Yohanes 1 - Jaji ma Su-sungi

'Idini ga'a gasa 'ahu

¹ 'Ua re 'au wali wakutu dungia 'i dadi nyangu, 'Idini rema enanga ḏua. 'Idini gena-ge 'i mamete'e ra Ma Jou'ongu Madutu, re 'Idini gena-ge ḏi'i Ma Jou'ongu Madutu.

² 'Ua re 'au wali ma mulaingi 'Idini gena-ge 'i mamete'e ra Ma Jou'ongu Madutu.

³ Ma Jou'ongu Madutu 'o pake Unanga gena-ge di'a 'O sidadi 'oru ḇato mo-moini. 'Ori i'a rimoi mai ua nga'unu 'i dadi, na'o Unanga ua.

⁴ Unanga gena-ge 'ahu ma cimi, re Unanga Ma Jou'ongu Madutu 'ai tarangi toma manusia.

⁵ Tarangi gena-ge 'i sitarangi toma hafu-hafu, re hafu-hafu nga'unu ua ya sisengene 'o tarangi gena-ge.

⁶ Ma Jou'ongu Madutu 'o 'utusu matengo 'o sapolo, 'ai lomanga 'a Yohanes.

⁷ Unanga 'o sapolo sa'olo sakisi di'a sihabari tarangi gena-ge, la ngowa'a mo-moini 'aḏi ngaku Unanga gena-ge.

⁸ Yohanes masiretene 'o tarangi ua, unanga pa'i sakisi mangale tarangi gena-ge.

⁹ Tarangi mode-mode'e ga'a sitarangi ngowa'a mo-moini manga 'akala re sinyingara, tarangi gena-ge ri sapolo toma dungia.

¹⁰ Unanga gena-ge ro sapolo re tegoro toma dungia nena-ne ga'a Unanga 'a sidadi. Mada'a ngowa'a 'aḏi tegoro toma dungia nena-ne 'aḏi oḏu'u dawongo Unanga.

¹¹ Kalaha Unanga 'O sapolo Tai ji'o re 'Ai gamu, 'Ai herapongo 'aḏi oḏu'u dawongo Unanga.

¹² Mada'a 'a guna ḇato 'o dawongo re 'o ngaku Unanga, Unanga 'o pula'a haku ra ananga di'a 'aḏi dadi Ma Jou'ongu Madutu 'ai ngowa-ngowa'a.

¹³ Ananga gena-ge 'aḏi dadi ua Ma Jou'ongu Madutu 'ai ngowa-ngowa'a, sababu manga ete re dotumu, bolo manusia manga nyafusu, bolo nau'u 'ai nyafusu. Mada'a ananga gena-ge 'aḏi dadi Ma Jou'ongu Madutu 'ai ngowa-ngowa'a sababu 'ahu su-sungi ga'a ma 'asala ra Unanga.

¹⁴ 'Idini gena-ge ri dadi manusia, re Unanga 'o tegoro tananga sigolona re wa oḏi'i ḏua 'Ai kabasarana. Kabasarana gena-ge ma 'asala ra Ma Jou'ongu Madutu sababu Unanga 'Ai Ngowa'a Nau'u pa'i matengo. Sababu Unanga, ngene wa basono tala Ma Jou'ongu Madutu 'ai mura re dadalara masala ra ngene, re Unanga 'o sijumu ma ba-banari mangale Ma Jou'ongu Madutu ra ngene.

¹⁵ Toma wangere rimoi, Yohanes 'o pula'a 'ai sakisi mangale Yesus. Unanga 'o kanau, “Nena-ne Unanga ga'a ngoi to kanau, ‘Ngoi to sapolo siḏa, kara Unanga ḏuanga i'a 'o sapolo. Mada'a Unanga lebe la-lamo'o i'a ra ngoi, sababu wakutu ngoi to cua moju, Unanga 'age ḏua.’ ”

¹⁶ Sidogo ḏi'i, Unanga ga'a romanga reo mura re dadalara, Unanga gena-ge ḏi'i lebe la-lamo'o i'a rea Yohanes; sababu Rai mura re dadalara, ngene mo-moini rewo dawongo barakati rimoi ga'a lebe lamo'o i'a reo barakati rimoi ga'a siḏa.

¹⁷ Sababu Ma Jou'ongu Madutu 'ai hukumu, gena-ge ma barakati siḏa ga'a ngene wa dawongo ra Musa. Mada'a Ma Jou'ongu Madutu 'ai ba-banari re 'Ai mura re dadalara, gena-ge ma barakati su-sungi ga'a ngene wa basono tala sababu Yesus Kristus.

¹⁸ Matengo i'a mai nyangu ro oḏi'i Ma Jou'ongu Madutu, mada'a pa'i 'Ai Ngowa'a Nau'u matengo, ga'a 'O marimoi rai Ḇaḇa. Unanga gena-ge ra sibaiti re Ra sitarangi mangale Ma Jou'ongu Madutu ra ngene.

