1 Kedinto 11 - Seysyo No Tao

¹ Inarahen nyo yaken a ominara si Yeso Kizisto.

Vazay no mavavakes a kano mahahakay do kalwalovotan a meynozi

² Ko isaray inyo, ta nyo masangib yaken a yamanakem a yamangozay do nipamizing ko jinyo a iwawalam no kyokay.

³ Am inaoy si katenngan nyo si Yeso Kizisto a tomalamozong ninyo a mahakay. O mahakay rana am ipeymatmatngeh da o mavakes da. Si Yeso Kizisto am onotan na si Ama ta do to.

⁴ No meynozi sira kapangononong da no mahakay do kalwalovotan a meysakop am manoyong sira komolala si Kizisto.

⁵ Am no meynozi sira kapangononong da no mavakes do kalwalovotan no tao a kaji da bonbonan do oo da am manoyong sira komolala so kahanghangan da. O akman rana sang a mavakes am meyyangay sira kano nigolgolan da a mavakes.

⁶ No ji da bonboni o oo da no mavakes am apyapya kato na rana nedtedan do avok da. No ipacimanig da o kapeygolgol da am bonbonan da o oo da.

⁷ Ji bonboni o oo da no mahakay. Ta kehngehngay da o kamamagen ni Ama ta do to a kano azwazway na. Am pacikazwayan no mavakes o mahakay.

⁸ Ta beken a mavakes o nikamaogan na no mahakay no kapangamaog na pa ni Ama ta do to so karawan. Ta o mavakes am mahakay nikamaogan na.

⁹ O nyamamaogan na ni Ama ta do to so mavakes am sidongen na o mahakay.

¹⁰ Am ori o ipeyvazongot da no mavakes, do kapacita da nya do tinsi na ni Ama ta do to so kapacyanod da so nakem do mahakay na.

¹¹ Am yaten rana amraralay ni Yeso a tao am masicyakarilaw o mahakay a kano mavakes do vazay an.

¹² Tana nimapo o ney manma a mavakes do mahakay am nimapodpod o mahakay do mavakes a kapo no makakaday a masaod no karawan ji Ama ta do to.

¹³ To nyo na naknakman. Manngwa, mazway o ji bonbon do oo da a mavakes do kalwalovotan a meynozi?

¹⁴ Manngwa, nyo jya kazazap no onowned nyo o kapacimanig no mapatovo so avok a mahakay?

¹⁵ O mavakes am ikazway da o anaro a avok da. Ta o anaro a avok da no mavakes am ibonbon da do oo da.

¹⁶ No si myan pa so jyalpid a tao am naknakmen na o kabo no meytarek a iwawalam ta. So da ikamimin no peycyakyokyokayan na yanan no yakman sang a iwawalam.

No iyapapaw si Yeso

¹⁷ Yapa myan so ko ipanci jinyo. Ori rana am ko jyakzan o vazay nyo no kamo meylovolovot. Ta beken a nyo ikapya o nyo kalovot a yameynozi. Ta nyo ipeyparahet.

¹⁸ Ney manma na am yamyan so tao a yamanci nya jyaken so nyo ikavwavwak a yameykalyalipenpenan so nakenakem no kamo malwalovot a meynozi. Ko anoyngan no kanoyong no yatatasa dang a ciring.

¹⁹ So na jyalasi no nyo kasyasyay so nakem. Ta ori o ipakateneng do manoyong rana so nakem ji Ama ta do to.

²⁰ No kanyo malwalovot a omapapaw si Kizisto am macitarek o yanyo naknakmen.

²¹ Ta yamyan so yato manmanma koman a da keyyop. So na iyan no manowji a ji makapis so nipeylovolovot da kanen. Am ori o ipeykakcin da.

²² Manngwa, yabo kavahayan nyo a nyo akanan? Kamo manoyong saon a yakomolala so kyokay na ni Ama ta do to a yamapanyanig so ji makahakaw a tao. Akman ko na so wanjin a omnanao jinyo. Manngwa, azwazwain ko inyo? Jyabo kazwazway ko jinyo a.

²³ O ko ipamizing jinyo am nimahap ko ji Yeso a Panirsirngen ta. So ko nipancyan rana nya jinyo. Ahep no kapanazang da ni Yeso am ahapen na o pang,

²⁴ a kasaray na nya ji Ama ta do to akcikcilen. Maniring am, “Oya rana am kataotao ko ya a ivyay jinyo. So kanan nyo sya a iyapapaw nyo jyaken.”

²⁵ Mateyka sira koman am akman so sang a mahap so ayoyopan. Maniring am, “Oya rana am yongkad no vayo a pangozayan nyo a ciring na ni Ama ta do to a manci no kahap na jinyo do kanimvoyog ko ninyo no rala. So to nyo amwamooni sya a iyapapaw nyo jyaken.”

²⁶ Mangday no kakan nyo so pang a omyop so potaw cyo eya o kapeylimwang nyo ni Yeso Kizisto a nimawakwak no raraten nyo, mangay do ikeypirwa na mai.

²⁷ Am ori an, no myan so tao a koman so pang a keyyop na so amyan do ayoyopan a ji nakenakem so peypeypangayan na am manoyong kapeyraratenen na so sang a mapasala do kataotao na kano rala na ni Yeso.

²⁸ Am ori an, naknakman pa so karatan no kataotao a kakan rana sya, keyyop rana sya.

²⁹ No kanen na o pang a keyyop na so yamyan do ayoyopan a kaji na makatenngan do peypeypangayan na am mangay jya o peyoyaoyyan na ni Ama ta do to.

³⁰ Am ori o na iyan rana jinyo no yameykeyngeyngen a kano yanimawakwak.

³¹ No panmanmahen ta pa o kanakenakem ta so nikaratan no onowned ta am jyabo kaoya na nyaten ni Ama ta do to a.

³² Am o oyyan na nyaten ni Ama ta do to am inanao na jyaten. Ta ori o ji ta macizanoji do ji nganoyong jya tao a peydednan na so peyoyaoyyan na no makwa.

³³ Am ori an, manga kakteh an. No malwalovot kamo a omapapaw si Yeso am macipananala kamo an.

³⁴ No myan so makcin am manmanma koman do vahay da an, a kabo na no oyaoya na ninyo ni Ama ta do to no meylovolovot kamo. Yapa myan so ipanci ko jinyo am cyaha, ta ipanci ko no ipisa kai ko.