Titus 2 - Jaji ma Su-sungi

Do-doto'o banari ma dasara

¹ Mada'a Titus, ngana balasu na'u sidoto'o 'oru ḇato 'i mete'e do-doto'o ma banari.

² Na'u ajele mangale na-nau'u ga'a raḏi piri'i, ananga balasu 'aḏi nga'unu manahana manga nyafusu ma jira, manga 'ahu soro'unu singadolo ngowa'a ya'u silamo'o. Ananga ḏi'i balasu 'aḏi macako'o namo-namoto do-doto'o banari ra Ma Jou'ongu Madutu ino, 'aḏi dadalara ngowa'a lelegu remanga 'akala re sinyingara mode-mode'e re na'o 'aḏi sanga sikisa, ananga gena-ge manga ngo-ngaku 'i elala ua.

³ So'o gena ḏi'i, ngana na'u ajele ma ngale we-were'a ga'a raḏi piri'i mangale manga de'oso re ḏegoro balasu 'i patasa sa'olo Ma Jou'ongu Madutu 'ai ngowa-ngowa'a; 'aḏi jajaha demo awa, 'aḏi sikanau ngowa'a lelegu awa re 'aḏi ma'eto-'etolo awa re ananga balasu 'aḏi sidoto'o ngowa'a 'ori i'a ma la-la.

^4-5 Na'o manga de'oso re ḏegoro so'o gena-ge, ananga nga'unu sijumu we-were'a rarama sie ma duhu sa'olo 'aḏi dadalara manga nau'u re manga ngowa'a, nga'unu 'aḏi manahana manga nyafusu ma jira, 'aḏi 'ahu 'ofi-'ofi, 'aḏi dadi ngina la-la toma ngitu re ngale, re 'aḏi sijumu 'akala re sinyingara rousu re 'aḏi 'isene manga nau'u. Na'o ya si'a'a so'o gena, matengo i'a mai ua nga'unu 'aḏi sije-jengere Habari Roanga ra Ma Jou'ongu Madutu ino.

^6-7 So'o gena ḏi'i na'u ajele ma ngale na-nau'u rarama sie, la ananga nga'unu manahana manga nyafusu ma jira. Toma 'oru ḇato, ngana balasu no sijumu ngo'omo ma la-la tani de'oso re ḏegoro ma dara. Ngana balasu 'ani 'akala re sinyingara 'ofi-'ofi re 'ani 'akala re sinyingara mode-mode'e na'o no doto'o ngowa'a.

⁸ Ngana balasu doto'o 'ori i'a ga'a ma banari ra ananga dadi se-seḏu'u yoḏu'u, la ngowa'a 'aḏi lawana ngana dadi mara'a, sababu rimoi i'a mai ua sanga ngene nanga sala.

⁹ Ngana no doto'o budaka-budaka, ananga balasu 'aḏi mete'e manga tuanga 'ai mau re toma 'oru ḇato 'aḏi makutale sisanangi tuanga 'ai 'akala re sinyingara, re awa 'aḏi sango-sangoro

¹⁰ bolo 'aḏi to-tori'i. Siḏibo ḏi'i, ananga balasu 'aḏi sijumu manga 'ahu la-la re rousu tamanga de'oso re ḏegoro ma dara, la ananga sanga ngaku tamanga tuanga. Na'o manga de'oso re ḏegoro ma duhu so'o gena, si'a'a ngowa'a mau 'aḏi 'isene do-doto'o ra Ma Jou'ongu Madutu ino, ngene nanga Salamata ma Cimi.

¹¹ Ngana balasu no doto'o so'o gena-ge, sababu Ma Jou'ongu Madutu 'o sijumu ḏua 'Ai mura re dadalara, la 'A sisalamata ngowa'a mo-moini.

¹² Sababu 'Ai mura re dadalara, Ma Jou'ongu Madutu 'o sidoto'o ngene, la awa ngene nanga 'ahu 'i lawana Unanga 'ai mau, re wo mete'e awa dungia ma nyafusu. Mada'a siḏibo ḏi'i, ngene balasu wo 'ahu toma dungia nena-ne sa'olo ngowa'a ga'a 'aḏi nga'unu manahana nanga nyafusu ma jira renanga 'ahu loasa re banari re nanga de'oso re ḏegoro 'i sisanangi Ma Jou'ongu Madutu 'ai 'akala re sinyingara.

¹³ Ngene balasu wo 'ahu so'o gena, sababu wo totoma re wa ngano-nganono tau-taunu di'a ma 'orasa barakati enanga 'i ngadolo. Toma wangere gena-ge, ngowa'a mo-moini ḏuanga i'a 'aḏi oḏi'i Yesus Kristus, nanga Salamata ma Cimi Rai kabasarana, re Ma Jou'ongu Madutu ga'a 'Ai kuasa ma pari cua.

¹⁴ Yesus Kristus 'a sipula'a 'ai 'ahu 'i dadi jou-jou di'a ngene, la 'O siwoi'i ngene toma kuasa ma jira re 'O si'ofi tananga ḏosa-ḏosa, la sidadi ngene wo dadi Unanga 'ai 'umata ga'a wo cufala madaga'a 'ori i'a ma la-la.

¹⁵ Mo-moini gena-ge, ngana na'u doto'o re na'u babata ananga re na'u ḇangata ngowa'a ga'a ya mete'e ua. Ngana no kuasa di'a si'a'a so'o gena-ge dadi ngana balasu no simaha awa matengo i'a 'o sito-to'u ngana.