Tingoýi 7 - Jaji ma Su-sungi

Ma Jou'ongu Madutu 'ai 'umata nga cala latu moi re cala nyagi rata re cala rata

¹ Pasala i'a, ngoi to oḏi'i mala'ekata nga ḏuata 'aḏi made-de'oso toma tana'a ḇuḇuku rata, ananga 'aḏi sitogumu karawiana, la karawiana enanga 'i wusu awa bae toma tana'a ma re'u, bae toma ngoloto bolo toma ate-ate.

² Ḏua, ngoi to oḏi'i mala'ekata ma lelegu 'o sapolo da'a kore mie ino, unanga 'o gasa segele ra Ma Jou'ongu Madutu ino, Unanga ga'a 'ahu-'ahu. Mala'ekata gena-ge 'o 'aro'o 'a siduga-duga mala'ekata nga ḏuata nange-ge ga'a sanga kuasa ḏua ra Ma Jou'ongu Madutu di'a sijira tana'a ma re'u re ngoloto,

³ re 'o kanau, “Sijira awa tana'a ma re'u bolo ngoloto, bolo ate-ate singadolo ngomi mi pula'a nana'o segele toma ngowa'a manga memese, ananga gena-ge ga'a ta Ma Jou'ongu Madutu ma tero sa'olo 'Ai budaka-budaka, Unanga gena-ge ga'a nanga Jou'ongu Madutu.”

⁴ Ḏua ngoi, ngowa'a ri siajele mangale ngowa'a repe: nga cala latu moi re cala nyagi rata re cala rata (144,000), ananga gena-ge 'aḏi sanga nana'o segele tamanga memese ra Ma Jou'ongu Madutu ino re manga 'asala toma bangsa Israel suku nyagi moi re romoḏiḏi.

⁵ Toma suku moi-moi 'age ngowa'a manga repe nga cala nyagi moi re cala romoḏiḏi ga'a sanga nana'o segele. Gena-ge toma suku: Yehuda, Ruben, Gad,

⁶ Asyer, Naftali, Manasye,

⁷ Simeon, Lewi, Isakhar,

⁸ Zebulon, Yusuf re Benyamin.

Manusia manga repe ma tero sa'olo dongi toma ngoloto ma 'uḏu

⁹ Pasala i'a, ngoi to oḏi'i ḏi'i, manusia manga repe ma tero sa'olo dongi toma ngoloto ma 'uḏu ga'a matengo i'a mai ua nga'unu 'a roimi. Ananga gena-ge manga 'asala toma bangsa mo-moini, nagara mo-moini, suku mo-moini, re demo mo-moini. Ananga gena-ge 'aḏi mapake juba buḏo-buḏo re tamanga giama 'aḏi gu-gu'u ate palem ma umanga re 'aḏi made-de'oso talaḏi ra Ma 'Olana 'ai ḏe-ḏegoro re Doba ma Ngowa ma biono.

¹⁰ Ananga gena-ge 'aḏi kanau ya siduga-duga, “Nanga salamata 'i sapolo tananga Jou'ongu Madutu ino, ga'a 'O tegoro ra Ma 'Olana 'ai ḏe-ḏegoro re ra Doba ma Ngowa gena-ge!”

¹¹ 'Age mala'ekata mo-moini ga'a 'aḏi made-de'oso sigoloḏi Ma 'Olana 'ai ḏe-ḏegoro, bi-biri'i—bi-biri'i re makhluk nga ḏuata ḏi'i. Ananga mo-moini gena-ge 'aḏi mapagara manga biono tala ra Ma 'Olana 'ai ḏe-ḏegoro ma biono re silamo'o re siḏubuso Ma Jou'ongu Madutu.

¹² Ananga 'aḏi kanau mamete'e: “ 'Amin! Ngene wo puji re silamo'o nanga Jou'ongu Madutu ga'a mulia re 'akala soro'unu. Ngene wo sibere ie murasa ma la re wo silamo'o Unanga. Unanga gena-ge 'o kuasa re de-de'e di'a kasingado-ngadolo i'a! 'Amin!”

¹³ Matengo toma bi-biri'i—bi-biri'i gena-ge manga sigolona 'o sano ra ngoi, “Ngowa-ngowa'a nena-ne ga'a mapake juba buḏo, ananga nena-ne 'a guna re 'aḏi sapolo le'a ino?”

¹⁴ Ngoi to sangoro, “Ngoi ta waro ua, Jou. Jou masiretene na waro.” Ḏua unanga 'o kanau ra ngoi, “Ananga nena-ne raḏi palisi'i 'orasa sikisa ma lamo'o. Ananga manga juba reya 'uju reo Doba ma Ngowa ma ngaunu singadolo ri buḏo.

¹⁵ Sababu gena-ge, nange-ne ananga 'aḏi made-de'oso ra Ma Jou'ongu Madutu 'ai ḏe-ḏegoro ma biono, re 'aḏi de-de'oso re 'aḏi silamo'o re siḏubuso Unanga gena-ge, lobi'i re wangere Tai wala. Re Ma Jou'ongu Madutu ga'a 'o tegoro ra Ma 'Olana 'ai ḏe-ḏegoro, Unanga gena-ge ḏuanga i'a 'o tegoro mamete'e ra ananga re ya'u saolo.

¹⁶ Ananga gena-ge 'aḏi basono sawini re camala dudungu riwara; wangere ma la'o bolo ma sa-sau'u ya'u 'erese riwara,

¹⁷ Sababu Doba ma Ngowa gena-ge ga'a 'o tegoro sebanga ra Ma 'Olana 'ai ḏe-ḏegoro 'o dadi ananga manga sowohi. Unanga ḏuanga i'a ya'u sigasa toma ḇanyo 'ahu ma utu'u. Re Ma Jou'ongu Madutu 'a singi-ngiranga manga la'o ma 'ongoro mo-moini.”