Yakobus 2 - Jaji ma Su-sungi

Ḇangata toma ngowa'a ga'a 'aḏi pa'ala kaci moi

¹ 'Ari ioronongoḏu ngo-ngaku rimoi, sababu ngini rini ngaku ra Yesus Kristus nanga Jou, Unanga ga'a tegoro toma mulia ma pari cua, awa ngini na'u siwola-wola ngowa-ngowa'a mete'e pa'i manga rupa re jamani, la awa ni pa'ala kaci moi

² Si'ade-'ade i'a, 'age rema ngowa'a matengo ngowa'a rema-enanga 'o pake 'ali-'ali guraci, re 'ai pakeanga lai rousu, 'o sapolo taninga lo-lomu. Ḏua sapolo ḏi'i matengo ngowa'a ma dinga'unu ua 'o mapake pakeanga 'aci-'acingi.

³ Ḏua, ngini ni lebe silamo'o unanga ga'a 'o pake pakeanga rousu re ngini ni kanau ra unanga, “Tuanga, no tegoro 'ane toma kurusi ro-rousu.” Mada'a toma ngowa'a ma dinga'unu ua ngini ni kanau, “Made-de'oso da'a toma wala ma gagoro, bolo no tegoro 'ane toma tana'a co-cori 'ari rou.”

⁴ Na'o ninga ga'a so'o gena-ge, ngini ni pa'ala kaci moi re ni siwola-wola ananga, ni pake ninga fikirana ma jira.

⁵ 'Ari ioronongoḏu ngo-ngaku rimoi ga'a ngoi tini dadalara. 'Elingi, ngowa'a ma dinga'unu ua toma dungia, Ma Jou'ongu Madutu ya'u cumutu dadi ngowa'a rema-enanga toma ngo-ngaku ma dara. Ngowa'a gena-ge, ḏuanga i'a 'aḏi sanga bara'utungu ra Ma Jou'ongu Madutu 'ai Pareta ma tero sa'olo 'O sijaji pasala ḏua ra guna ḇato 'aḏi dadalara Unanga.

⁶ Mada'a na'o ngini ni kanau so'o 'au nange-ge, ngini ni si'u'ua ngowa'a ma dinga'unu ua. Momongolo ua 'o ngowa'a rema-enanga 'aḏi sijo'u-jo'u ngini re 'aḏi gasa ngini toma mahkamah!

⁷ Sidogo ḏi'i, ngowa'a rema-enanga gena-ge 'aḏi je-jengere Ma Jou Yesus 'ai lomanga ga'a ngini ni marimoi re nu silamo'o.

⁸ Ngini 'a'a tero-tero na'o ngini ni mete'e mode-mode'e Ma Jou'ongu Madutu, nanga 'Olana, 'Ai hukumu ga'a 'i silefo toma Boku 'Ofi-'Ofi ma betongo: “Dadalara matengo re matengo ma tero sa'olo dadalara ninga diri masiretene.”

⁹ Mada'a na'o ngini ni siwola-wola ngowa'a mete'e pa'i manga rupa re jamani, ngini madiga'a ḏosa. Re mete'e Ma Jou'ongu Madutu 'ai Hukumu, ngini ni sito'u-to'u Unanga 'ai hukumu.

¹⁰ 'A guna ḇato ya sito'u-to'u Ma Jou'ongu Madutu 'ai hukumu rimoi ḇato, gena-ge ma tero sa'olo ya sito'u-to'u 'Ai hukumu mo-moini.

¹¹ Sababu Unanga ga'a 'o kanau, “Tinikai awa,” Unanga ḏi'i 'o kanau, “Sisengene ngowa'a awa.” Dadi kalaha ngini ni tinikai ua, mada'a ni sisengene ngowa'a, ngini na sito'u-to'u ḏi'i Unanga 'ai hukumu.

¹² Dadi ngini ninga demo re ganau balasu 'i ma tero reninga de'oso re ḏegoro sa'olo ngowa'a ga'a ḏuanga i'a Ma Jou'ongu Madutu ya'u sijuruhakimi mete'e 'Ai hukumu ga'a ri sibebasa ngini toma 'Iblisi ma pareta.

¹³ Ma Jou'ongu Madutu ḏuanga i'a 'o sijuruhakimi kai 'akala re sinyingara ma la-la ua toma ngowa'a ga'a 'aḏi sijumu ua 'akala re sinyingara ma la-la, mada'a 'aḏi sijuruhakimi ngowa'a lelegu. Mada'a na'o ngowa'a ngaku Yesus 'aḏi sijumu 'akala re sinyingara ma la-la toma ngowa-ngowa'a, ḏuanga i'a Ma Jou'ongu Madutu 'o sijumu 'ai 'akala re sinyingara ma la-la toma ngowa'a gena-ge wakutu Unanga 'o sijuruhakimi ngowa'a mo-moini.