Yohanes 'o pula'a sakisi mangale unanga masiretene

¹⁹ Yohanes 'o pula'a sakisi mangale unanga masiretene so'o ne: Toma wangere rimoi, Yahudi manga bi-biri'i toma limau Yerusalem 'aḏi soma'a 'imam-'imam re ngowa'a Lewi mamuni'a 'aḏi tagi ra Yohanes. Ananga gena-ge 'aḏi sano ra unanga: “Ngana ne 'a guna?”

²⁰ Yohanes 'o sitaḇela'a i'a ra ananga: “Ngoi ne 'O Kristus ua!”

²¹ Ḏua ananga 'aḏi sano, “Na'o so'o gena, ngana ne 'a guna? Ngana ne nabi Elia?” Yohanes 'a sangoro, “Ua!” Ananga 'aḏi sano moju, “Bolo ngana 'o nabi ga'a sijaji pasala ḏua?” Yohanes 'a sangoro, “Ua!”

²² Dadi, ananga 'aḏi kanau, “Na'o so'o gena no masiajele ra ngomi, ngana ne 'a guna? Ngomi mi paralu 'ani sa-sangoro, la ngomi nga'unu ma siajele toma ngowa-ngowa'a ga'a 'aḏi siḏingoto ngomi. Dadi 'oru ngana no makanau tala mangale 'ani diri masiretene?”

²³ Yohanes 'a sangoro 'o pake Nabi Yesaya 'ai demo-demo so'o ne: “Ngoi nena-ne 'ari iḏingi ga'a 'i kanau siduga-duga toma daeraha baulaco so'o ne: ‘Siboloto ngo'omo di'a Ma Jou.’ ”

²⁴ Re tamanga sigolona gena-ge 'age ngowa'a Farisi manga so-soma'a ga'a

²⁵ 'aḏi sano, “Ngana 'O Kristus ua, 'a Elia ua, bolo 'o nabi ga'a sijaji pasala ḏua mai ua, dadi i'a sa'olo ngana no baptis ngowa'a?”

²⁶ Yohanes 'a sangoro, “Ngoi pa'i to baptis ngowa'a reo ḇanyo, mada'a toma ngowa'a Yahudi manga sigolona, 'age rema ngowa'a matengo ga'a ngini nena-ne ni waro 'ai ḏe-ḏegoro ua.

²⁷ Unanga 'o sapolo tuu'u reo ngoi, mada'a ta gasa 'Ai tarupa mai patasa ua.”

²⁸ Mo-moini gena-ge 'i dadi toma gamu Betania, da'a toma Ḇanyo Yordan kaci moi. Toma ngi'i gena-ge, 'a Yohanes 'o baptis ngowa'a.

Ma Jou'ongu Madutu 'ai Doba ma Ngowa

²⁹ Ma ḇiḇini ino Yohanes 'o oḏi'i 'a Yesus 'o sapolo ra unanga. Ḏua Yohanes 'o kanau, “Oḏi'i Unanga nena-ne Ma Jou'ongu Madutu 'ai Doba ma Ngowa, ga'a 'O singi-ngiranga manusia manga ḏosa!

³⁰ Unanga nena-ne ga'a ngoi to kanau, ‘Unanga ḏuanga i'a 'o sapolo tuu'u reo ngoi. Mada'a Unanga lebe la-lamo'o ra ngoi sababu sibuoro ngoi nyangu, Unanga 'age ḏua.’

³¹ Ma mulaingi, ngoi to waro ua Unanga gena-ge 'O Kristus. Mada'a ngoi 'ari ta-sapolo di'a to baptis ngowa'a reo ḇanyo, la ngowa'a Israel 'aḏi waro Unanga sa'olo 'O Kristus ḏi'i.”

^32-33 Ḏua, Yohanes 'o pula'a sakisi so'o ne: “Ma mulaingi ngoi to waro ua Unanga gena-ge 'a guna. Mada'a Ma Jou'ongu Madutu ga'a 'o 'utusu ngoi di'a baptis ngowa'a reo ḇanyo, Unanga gena-ge 'o kanau ra ngoi, ‘Wakutu ngana no oḏi'i Ma Ngagara 'Ofi-'Ofi 'i matuhu ma tero sa'olo namo dara 'i 'uci, re 'i tegoro ra matengo i'a, Unanga gena-ge ḏuanga i'a 'O baptis ngowa'a rema Ngagara 'Ofi-'Ofi.’ Toma wangere rimoi, ngoi to oḏi'i Ma Jou'ongu Madutu 'ai Roh 'uci sa'olo namo dara da'u diwanga tala re 'i tegoro ra Yesus.

³⁴ Dadi ngoi reto oḏi'i masiretene re to pula'a sakisi mangale Yesus gena-ge Ma Jou'ongu Madutu 'ai Ngowa'a Nau'u.”

