Yakobus 4 - Jaji ma Su-sungi

Ma ḏagilomu reo dungia

¹ Ma sababu 'oru ngini ma'u rubutu re ma'u saturu matengo re matengo?! Ngini ni ma'u rubutu re ni ma'u saturu matengo re matengo ma tero sa'olo parangi, sababu ngini mau pa'i ni mete'e ḇato dungia ma nyafusu!

² Ngini ni nyafusu 'ori i'a rimoi i'a mada'a ngini ni sanga yoḏu'u. Ḏua ngini ni madaga'a 'oru ḇato di'a ni sanga 'oru ga'a ni nyafusu singadolo ni mau sisengene ngowa'a. Dadi 'i baolo taninga 'akala re sinyingara ma dara ga'a 'i sihamu ngowa'a, singadolo ni ma'u rubutu re ma'u saturu. Mada'a ngini ni sanga ua 'ori i'a gena-ge, sababu ni golo'o ra Ma Jou'ongu Madutu ua.

³ Kalaha ngini ni golo'o ra Ma Jou'ongu Madutu, ni sanga ua, sababu ninga go-golo'o ma maksudu 'i cira: Ngini ni golo'o 'ori i'a pa'i di'a sisanangi ninga diri masiretene!

⁴ Ngini ni mete'e ua Ma Jou'ongu Madutu 'ai bererongo re 'Ai do-doto'o ma tero sa'olo we-were'a matengo rami nau'u mo ma'u pake re na-nau'u lelegu! Ngini ni waro bolo ua, na'o ngini ni mau mete'e dungia ma nyafusu ngini ni maḏagilomu reo dungia re ngini ni malawana ra Ma Jou'ongu Madutu ḏi'i! Sababu gena-ge, 'a guna ḇato 'o dadi dungia ma ḏagilomu, unanga gena-ge 'o dadi Ma Jou'ongu Madutu 'ai lawana.

⁵ Toma Boku 'Ofi-'Ofi ma dara 'age demo-demo ma betongo so'o ne: “Ma Jou'ongu Madutu 'o pula'a roh di'a tegoro tananga diri, mada'a 'i nyanyaḏi mete'e nyafusu ma jira.” Ngini ni fikiri demo-demo gena-ge 'i rapu?!

⁶ Kalaha so'o gena, Ma Jou'ongu Madutu 'ai mura re dadalara lebe te'e reo ngene nanga nyawa ma nyafusu. Sababu gena-ge toma Boku 'Ofi-'Ofi ma dara 'i silefo, “Ma Jou'ongu Madutu 'o dola'aku ngowa'a momole, mada'a ngowa'a ga'a siholo manga 'akala re sinyingara, Ma Jou'ongu Madutu 'o pula'a 'ai mura re dadalara.”

⁷ Sababu gena-ge, ngini balasu ni siholo ninga 'akala re sinyingara ra Ma Jou'ongu Madutu, re ni lawana 'Iblisi ma bo-baja, la enanga 'i maki-kiḏanga ra ngini.

⁸ Ni maco-cori ra Ma Jou'ongu Madutu re Unanga ḏuanga i'a 'o maco-cori ra ngini ḏi'i. Ngini ngowa'a baraḏosa ga'a ninga 'akala re sinyingara ri sa-salanga, matogumu ni madaga'a 'ori i'a ma jira re ni siboloto ninga 'akala re sinyingara.

⁹ Ngini mode-mode'e balasu ni rerese ma gaḏi, sababu ninga ḏosa; nyelo'o singali reo 'aḏi, re 'akala re sinyingara ma roanga singali reo 'akala re sinyingara ma kangela sababu ninga ḏosa.

¹⁰ Ngini balasu ni masiholo tala ninga diri ra Ma Jou'ongu Madutu 'ai biono, kara Ma Jou'ongu Madutu ḏuanga i'a 'o sihie ninga diri.

Sijira ngowa'a manga lomanga awa

¹¹ Ioronongoḏu ngo-ngaku rimoi, awa ngini ni ma'u jajaha demo bolo ni ma'u sijuruhakimi matengo re matengo. Ngowa'a ga'a 'o 'a'a so'o gena-ge tai ioronongoḏu ngo-ngaku rimoi, unanga 'o mete'e ua Ma Jou'ongu Madutu 'ai hukumu, re 'o dadi juruhakimi masiretene ra Ma Jou'ongu Madutu 'ai hukumu.

¹² Momongolo ua pa'i matengo ḇato rai haku 'o pula'a hukumu re 'o sijuruhakimi manusia. Unanga gena-ge Ma Jou'ongu Madutu ga'a 'Ai kuasa ma pari cua di'a 'O sisalamata re 'O singi-ngiranga manusia. Dadi ngini gena-ge 'a guna, singadolo ni ma'u sijuruhakimi matengo re matengo?!

Awa ni dadi momole

¹³ Hei ngini ga'a ni kanau, “Nange-ne bolo da-daini, ngomi tagi toma limau rimoi i'a re mi tegoro ma di'ara musungu rimoi di'a mi madike, la mi sanga pipisi repe.” Ngini gena-ge ngowa'a momole, ni 'isene re ni 'eli-'elingi 'ari bererongo nena-ne:

¹⁴ 'Oru ga'a 'i dadi taninga 'ahu da-daini bolo ḏiḏingi, ngini masiretene na waro ua. Ngini ma tero sa'olo loworo pa'i ngasamoi ḇato; na oḏi'i togumu i'a ri iranga.

¹⁵ Ngini gena-ge balasu ni kanau so'o ne: “Na'o Ma Jou'ongu Madutu 'o nyengara pula'a mi 'ahu moju, ngomi nyengara mi madaga'a 'oru ḇato.”

¹⁶ Mada'a nange-ne ngini ni matoro re momole; 'ahu ma duhu so'o gena-ge 'i rapu.

¹⁷ Sababu gena-ge, matengo i'a ga'a 'a waro 'ori i'a ma la-la 'oru ḇato balasu 'a si'a'a mada'a 'a si'a'a ua, unanga gena-ge 'o madaga'a ḏosa.