1 Kedinto 10 - Seysyo No Tao

Ipaziman na so manaralay so malas a iraralay

^1-2 Manga kakteh, ko pazimanen jinyo o mina vazay no ineynapo ta a nimacihza ji Moyse. Nimamimin sira nyapzatan ni Ama ta do to a nimangonong do ngaranan da Mabazangbang awa. Tana do onotan da do cinalab a tana no kapangonong da do awa am nimamimin sira niomonot ji Moyse do palolwan na sira.

³ Akmey asa sira nikoman so nipakas na ni Ama ta do to a kanen a ngaranan da mana a nibsoy na sira.

⁴ Akmey asa sira niminom so ranom a nitoro na jira ni Ama ta do to a nimvoyog do vato. O vato rana am akmey kataotao na ni Yeso Kizisto a nimacihza jira.

⁵ Am tana rako o nisidongan na sira ni Ama ta do to am apeleh sira o nimahap so vazay na tao. So nikaoyyan na nira ni Ama ta do to. Am ori o nikawakwak da do kabwan no nihakawan no tao.

⁶ Ikananao ta rana yamakakaday a vazay a na ipaziman jyaten a ji macineynara do akman sira ori a makza no makakaday a marahet a vazay.

⁷ So ji nyo nginarai so yatatasa ka tao jira a manaralay so malas a iraralay da, akman so ciring do Seysyo. Ta maniring am, “No kapanaralay da so malas a iraralay da am makapya sira o aro a tao a malimolimot a amyop a koman a maganam.”

⁸ Ji tamo nginara sira o yatatasa ka tao a somagpyan a yabo so yapanganyanigan. Sira rana ori am kakatlwan a ranaw o ikatlo na zivo (23,000) no tao a nimawakwak do kasaraw.

⁹ Ji tamo nginara o yatatasa ka tao a mileylamdam si Ama ta do to, ta nisongit da sira no aro a mavowaw a kawakwak da.

¹⁰ Ji tamo nginara sira o yatatasa ka tao a meyoyaoya do tangain na ni Ama ta do to. Ta o meyoyaoya a tao no kanang am nibalinas na sira no tinsi na ni Ama ta do to.

¹¹ O akman rana sang a vazay da am ipaziman na so aro a tao. So na idket no akman sang do Seysyo a ipaziman na jyaten a tao sicyaikwaya. Ta yaomanam rana o kakavos no karawan.

¹² Am ori an, no myan so makeylamdam so nakenakem na ji Ama ta do to a makdeng rana am meytataziman ori an. Ta kalittan an.

¹³ O yana ilita jinyo ni Satan am yabo dang vayo. Am katey manoyong na ni Ama ta do to a mapahawa so ikarahet nyo a ilita na jinyo ni Satan. Ta oyatan na inyo ni Ama ta do to no littan na inyo ni Satan. So ikapiya nyo a ipeypalanginan na ni Ama ta do to a mahap so apiya vazay.

¹⁴ Am ori an, ji kamo rana manaralay so malas a iraralay nyo, manga keypong an.

¹⁵ Yako nanawen inyo a mateteneng a tao. Jyabo kaji nyo makatenngan do kanoyong na, kalas na no ciring ko a.

¹⁶ O tamo ayopen a tamo iyapapaw si Yeso am tamo isaray ji Ama ta do to an. No tamo amyop so rala na ni Yeso a yata kakan so kataotao na am tamo akmey asa rana a macikaop ji Yeso Kizisto a nimawakwak no raraten ta.

¹⁷ Tana tamo aro am yasa saon o pang a tamo kanen am. So yatamo icyakmey yasa rana so kataotao.

¹⁸ Naknakmen nyo o Isedi a tao a koman so patanangen da ji Ama ta do to a yamacizanod so nakem amraralay ni Ama ta do to.

¹⁹ Ikongo peypeypangayan no akman sang a ciring. Manngwa, manoyong o kakdeng na no malas a iraralay da kano pazos?

²⁰ Jyabo kakman na sang a. Ko peycirngan sya am o pazos da no ji raralay ni Ama ta do to am itoro da do kalamsoyan ni Satan. So ika beken a si Ama ta do to no torwan da nya. So ko ji mamyapyai ninyo a macikaop do kalamsoyan ni Satan.

²¹ Marahet o keyyop nyo so rala ni Yeso a nyo keyyop so monganay ji Satan. Marahet o kakan nyo so kataotao ni Yeso a kakan nyo so monganay ji Satan.

²² Manngwa, tamo manoyong a yamapasozi si Yeso a Panirsirngen ta? Manngwa, tamo mowyowyat pa kani Yeso?

²³ Yamyan so tao a yamanci no, “Sino ipanci o kaji ta naliwayan a mahap so vazay ta.” Jyalas o akman sang a ciring. Am beken a todamimin o vazay a makarapa do onowned. Manoyong kasaliway ta a mahap so vazay ta. Am beken a todamimin o vazay a makasidong so tao.

²⁴ Taosya o kato ta manginanodan so apyahen ta no nakem. Ta panadnaden ta o icyatatao ta.

²⁵ Ji nyo a zyakan o yapwan no ipanazang da asi no vinyay, ta kasazang nyo jya.

²⁶ Ta maniring do Seysyo am, “O masaod no karawan am mamimin a yaponged na ni Ama ta do to.”

²⁷ No pakanen da inyo no ji raralay ni Ama ta do to am no panamen da o kanen am ji nyo meyrahan.

²⁸ Am no myan so akma moy kakteh do cinai a manci no kanimeypazos da no kanekanen am panadnaden nyo o manci nya tao. Apyapya pa kaji nyo nganan sya.

²⁹ Beken a ko pakacirngen jinyo amrahet sya, ta panadnaden nyo o ji makakan sya tao. Am ori o ji nyo ngani sya. Ala myan so tao a manci no, “Ta amizngan ko so ciring da no tao.”

³⁰ Ji nyo akwan o, “No isaray ko kanen ji Ama ta do to am sino tomamwad jyaken a koman sya.”

³¹ Am ori an, tana makakaday a vazay nyo a tana koman kamo a tana omyop kamo am naknakmen nyo o kazwazway nyo si Ama ta do to.

³² Am ori an, ji nyo mamyapyai no kapacinara da jinyo a meyraraten no tao do Yotay a kano beken a tao do Yotay a kano tao do peycyakyokyokayan na.

³³ Inarahen nyo o mina vazay ko a mapasaray so aro a tao a ji mangozay do apyahen ko no nakem. Ta panadnaden o icyatatao. Ta ori o ikablis da no onowned da ipakahap da so to meyyonong a ikavyay no pahad da.