1 Kedinto 12 - Seysyo No Tao

Meytaretarek a oyowyat a kano teneteneng a itoro no Seyzi

¹ Manga kakteh, inaoy si mamimin kamo a makateneng do oyowyat a kano teneteneng a nitoro na jinyo no Seyzi.

² Naknakmen nyo pala no kaji nyo pa nganoyngan ji Yeso. Jyabo kaji na nitomalamozongan ninyo ni Satan a, do kanimraralay nyo no malas a iraralay nyo.

³ Am nyo rana anoyngan si Yeso. Am ori o nyo na ipakateneng jya, ta o italamozong no Seyzi na ni Ama ta do to a tao am jyabo kapeyciring na so kalas na ni Yeso a. Akman sang an, ta o italamozong na no Seyzi na ni Ama ta do to o manci no kanoyong ni Yeso a Panirsirngen ta.

⁴ Tana yameykataretarek o oyowyat a kano teneteneng ta am yasa o Seyzi a yamanta nyaten so sang.

⁵ Tana yameykataretarek o vazay ta a somidong so akma tey kakteh do cinai am yasa o Panirsirngen ta a ta hapen so vazay.

⁶ Tana yameykataretarek o vazay ta am yasa si Ama ta do to a yaomoyat jyaten.

⁷ Tana yameykataretarek o na itoro jyaten no Seyzi a oyowyat na am yamamimin ori a yamakasidong so akma tey kakteh do cinai.

⁸ O Seyzi rana am na itoro do yasa ka tao o teneteneng a makateneng do nanao na ni Ama ta do to. Yakman sang, ta na itoro do yasa ka tao o teneteneng na yana ipangnanao.

⁹ Yakman sang, ta na itoro do yasa ka tao o kakdeng no nakenakem na ji Ama ta do to, a na katoro nya do yasa ka tao so oyowyat na a yamvonas so ingingnen no tao.

¹⁰ Akman sang, ta itoro no Seyzi do tao o oyowyat na mapeyvazay so mapeyzokab a vazay, a na katoro nya do yasa ka tao so oyowyat na mangononong so ciriciring na ni Ama ta do to, a na katoro nya do yasa ka tao so teneteneng na mapeypinpin so manoyong a oyowyat no Seyzi a kano oyowyat na ni Satan, a na katoro nya do yasa ka tao so oyowyat na a meyzezyak so macitarek a ciring apo do Seyzi, a na katoro nya do yasa ka tao so teneteneng na a mapeyvaliw so ciring a nipanci da.

¹¹ Am o yamakakaday a oyowyat a kano teneteneng am asa o na yapwan. Iya rana am Seyzi a mangay tomoro no oyowyat na do aro a tao. Ori rana am nakenakem na no Seyzi o katoro na nya jyaten so oyowyat ta kano teneteneng ta.

Kapalangayan no kyokay o kataotao ta

¹² Yasa o kataotao ta am yameykataretarek o peyvongvongwan ta. Tamo akman sang an. Tana ta aro a yamraralay ni Ama ta do to am tamo yakmey asaha a kataotao na ni Kizisto.

¹³ Am ori o tana tao do Yotay ta, tana beken a tao do Yotay ta am tana lamlamsoy da yaten am tana to ta ngonongonongi o vazay ta am cyaha. Ta tamo na nimamimin a nitaktakan no Seyzi. So ta icyakmey yasa ka tao so kataotao a yana italamozong no yasa ka Seyzi.

¹⁴ Beken a yasa o na kamamaogan no kataotao ta. Ta yaro yameycyataretarek a peyvongvongwan ta.

¹⁵ No si maniring o ai am, “Beken a lima ko. Am ori o ji ko macirapai do kataotao.” Am jyakman sang a ji macirapa do kataotao an.

¹⁶ No si maniring o talinga am, “Ji ko macirapa do kataotao, ta beken a mata ko.” Am jyakman sang a ji macirapa do kataotao an.

¹⁷ No si mamimin o kataotao a mata am makongo a mangamizing. No si mamimin o kataotao a talinga am makongo ori a manhangno.

¹⁸ Am to na mangozai ni Ama ta do to o nakem na mapeykapyapinpin so makakaday do kataotao ta an.

¹⁹ Am no si meyyangangay sira am abneken ori a kataotao?

²⁰ Tana yaro yameykataretarek do kataotao ta am yasa o kataotao ta.

²¹ Am ori o ji na mapeyciringi no mata do lima so, “Yabwata yako keylamnayan nimo.” Akman sang oo, ta ji na peycirnga do ai o kabo no keylamnayan na nya.

²² So yana jyakmani sang an. Ta o yata ipanci a jyakdeng a peyvongvongwan ta am amyan so ta keylamnayan nya.

²³ O yata ipanci a yajyakdeng do kataotao ta am ta peyveyveknen a yapzatan. Am ori o na ikazway rana.

²⁴ O yapiya peyvongvongwan ta am ta ji bonboni. Ta yamazway na nimaogan sya ni Ama ta do to. O na nyamaogan sya ni Ama ta do to so peyvongvongwan ta am mamimin a makdeng.

²⁵ So icyakma dey asa a macisidosidong.

²⁶ No myan so meyngen do kataotao am todamimin o kataotao a meyngen. No myan so azwazway no asa ka kakamay ta am todamimin o kataotao ta a masaray.

²⁷ Inyo rana am kataotao na inyo ni Kizisto. So ikamimin nyo akma ney kataotao.

²⁸ Do kyokay na ni Ama ta do to am yamakakaday o tao a nipamnekan na mahap so vazay na. O ney manma na am nipamnekan na ni Yeso a amlivolivon no ciriciring na. Tomonton am mangononong so ciriciring na. O ikatlo na am mangnanao no ciriciring na, katwatonton na rana no meyvazay so mapeyzokab a vazay a kapacyangay da rana no manvonas so ingingnen no tao a kano marilaw no icyatatao da kano makayokod no aro a sinjya kano meyzezyak so macitarek a ciring.

²⁹ Am beken a todamimin sira nipamnekan na ni Yeso a amlivolivon no ciriciring a kano mangononong so ciriciring na kano mangnanao no ciriciring na. So ji da todamimin a mapeyvazay so mapeyzokab a vazay,

³⁰ a kano manvonas so ingingnen a kano meyzezyak so macitarek a ciring a kano mapeyveyvaliw so ciriciring da.

³¹ Am naknakmen nyo o kakza nyo no ney yapya na teneteneng a kano oyowyat a isidong nyo so icyatatao nyo. So yako pananawan nya jinyo so ney yapiya na pangozayan nyo.