Tingoýi 8 - Jaji ma Su-sungi

Segele ma nyo-nyoimi tumudingi

¹ Wakutu Doba ma Ngowa 'a woi'i segele ma nyo-nyoimi tumudingi, soroga 'i dadi 'i ogo-ogoro i'a ma di'ara ḏa minit nyagi ro'ange.

² Ḏua ngoi to oḏi'i mala'ekata nga tumudingi ga'a 'aḏi made-de'oso ra Ma Jou'ongu Madutu 'ai biono re 'aḏi sanga terompet ngai tumudingi.

³ Mala'ekata lelegu matengo 'o sapolo re 'o made'oso co-cori toma tau'u jou-jou ma ngi'i re 'o gasa sawo'o guraci di'a tau'u manyanyi. Mala'ekata gena-ge 'o dawongo manyanyi ma repe masala di'a 'o tau'u mamete'e Ma Jou'ongu Madutu 'ai 'umata manga nyiata. Ḏua unanga 'o tau'u mo-moini gena-ge toma meja guraci ra Ma 'Olana 'ai ḏe-ḏegoro ma biono.

⁴ Jou-jou gena-ge ma loworo re Ma Jou'ongu Madutu 'ai 'umata manga nyiata 'i pere toma sawo'o guraci ga'a mala'ekata 'a gu'u ngadolo Ma Jou'ongu Madutu 'ai biono.

⁵ Gena ḏua, mala'ekata gena-ge 'o 'oro sawo'o guraci re 'a siromanga rema u'u ma ngaboso toma tau'u jou-jou ma ngi'i. Ḏua unanga 'a sipoini toma tana'a ma re'u singadolo 'i dadi ḇeḇelanga cawi-cawi re 'o murasa 'i rurusu kara 'i dadi wusu.

Mala'ekata nga tumudingi 'aḏi wusu ma terompet

⁶ Gena-ge togumu i'a, mala'ekata nga tumudingi nange-ge 'aḏi ḏu-ḏuanga ḏua di'a wusu terompet.

⁷ Mala'ekata ma mulaingi 'o wusu terompet, besa'a 'es re u'u 'i ma'u capuru reo ngaunu 'i eta'a da'u diwanga tala. Ḏua dungia ma balangu rimoi toma balangu ro'ange ma dara, enanga 'i ro'u. So'o gena-ge ḏi'i, ate-ate ma balangu rimoi toma balangu ro'ange ma dara re rurubu mo-moini, enanga gena-ge 'i ro'u.

⁸ Gena ḏua, mala'ekata ma nyo-nyoimi romoḏiḏi 'o wusu terompet, re 'i dadi bahala lai lamo'o, ma tero sa'olo kie 'i ro'u leja-lejanga siupa'a toma ngoloto. Dadi ma ngoloto ma balangu rimoi toma balangu ro'ange ma dara 'i dadi ngaunu,

⁹ singadolo makhluk 'ahu-'ahu toma ngoloto ma balangu moi toma balangu ro'ange ma dara, enanga 'i sengene. So'o gena ḏi'i kapala-kapala ma balangu moi toma balangu ro'ange ma dara, enanga 'i iranga.

¹⁰ Gena ḏua, mala'ekata ma nyo-nyoimi ro'ange 'o wusu terompet re 'age mumuḏungu pako-pako ngai moi, 'i leja-lejanga sa'olo 'oboro 'i eta'a da'u diwanga tala. Re mumuḏungu gena-ge 'i nga'unu ḇanyo ma lese dina toma utu'u singadolo dai toma la'o ma balangu rimoi toma balangu ro'ange ma dara.

¹¹ Mumuḏungu gena-ge ma lomanga “Mamaḏi.” Sababu gena-ge ḇanyo-ḇanyo ma balangu rimoi toma balangu ro'ange ma dara, enanga 'i dadi mamaḏi. Ngowa'a repe ga'a 'aḏi ka'e ḇanyo gena-ge 'aḏi sengene.

¹² Gena ḏua, mala'ekata ma nyo-nyoimi rata 'o wusu terompet. Re wangere ma la'o, ngara, mumuḏungu mo-moini, enanga gena-ge ma cahaya ma balangu rimoi toma balangu ro'ange, 'i dadi iranga. Dadi wangere re lobi'i ma balangu rimoi toma balangu ro'ange ma dara, 'i tarangi ua.

¹³ Gena ḏua, ngoi to oḏi'i re to 'isene 'o namo kareba rimoi 'i solo-soloro toma gau'u re 'i poa-poa'a, “Bahala, bahala, bahala 'i singe-ngeta'a toma ngowa'a mo-moini toma dungia ma dara wakutu mala'ekata ma lelegu nga ḏu'ange 'aḏi wusu ma terompet!”