Titus 1 - Jaji ma Su-sungi

¹ 'Ari ngowa'a 'a Titus, Ngoi Paulus, Yesus Kristus 'ai so-soma'a re ngoi ta Ma Jou'ongu Madutu ma tero sa'olo 'Ai budaka, to lefo surata ra ngana. Ngoi to sanga ju-jumutu di'a to riono Ma Jou'ongu Madutu 'ai 'umata ga'a Unanga 'o cumutu ḏua, la to site'e manga ngo-ngaku. Ngoi ḏi'i balasu ta'u sioḏi-oḏi'i ananga, la 'aḏi nana'o do-doto'o banari 'i mete'e Ma Jou'ongu Madutu 'ai 'akala ma mau, la manga 'ahu 'i dadi loasa re banari.

² Do-doto'o gena-ge 'i site'e ananga manga ngo-nganono mangale ḏuanga i'a 'aḏi sanga 'ahu kasingado-ngadolo i'a. Manusia wo dadi nyangu, 'ahu kasingado-ngadolo i'a gena-ge Ma Jou'ongu Madutu 'a sijaji pasala ḏua — re sanga ua Ma Jou'ongu Madutu 'o sa-sakala.

³ Ma 'orasa 'i tero-tero, Ma Jou'ongu Madutu 'a siwaiti 'Ai habari. Re Ma Jou'ongu Madutu, nanga Salamata ma Cimi, 'i mete'e 'ai bererongo 'O siwatasa ngoi di'a ngoi ta singadolo 'Ai habari gena-ge.

⁴ Titus, ngana ma tero sa'olo 'ari ngowa'a nau'u, sababu ngana re ngoi nanga ngo-ngaku 'i ma tero ra Kristus. Ngoi to golo'o ra Ma Jou'ongu Madutu nanga Ḇaḇa, re Yesus Kristus nanga Salamata ma Cimi di'a 'aḏi pula'a mura re dadalara re pula'a ḏi'i dame tau-taunu ra ngana.

Titus 'ai munara toma pulo Kreta

⁵ Ngoi tini sisoi'i tala toma pulo Kreta, la ngana na 'urusu 'ori i'a rana ga'a wa 'aturu nyangu: Ngana balasu no sitede jama'ata manga bi-biri'i toma limau mo-moini toma pulo Kreta no mete'e 'ari bererongo nena-ne:

⁶ Matengo 'o dadi jama'ata ma bi-biri'i, unanga gena-ge balasu 'ai de'oso re ḏegoro kama rapu ua, 'ai were'a pa'i matengo ḇato, 'ai ngowa'a balasu ngowa'a ngaku Yesus, re awa 'ai ngowa'a si'aro'o sa'olo ngowa'a ga'a 'isene bererongo ua re wa'u 'aturu yoḏu'u.

⁷ Jama'ata ma bi-biri'i ananga gena-ge ga'a 'aḏi 'urusu Ma Jou'ongu Madutu 'ai munara. Dadi ananga balasu manga de'oso re ḏegoro kamanga rapu ua, 'aḏi momole ua, 'aḏi ruta caiti yoḏu'u, 'aḏi ka'e 'anggur 'i pai'i yoḏu'u, re 'aḏi nyanyaḏi ua ma'u tutu'u bolo manga 'akala re sinyingara ma dara mafikiri pa'i pipisi.

⁸ Siḏibo ḏi'i, na'o ioronongoḏu ngo-ngaku rimoi 'aḏi sapolo tamanga wala, ananga balasu 'aḏi dawongo remanga 'akala re sinyingara sa-sanangi, 'aḏi nyanyaḏi 'a'a 'ori i'a ma la-la, manga 'ahu 'i loasa re banari re ananga balasu 'aḏi nga'unu manahana manga diri re 'aḏi nga'unu manahana manga nyafusu ma jira.

⁹ Ananga balasu 'aḏi macako'o namo-namoto toma do-doto'o ga'a ngene wa ngaku ma tero sa'olo do-doto'o sidoto'o ḏua ra ngana, la ananga nga'unu 'aḏi babata re 'aḏi sidoto'o do-doto'o banari toma ngowa'a ngaku Yesus. Na'o ngowa'a ya'u lawana, ananga nga'unu ya sijumu ananga manga sala.

¹⁰ Sababu 'age manga repe ga'a 'aḏi lawana ngini, ngowa'a ga'a 'aḏi mete'e Yahudi ma 'atoranga, ma la-lamo'o i'a ananga ga'a 'aḏi mete'e suna ma 'atoranga; ananga 'aḏi mafeto kama faeda ua pa'i sihaga ngowa'a lelegu.

¹¹ Ngowa'a so'o gena-ge pa'i simaha awa ananga 'aḏi doto'o, sababu pa'i sihaga ngowa'a repe manga ngitu re ngale remanga do-doto'o 'i banari ua, singadolo ngitu re ngale 'aḏi mete'e Yesus riwara. Ananga ya si'a'a so'o gena, sababu pa'i disa 'utungu mada'a gena-ge 'i patasa ua.

¹² 'I dadi ḏua ra ananga masiretene manga nabi matengo, 'ai 'asala toma pulo Kreta, unanga 'o kanau, “Ngowa-ngowa'a Kreta, ananga ngowa'a ga'a 'aḏi tukanga sa-sakala re manga 'ahu ma tero sa'olo haiwani nga-ngabala ga'a da-danata re 'aḏi pamalasa.”

¹³ 'Oru ga'a nabi gena-ge 'o siajele 'i sala ua. Sababu gena-ge, ngana balasu na'u ḇangata mode-mode'e, la ananga 'aḏi macako'o ḇato toma do-doto'o banari

¹⁴ re 'aḏi 'isene ḇusuru ngowa'a Yahudi manga jarita sa-sakala, bolo 'atoranga ga'a manusia ya pake di'a 'aḏi itomo do-doto'o banari.

¹⁵ 'Ori i'a mo-moini 'i 'ofi-'ofi re 'ori i'a rimoi mai ua 'i wosono ua di'a ngowa'a ga'a manga 'akala re sinyingara ma kanau 'i 'ofi-'ofi ra Ma Jou'ongu Madutu 'ai momina. Mada'a ngowa'a ga'a manga fikirana 'i cira re kamanga ngo-ngaku ua, 'ori i'a rimoi i'a mai ua 'i 'ofi-'ofi re 'ori i'a ma repe 'i wosono ra ananga, sababu ananga manga 'akala re sinyingara ma kanau ri faja singadolo 'aḏi basono ḏosa riwara.

¹⁶ Ananga gena-ge 'aḏi kanau 'aḏi nana'o Ma Jou'ongu Madutu. Momongolo ua, tamanga de'oso re ḏegoro 'aḏi masoloto Unanga: Ananga 'aḏi 'a'a 'ori i'a ga'a Ma Jou'ongu Madutu 'a emono, 'aḏi mete'e ua Ma Jou'ongu Madutu 'ai 'akala ma mau re ya nga'unu ua 'aḏi 'a'a 'ori i'a la-la.