Yakobus 3 - Jaji ma Su-sungi

Manusia manga yai'i

¹ 'Ari ioronongoḏu ngo-ngaku rimoi! Awa ngini repe ni mau dadi guru, sababu Ma Jou'ongu Madutu ḏuanga i'a 'o sijuruhakimi ngene guru-guru lebe tubuso re ngowa'a ma lelegu.

² Ngene mo-moini soi rai o'o i'a repe wo 'a'a ḏosa. Mada'a ngowa'a ga'a 'a'a ḏosa ua remanga demo re ganau, ananga gena-ge ngowa'a tiai, nga'unu 'aḏi kawasa lese rimoi mo-moini.

³ Na'o wo sigae ḇesi toma jarana ma madanga, la enanga nga'unu wa sinyanyasele mete'e nanga mau; ngene nga'unu wa sinyanyasele jarana ma lese rimoi ra-rarumu

⁴ Bolo 'ade-'ade rimoi sa'olo kapala lai lamo'o pake sidete. Kalaha kapala gena-ge lai lamo'o reo karawiana ya wusu lai siḏi mada'a nga'unu ya sinyanyasele rema kapala ma nyanyasele lai ceka'a, mete'e ngowa'a gasa-gasa kapala 'ai mau.

⁵ So'o gena-ge ḏi'i nanga yai'i. Kalaha enanga lai ceka'a, mada'a 'i matoro masala mangale 'ori i'a la-lamo'o. Na oḏi'i ḇato bangana ma daeraha ma lamo'o sa'olo ḇato; mada'a rema u'u kalaha pa'i ceka'a 'ua, nyengara ya ro'u simoini bangana gena-ge.

⁶ Yai'i ma tero sa'olo u'u gena-ge. Enanga 'i tegoro tananga lese sa'olo kajahatana ma cimi re nga'unu sijira nanga lese rimoi. Ganau toma yai'i gena-ge ma tero sa'olo u'u 'i sapolo toma naraka ino, enanga 'i ro'u nanga 'ahu simoini.

⁷ 'Ua re 'au wali, manusia nga'unu raḏi singaro do-dadi mo-moini: haiwani nga-ngabala, namo diwanga, haiwani tare-tare re haiwani toma ngoloto. Mo-moini gena-ge, manusia 'aḏi singaro ḏua.

⁸ Mada'a manusia matengo i'a mai ua nga'unu 'o singaro 'ai yai'i! Yai'i gena-ge soi rai o'o i'a 'i gasa ngowa'a toma jira re matengo i'a mai ua nga'unu 'o kuasa enanga gena-ge. Enanga gena-ge 'i romanga reo racimi ga'a nga'unu sisengene ngowa'a.

⁹ Ngene wa pake nanga yai'i di'a puji re silamo'o Ma Jou'ongu Madutu nanga Ḇaḇa, mada'a 'age ḏi'i ngene wa pake yai'i gena-ge di'a sosowini ngowa-ngowa'a ga'a Ma Jou'ongu Madutu 'o 'a'a manusia, mete'e 'Ai rupa re jamani.

¹⁰ Toma madanga rimoi ḇato 'i supu demo ga'a sibarakati ngowa'a re 'i supu demo ga'a sosowini ngowa'a ḏi'i. 'Ari ioronongoḏu ngo-ngaku rimoi, ngene balasu 'a'a so'o gena awa.

¹¹ Sanga ua, 'age ḇanyo ma la'o rimoi ḇato 'i waloro ḇanyo biasa, re ḇanyo ma maḏi

¹² 'Ari ioronongoḏu ngo-ngaku rimoi, sanga ua ate 'ara ḏu moi ma sowo'o ate zaitun, re 'o 'anggur rera moi ma sowo'o ate 'ara. So'o gena ḏi'i, sanga ua ḇanyo ma la'o rimoi ḇato 'i waloro ḇanyo ra-rasa re ḇanyo biasa.

Soro'unu da'u tala

¹³ Na'o 'age rema ngowa'a matengo i'a taninga sigolona rai wo-waro re 'akala soro'unu, unanga gena-ge balasu 'o sijumu 'ai de'oso re ḏegoro la-la mete'e 'ai 'akala soro'unu re 'o 'ahu maholo tala.

¹⁴ Mada'a na'o ra ngini ninga 'ahu 'age rema 'akala re sinyingara go-goḏi, sihamu ngowa'a, re 'elingi pa'i 'ahu masiretene; awa ni matoro aje ninga 'akala 'i soro'unu. Sababu na'o so'o gena, ngini na sice-celolo habari banari ra Ma Jou'ongu Madutu ino 'i dadi habari sa-sakala.

¹⁵ 'Akala soro'unu so'o gena-ge, ma 'asala da'u soroga tala ua, mada'a ma 'asala toma 'Iblisi ino re ngowa'a dungia ga'a kama Ngagara 'Ofi-'Ofi ua. Pa'i ananga 'aḏi pake 'akala soro'unu gena-ge.

¹⁶ Na'o 'age rema 'akala re sinyingara go-goḏi, sihamu ngowa'a re 'elingi pa'i 'ahu masiretene; ḏua 'age rema ngowa'a 'aḏi ma'u rubutu re 'aḏi ma'u saturu matengo re matengo ma tero sa'olo parangi re 'aḏi madaga'a 'ori i'a ma jira ma duhu ma repe.

¹⁷ Siḏibo ḏi'i, ngowa'a ga'a 'ai 'akala soro'unu ma 'asala da'u ra Ma Jou'ongu Madutu tala, ma mulaingi 'ai 'ahu 'i 'ofi-'ofi, unanga gena-ge 'o nyanyaḏi dame, 'akala re sinyingara mereoso, nga'unu 'o dawongo ngowa'a lelegu manga 'akala ma sanga, re 'o sijumu 'ai 'akala re sinyingara ma la-la toma ngowa'a lelegu singadolo 'ai ga'a mo-moini rousu madutu. Re Unanga ḏi'i pa'ala kaci moi ua re 'ai demo re ganau 'i ma tero tai de'oso re ḏegoro

¹⁸ Ngowa'a lelegu ḏuanga i'a mete'e ngowa'a ga'a nyanyaḏi dame singadolo ngowa'a gena-ge 'aḏi 'a'a 'ori i'a ma la-la ḏi'i; ma tero sa'olo wakutu ngowa'a guḏa 'o siare gisisi dame, ma sowo'o dame!