Yesus 'ai me-mete'e ma mulaingi

³⁵ Ma ḇiḇini ino, 'a Yohanes toma ngi'i gena-ge ḏi'i rai me-mete'e nga muḏiḏi.

³⁶ Wakutu Yohanes 'o oḏi'i Yesus tola'a i'a, unanga 'o kanau, “Oḏi'i, Unanga gena-ge Ma Jou'ongu Madutu 'ai Doba ma Ngowa!”

³⁷ Wakutu Yohanes 'ai me-mete'e nga muḏiḏi 'aḏi 'isene demo gena-ge, ananga gena-ge 'aḏi mete'e Yesus.

³⁸ Yesus 'o magelelo tai ḏuḏunu re 'o oḏi'i ananga 'aḏi mete'e Unanga. Dadi Unanga 'o sano, “Ngini ni disa 'oru?” Ananga 'aḏi sangoro, “Rabi (gena-ge ma ngale: Guru) no tegoro le'a?”

³⁹ Yesus 'o kanau, “Ino, ni oḏi'i masiretene.” Ananga 'aḏi tagi mamete'e ra Unanga re 'aḏi oḏi'i Unanga 'o tegoro le'a. 'Orasa gena-ge ca'olo rata wangere so'o ne'o re wangere gena-ge ananga 'aḏi tegoro ra Unanga.

⁴⁰ Matengo ra ananga nga muḏiḏi ga'a ro 'isene 'a Yohanes 'o kanau re togumu i'a ro mete'e 'a Yesus, unanga gena-ge 'a Andreas (unanga re Simon Petrus gia nongoḏu).

⁴¹ Andreas 'o sisoi'i tala Yesus re 'o tagi ca-capati re 'o disa 'a Simon, ananga gia nongoḏu. Re unanga 'o kanau, “Ngomi remi ma'u sanga 'O Mesias” (gena-ge ma ngale: 'O Kristus).

⁴² Dadi Andreas 'o gasa i'a 'a Simon ra Yesus. Yesus 'o lakodoto 'a Simon re 'O kanau, “Ngana Simon 'a Yohanes 'ai ngowa'a nau'u. Ngana ḏuanga i'a ngowa'a 'aḏi si'aro'o 'a Kefas” (Kefas toma demo Yahudi ma tero sa'olo Petrus toma demo Yunani. Gena-ge ma ngale: maḏi).

Yesus 'o 'aro'o 'a Filipus re 'a Natanael

⁴³ Ma ḇiḇini ino, Yesus 'a putusu 'o tagi toma daeraha Galilea. Wakutu Unanga 'o tagi nyangu, unanga 'o ma'u sanga ra Filipus re 'o kanau, “Ino mete'e Ngoi.”

⁴⁴ Filipus, Andreas re 'a Petrus, ananga manga 'asala toma gamu Betsaida.

⁴⁵ Filipus 'o tagi 'o ma'u sanga ra Natanael re 'o kanau, “Ngomi remi ma'u sanga 'O Kristus ga'a silefo ḏua ra Musa 'ai hukumu, re nabi-nabi manga boku: Unanga gena-ge 'a Yesus toma limau Nazaret, 'a Yusuf 'ai ngowa'a nau'u!”

⁴⁶ Mada'a Natanael 'a sangoro, “Nyengara 'o 'ori i'a ma la-la 'i sapolo toma Nazaret?!” Filipus 'a sangoro, “Ino, no oḏi'i masiretene.”

⁴⁷ Wakutu Yesus 'o oḏi'i 'a Natanael ro sapolo, Unanga 'o kanau mangale 'a Natanael, “Oḏi'i unanga gena-ge ngowa'a Israel madutu kai sa-sakala ua.”

⁴⁸ Natanael 'o sano ra Yesus, “Ma duhu sa'olo Jou no nana'o ngoi?” Yesus 'a sangoro, “ 'A Filipus 'o 'aro'o ngana nyangu, Ngoi retini oḏi'i ngana toma ate 'ara ma 'aḏu.”

⁴⁹ Natanael 'o kanau, “Rabi, Jou mode-mode'e Ma Jou'ongu Madutu 'ai Ngowa'a Nau'u re mode-mode'e ngowa'a Israel manga 'Olana!”

⁵⁰ Yesus 'o kanau, “Ngana no ngaku pa'i sababu Ngoi to kanau Ngoi reto oḏi'i ngana toma ate 'ara ma 'aḏu ḇato?! 'Ori i'a lebe la-lamo'o i'a reo gena-ge, ḏuanga i'a ngana na oḏi'i!”

⁵¹ Ḏua Yesus 'o kanau ḏi'i, “Ni ngaku mode-mode'e 'Ari demo-demo nena-ne: Ngini ḏuanga i'a ni oḏi'i diwanga 'i welanga re Ma Jou'ongu Madutu 'ai mala'ekata-mala'ekata 'aḏi 'uci pere toma Manusia ma Ngowa'a Nau'u.”