so ciring a tao am to rana neyked.

³¹ Apya kapalipalit nyo a mangononong so ciriciring na ni Ama ta do to a kamimin nyo a karapan so onowned.

³² O yanan no teneteneng a mangononong so ciriciring na ni Ama ta do to a tao am ingtwan na o kataotao na, ta ji to meyzezyakan.

³³ Ta o yaomoyat jira Tao do to am beken a yamapeyzavozavoz so vazay. Ta na twatontonen o vazay na. O iwawalam do peycyakyokyokayan na am,

³⁴ ji meyzezyak o mavakes do kalwalovotan no tao a meynozi akman so domket do Seysyo. Ta kapangamizing da no mavakes.

³⁵ No myan so kakzeben da katenngan am to da pacicya o kahanghangan da do vahay da. Ta o meyzezyak do kalwalovotan no tao a mavakes am jyazway o akman sang.

³⁶ Ala yamyan so yaji ngahap so ko inanao jinyo ya. Manngwa, yanimapo jinyo o nanao na ni Ama ta do to? Manngwa, inyoo o yana nanawen?

³⁷ No myan so tao a yamanci no kapangononong na so ciriciring na ni Ama ta do to a kano manci no keyyan no oyowyat na jya no Seyzi am naknakmen na o yadomket do teygami ko ya. Ta yamonganay ori ji Ama ta do to.

³⁸ No myan so ji ngahap sya am ji nyo ngamiznga.

³⁹ Am ori manga kakteh an, kakzan nyo no mangononong so ciriciring na ni Ama ta do to an. Am ji nyo nengsengi o meyciring so macitarek a ciring an.

⁴⁰ Pangozayan nyo o kapeycyapyapinpinan no vazay an.