Ngo-ngaku re de'oso re ḏegoro

¹⁴ 'Ari ioronongoḏu ngo-ngaku rimoi, ma 'utungu 'oru na'o unanga 'o kanau, “Ngoi to ngaku Yesus Kristus ḏua,” mada'a 'a sijumu ua 'ai ngo-ngaku gena-ge tai de'oso re ḏegoro? Sanga ua, ngo-ngaku so'o gena-ge nyengara sisalamata unanga!

¹⁵ Si'ade-'ade i'a matengo tananga sigolona, na-nau'u bolo we-were'a, 'aḏi paralu pakeanga re manga ngo-ngoromo wange moi-wange moi 'i ngadolo ua,

¹⁶ mada'a ngini pa'i ni kanau toma ngowa'a gena-ge, “Ma Jou'ongu Madutu 'age ra ngana, ngoi to nganono ngana ḏuanga i'a no basono 'alo ua re 'ani ngo-ngoromo wange moi-wange moi 'i ngadolo.” Ma 'utungu 'oru ra ninga ioronongoḏu ngo-ngaku rimoi gena-ge na'o ngini ni kanau pa'i so'o gena-ge, mada'a ni pula'a 'oru rimoi mai ua!

¹⁷ So'o gena-ge ḏi'i reo ngo-ngaku! Na'o na sijumu ua ninga ngo-ngaku taninga de'oso re ḏegoro, ngo-ngaku gena-ge ma faeda 'i cua.

¹⁸ Ḏa ngowa'a matengo i'a 'o kanau, “ 'Age ngowa'a 'aḏi masidiriwa pa'i tamanga ngo-ngaku ḇato, ngowa'a lelegu 'aḏi masidiriwa pa'i tamanga ga'a ḇato.” Ngoi ta sangoro, “Sijumu ino ra ngoi, ma duhu sa'olo ngowa'a remanga ngo-ngaku mada'a manga ga'a 'i mete'e manga ngo-ngaku ua. Re ngoi ḏuanga i'a ta sijumu 'ari ga'a ra ngini ga'a 'i mete'e 'ari ngo-ngaku.”

¹⁹ Ngini ni ngaku mangale Ma Jou'ongu Madutu pa'i matengo ḇato. Ya tero mode'e, mada'a roh-roh ma jira mai ngaku ma tero ḏi'i re enanga 'i mojongo singadolo 'i terewete!

²⁰ Ngini haga madutu! Ngini ni paralu bukiti 'oru mangale ma faeda 'i cua, na'o ninga ga'a 'i mete'e ua ninga ngo-ngaku?

²¹ Oḏi'i ḇato 'a Abraham, nanga ete re dotumu. Unanga Ma Jou'ongu Madutu 'u dawongo sa'olo ngowa'a loasa re banari wakutu unanga 'a sipula'a 'ai ngowa'a nau'u 'a Isak di'a 'ai jou-jou ra Ma Jou'ongu Madutu toma jou-jou ma ngi'i ma re'u.

²² Gena-ge 'i sitarangi mangale 'ai ngo-ngaku 'i waiti tai ga'a singadolo 'ai ngo-ngaku 'i dadi ti-tiai.

²³ Gena-ge 'i ma tero sa'olo 'i silefo toma Boku 'Ofi-'Ofi, “Abraham 'o ngaku Ma Jou'ongu Madutu. Re sababu 'ai ngo-ngaku gena-ge, Ma Jou'ongu Madutu 'u dawongo unanga sa'olo ngowa'a loasa re banari Tai momina.” Sababu gena-ge, Abraham si'aro'o, “Ma Jou'ongu Madutu 'ai ḏagilomu”.

²⁴ Gena-ge 'i tarangi ḏua ra ngene mangale Ma Jou'ongu Madutu 'o dawongo ngowa'a sa'olo ngowa'a loasa re banari, sababu manga ga'a la-la re pa'i manga ngo-ngaku ḇato ua.

²⁵ Oḏi'i ḏi'i ngo Rahab, we-were'a su-sudala ga'a mo tegoro toma limau Yeriko. Ma Jou'ongu Madutu 'o dawongo munanga sa'olo ngowa'a loasa re banari, sababu 'ami ga'a la-la. Munanga mo dawongo ngowa'a tamo-tamolo re munanga mo gogono ananga tami wala re mo sijumu manga ngo'omo lelegu di'a 'aḏi maḏibo.

²⁶ Na, ma tero sa'olo nanga lese kama ngagara ua, lese gena-ge ri sengene. So'o gena ḏi'i, ngo-ngaku kama ga'a la-la ua, ngo-ngaku gena-ge ri sengene ḏi'i re ma faeda 'i cua.