Tingoýi 9 - Jaji ma Su-sungi

¹ Gena ḏua, mala'ekata ma nyo-nyoimi romotoa 'o wusu ma terompet re ngoi to oḏi'i mumuḏungu ngai moi 'i eta'a da'u diwanga tala. Ḏua mumuḏungu gena-ge 'i sanga kuci di'a ngabanga maut ma da-damunu.

² Mumuḏungu ya welanga ngabanga maut gena-ge ma da-damunu. Ḏua loworo 'i supu toma ngabanga gena-ge sa'olo 'i supu toma ḏiḏiana lamo'o. Dadi wangere ma la'o 'i taḏusu singadolo 'i hafu-hafu sababu loworo gena-ge.

³ Gena ḏua, toma loworo gena-ge ma dara 'i supu sasaba-sasaba ga'a 'i 'uci toma dungia. Sasaba-sasaba gena-ge 'age 'i sanga kuasa ma bisa ma tero sa'olo 'a'atama.

⁴ Sasaba gena-ge simaha ua 'i sijira ate re rurubu bolo joro-joro. Enanga gena-ge pa'i sisikisa ngowa'a ga'a tamanga memese kama segele ua ra Ma Jou'ongu Madutu ino.

⁵ Sasaba-sasaba gena-ge simaha ua 'i sisengene ngowa'a; pa'i sisikisa ḇato ma di'ara ngara romotoa. Sasaba gena-ge 'i goḏi ngowa'a, re ma bisa ma tero sa'olo a'atama ya'u goḏi.

⁶ Ma di'ara ngara romotoa ma dara, ngowa-ngowa'a 'aḏi sanga sikisa gena-ge singadolo 'aḏi golo'o sengene. Mada'a sababu manga go-golo'o gena-ge 'i mete'e ua Ma Jou'ongu Madutu 'ai 'akala ma mau, ananga 'aḏi sengene yoḏu'u.

⁷ Sasaba gena-ge 'i matuhu sa'olo jarana ḏu-ḏuanga ḏua 'i tagi parangi. Toma sae'e 'age sa'olo lastari guraci, enanga ma biono sa'olo manusia,

⁸ ma utu sa'olo we-were'a manga utu, re ma ngiḏi sa'olo singa ma ngiḏi.

⁹ Toma katere sipata reo 'ori i'a ga'a sa'olo baju ḇesi, ma kalatu'u ma rurusu sa'olo jarana rema goroba ma repe ga'a 'i tagi parangi.

¹⁰ Ma di'imi re ma bisa sa'olo 'a'atama. Toma di'imi gena-ge 'age rema bisa sanga de-de'e di'a sisikisa manusia ma di'ara ngara romotoa.

¹¹ Enanga gena-ge rema 'olana ga'a 'a parenta. 'Olana gena-ge mala'ekata ga'a gu-gu'u kuci di'a ngabanga maut ma da-damunu. Ma lomanga toma demo 'Ibrani Abadon, toma demo Yunani Apolion. (enanga ma ngale: “Ngowa'a ga'a sijira”)

¹² Bahala ma mulaingi 'i palisi'i ḏua. Togumu i'a 'age bahala fara ḏiḏi moju enanga 'i sapolo.

¹³ Gena ḏua, mala'ekata ma nyo-nyoimi rarama 'o wusu terompet, kara ngoi to 'isene iḏingi 'i supu toma meja guraci ma ḇuḇuku rata ra Ma Jou'ongu Madutu 'ai biono.

¹⁴ Ma iḏingi gena-ge 'i kanau i'a toma mala'ekata ma nyo-nyoimi rarama, “Palasara mala'ekata rata ga'a Ma Jou'ongu Madutu 'o sipiri'u i'a toma ḇanyo Efrat!”

¹⁵ Mala'ekata ma nyo-nyoimi rarama ya palasara mala'ekata rata gena-ge ma bi-biri'u. Ananga gena-ge 'aḏi ḏu-ḏuanga ḏua re 'aḏi totoma jam, wangere, ngara, re musungu ga'a Ma Jou'ongu Madutu ro sitantukanga di'a 'aḏi sisengene manusia ma balangu rimoi toma balangu ro'ange ma dara.

¹⁶ Ḏua, ngoi to 'isene iḏingi ma betongo so'o ne: “ 'Age sordado juta latu ḏiḏi 'aḏi palene jarana.”

¹⁷ Tari tingoḏi'i ma dara, ngoi to oḏi'i sordado-sordado 'aḏi palene jarana re 'aḏi mapake baju ḇesi tamanga katere. Re baju ḇesi gena-ge 'i difo-difo ko-kolili leja-lejanga, balao sa'olo maḏi nilam, re ḇauru-ḇauru sa'olo walira. Jarana-jarana gena-ge ma sae'e ma tero sa'olo 'o singa ma sae'e, re toma madanga 'i supu u'u, loworo, re walira.

¹⁸ Bahala fara ro'ange: 'O u'u, 'o loworo, re 'o walira ga'a 'i supu toma jarana-jarana ma madanga 'i sisengene manusia ma balangu rimoi toma balangu ro'ange ma dara.

¹⁹ Jarana-jarana gena-ge ma de-de'e 'i tegoro toma madanga re toma di'imi ḏi'i. Ma di'imi ma tero sa'olo ngorana ma sae'e ga'a 'i sipake di'a sisikisa manusia.

²⁰ Mada'a ngowa-ngowa'a ga'a sengene nyangu toma bahala-bahala gena-ge, ananga masiretene ya sieanga i'a ua silamo'o re siḏubuso roh-roh ma jira re jou'ongu ma somoara si'a'a reo guraci, salaka, tamḇaga, maḏi re ate ga'a ananga ya 'a'a. Mo-moini jou'ongu ma somoara gena-ge 'i oḏi'i mai ua, 'isene mai ua re tagi mai ua.

²¹ Ananga ḏi'i ya sieanga i'a ua madiga'a ma jira: Sisenge-sengene ngowa'a, 'a'a sarati ma jira, sudala re tori'i.