Yakobus 5 - Jaji ma Su-sungi

Bererongo toma ngowa'a rema-enanga

¹ Hai ngini ga'a ngowa'a rema-enanga, ni 'isene 'ari bererongo so'o ne: ngini balasu ni rerese ma gaḏi, sababu ḏuanga i'a ni basono kangela re sangisara.

² Ninga 'ori i'a rana rema ijana ri iranga, re ninga pakeanga 'o nyanyao'o ya oromo ḏua.

³ Nange-ne, ngini ni lomu ninga 'ori i'a rana mada'a ninga guraci re salaka ma faeda 'i cua, sababu enanga ri keho. Guraci re salaka ga'a ri keho gena-ge, ḏuanga i'a 'i dadi sakisi ga'a lawana ngini wakutu Ma Jou'ongu Madutu ḏuanga i'a sijuruhakimi manusia mo-moini mangale ngini ni pula'a ninga ngo-nganono taninga 'ori i'a rana. Ḏua Ma Jou'ongu Madutu 'o sihukumu ngini re ninga 'ori i'a rana gena-ge 'i ro'u toma u'u.

⁴ Nange-ne ni 'isene, ngini ga'a ni fangu ua ninga ngowa'a munara toma guḏa manga ngogele, ananga gena-ge raḏi kuḏubungu, sababu na'u fangu ua! Ananga gena-ge ga'a 'aḏi lomu ḏua ninga guḏa ma hasili, 'aḏi poa'a maḏigaro'o Ma Jou'ongu Madutu di'a 'O riono ananga. Nange-ne Ma Jou'ongu Madutu ga'a 'Ai kuasa ma pari cua, Unanga gena-ge ra 'isene manga iḏingi!

⁵ Nange-ne, ninga 'ahu pai-pai'i re dungia ma mau-mau mai ni basono mo-moini. Dadi ngini ni piara ninga lese singadolo ni dadi ma tero sa'olo haiwani, ga'a sidodahe ḏua di'a tola'a. Ma ḏo-ḏogumu, ngini ḏuanga i'a sanga hukumu ra Ma Jou'ongu Madutu.

⁶ Ngini ga'a ni sihukumu re sisengene ngowa-ngowa'a kama sala ua ga'a 'aḏi lawana ngini ua!

Manyiata re 'akala ḇanyo

⁷ Ngowa'a rema-enanga ga'a 'aḏi sikangela ngini, ḏuanga i'a 'aḏi sanga hukumu ra Ma Jou'ongu Madutu. Sababu gena-ge ioronongoḏu ngo-ngaku rimoi, ngini balasu ni totoma re ni pake 'akala ḇanyo singadolo Ma Jou dadunu 'o sapolo moju. Na oḏi'i ḇato ngowa'a guḏa ga'a 'aḏi totoma remanga 'akala ḇanyo, singadolo guḏa rema hasili. Ananga gena-ge remanga 'akala ḇanyo 'aḏi totoma besa'a ma 'orasa di'a 'aḏi tuju'u, re ngogoro ma 'orasa di'a ya 'utu'u ma sowo'o.

⁸ Ngini ḏi'i balasu ma tero sa'olo ngowa'a guḏa gena-ge. Ngini balasu ni pake 'akala ḇanyo tau-taunu, ni macako'o namo-namoto ra Ma Jou, sababu Unanga 'ai ta-sapolo enanga ma 'orasa 'i co-cori ḏua.

⁹ Ngini awa ni ma'u upa'a sala matengo re matengo, la Ma Jou'ongu Madutu 'o sihukumu ngini awa. 'Elingi! Ma Juruhakimi 'o ḏu-ḏuanga ḏua ro co-cori sapolo.

¹⁰ Ioronongoḏu ngo-ngaku rimoi ni 'elingi nabi-nabi ma siḏa, ga'a 'aḏi siajele Ma Jou'ongu Madutu 'ai habari. Kalaha ananga gena-ge sanga sangisara, 'aḏi pake 'akala ḇanyo. Dadi, na mete'e ananga manga duhu na'o ni sanga sangisara.

¹¹ Mode-mode'e ngene wo waro ḏua bara'utungu 'a guna ḇato ga'a manga ngo-ngaku kama elala ua singadolo 'aḏi sengene. Ngini ni 'isene ḏua mangale Ayub 'o pake 'akala ḇanyo, re na waro ḏi'i Ma Jou'ongu Madutu togumu i'a 'o sibarakati Ayub, sababu Ma Jou'ongu Madutu 'ai 'akala re sinyingara 'i romanga reo dadalara re ḏi'i Unanga 'o sijumu 'Ai 'akala re sinyingara ma la-la.

¹² Ma la-lamo'o ma re'u i'a ḏi'i nena-ne: Awa ngini ni masisasi: bae diwanga, bae tana'a bolo 'oru ḇato. Na'o ma maksudu tero mode'e siajele ḇato, “Tero mode'e.” Na'o ma maksudu rapu siajele ḇato, “Rapu”, la Ma Jou'ongu Madutu singeta'a hukumu awa ra ngini.

¹³ Na'o taninga sigolona matengo i'a sanga ma sangisara, unanga balasu 'o manyiata ra Ma Jou'ongu Madutu. Na'o 'age rema ngowa'a matengo i'a maroanga, unanga balasu 'o manyanyi puji re silamo'o Ma Jou'ongu Madutu.

¹⁴ Na'o 'age ḏi'i rema ngowa'a matengo i'a 'o siḏi, unanga balasu 'o 'aro'o jama'ata ma bi-biri'i, la ananga gena-ge 'aḏi manyiata ra Ma Jou'ongu Madutu, re si'ese reo goroho tai lese, 'aḏi pake Ma Jou 'ai lomanga.

¹⁵ Na'o manga nyiata 'i supu tamanga 'akala re sinyingara remanga ngo-ngaku mode-mode'e, Ma Jou'ongu Madutu ḏuanga i'a si-la ngowa'a siḏi gena-ge. Re na'o ngowa'a gena-ge 'o 'a'a ḏosa, Ma Jou'ongu Madutu ḏuanga i'a singi-ngiranga 'ai ḏosa-ḏosa gena-ge.

¹⁶ Sababu gena-ge, ngini balasu ni ma'u mangaku ninga ḏosa matengo re matengo re ngini ni ma'u manyiata matengo re matengo, la ni la toma si-siḏi mo-moini. Ngowa'a loasa re banari manga nyiata rema kuasa lai lamo'o:

¹⁷ Nabi Elia unanga ḏi'i manusia ma tero ngene. Unanga 'o manyiata rai ngo-ngaku mode-mode'e, la besa'a sapolo awa. Dadi besa'a 'i sapolo ua ma di'ara musungu ro'ange re ma jule.

¹⁸ Togumu i'a, unanga dadunu manyiata ḏi'i singadolo besa'a 'i sapolo re tana'a 'i sisupu ma hasili.

¹⁹ 'Ari ioronongoḏu ngo-ngaku rimoi! Na'o matengo i'a taninga sigolona ro mete'e riwara Ma Jou'ongu Madutu 'ai do-doto'o re ngowa'a lelegu 'u gasa unanga gena-ge 'o maḏibo toma ngo'omo boloto,

²⁰ 'elingi nena-ne: ngowa'a lelegu gena-ge ro sisalamata ngowa'a baraḏosa 'ai nyawa toma sengene ino re Ma Jou'ongu Madutu ro singi-ngiranga 'ai ḏosa lai repe.