Tingoýi 21 - Jaji ma Su-sungi

Diwanga su-sungi re dungia su-sungi

¹ Ḏua ngoi to oḏi'i diwanga su-sungi re dungia su-sungi sababu diwanga ma siḏa re dungia ma siḏa ri iranga re oḏi'i ngoloto riwara,

² kara ngoi to oḏi'i limau 'ofi-'ofi, gena-ge limau Yerusalem su-sungi, 'uci da'u soroga ra Ma Jou'ongu Madutu tala. Limau gena-ge 'i sidodahe pasala ḏua sa'olo diai geri molo'ara we-were'a matengo di'a mo ma'u sanga geri molo'ara na-nau'u.

³ Re ngoi to 'isene iḏingi ra Ma Jou'ongu Madutu 'ai ḏe-ḏegoro gena-ge 'i kanau ya siduga-duga, ma betongo so'o ne: “Mulaingi nange-ne Ma Jou'ongu Madutu 'o tegoro re 'o 'ahu toma manusia manga sigolona. Ananga ḏuanga i'a 'aḏi dadi Unanga 'ai ngowa-ngowa'a. Re Ma Jou'ongu Madutu masiretene 'age Ma Jou'ongu Madutu ga'a ananga 'aḏi silamo'o re siḏubuso.

⁴ Unanga 'o singi-ngiranga ananga manga la'o ma 'ongoro. Kama sengene riwara, kama 'akala kangela riwara, kama rerese ma gaḏi riwara bolo kama basono si-siḏi riwara. Sababu 'ori i'a ma siḏa gena-ge ri iranga mo-moini ḏua.”

⁵ Ma Jou'ongu Madutu ga'a 'O tegoro toma ḏe-ḏegoro gena-ge 'O kanau, “Nange-ne, Ngoi to 'a'a mo-moini 'i dadi su-sungi!” Unanga 'o kanau ḏi'i ra ngoi, “Nena-ne balasu na lefo, sababu demo-demo gena-ge 'i banari re tantu ḏua 'i sitotomo.”

⁶ Ḏua Unanga 'o kanau ra ngoi, “Togumu ḏua! Ngoi nena-ne 'Alfa re 'Omega, Ngoi nena-ne Ma Mulaingi re Ma Ḏo-ḏogumu. 'A guna ḇato basono madanga dudungu Ngoi to pula'a ḇanyo kama fangu ua toma ḇanyo ma cimi ga'a 'i pula'a 'ahu.

⁷ 'A guna ḇato 'ai ngo-ngaku kama elala ua singadolo 'o sengene, barakati mo-moini gena-ge ḏuanga i'a 'o sanga ra Ngoi. Ngoi to dadi Ma Jou'ongu Madutu ga'a unanga 'o silamo'o re siḏubuso re unanga 'o dadi 'Ari ngowa-ngowa'a.

⁸ Mada'a ngowa'a ga'a manga ngo-ngaku taḇe i'a, ngowa'a 'aḏi ngaku ua, ngowa-ngowa'a ga'a madiga'a jira, ngowa-ngowa'a ga'a sisengene ngowa'a, ngowa'a su-sudala, ngowa'a ga'a 'a'a sarati, ngowa'a ga'a 'aḏi silamo'o re siḏubuso jou'ongu ma somoara, ngowa'a sa-sakala, ananga mo-moini gena-ge ḏuanga i'a 'aḏi siupa'a toma ngoloto u'u ga'a walira leja-lejanga. Gena-ge ma ngale: Ananga 'aḏi basono sengene ma soi ḏiḏi.”

Limau Yerusalem su-sungi

⁹ Mala'ekata rimoi toma mala'ekata tumudingi ma sigolona ga'a 'o gu'u-gu'u sawo'o tumudingi, ga'a ma dara 'i romanga reo bahala fara tumudingi ma ḏo-ḏogumu, 'o sapolo ra ngoi re 'o kanau, “Ino! Ngoi ḏuanga i'a to sijumu ra ngana geri molo'ara we-were'a, munanga gena-ge Doba ma Ngowa 'ai were'a.”

¹⁰ Dadi Ma Ngagara 'Ofi-'Ofi ri ḏegoro ngoi kara mala'ekata gena-ge ro gasa ngoi toma kie kau'u madutu ma tubu. Unanga 'o sijumu ra ngoi Yerusalem, gena-ge limau 'Ofi-'Ofi, enanga aro 'uci-'uci da'u soroga ra Ma Jou'ongu Madutu tala.

¹¹ Limau gena-ge 'i romanga reo cahaya re mulia ra Ma Jou'ongu Madutu ino, ma lalaki sa'olo maḏi permata re maḏi baiduri pandan, re ma lalara ma tero sa'olo kristal.

¹² Limau ma hisa dounu 'i sigoloḏi lai kau'u re lai te'e, re ma ngalana lamo'o nyagi moi re romoḏiḏi: Ngalana rimoi ma jaga mala'ekata matengo. Toma ngalana-ngalana lamo'o gena-ge 'i silefo lomanga suku bangsa Israel nyagi moi re romoḏiḏi.

¹³ 'Age rema ngalana lamo'o ro'ange sitalaḏi toma wangere ma la'o, ro'ange sitalaḏi toma kore sara, ro'ange sitalaḏi toma kore mie, ro'ange sitalaḏi toma wangere ma soḏu.

¹⁴ Limau gena-ge ma hisa dounu simomi'i toma maḏi bangini nyagi moi re romoḏiḏi ma re'u. Toma maḏi bangini nyagi moi re romoḏiḏi gena-ge 'i silefo Doba ma Ngowa 'ai so-soma'a nga nyagi moi re nga muḏiḏi manga lomanga: Maḏi bangini rimoi, lomanga rimoi.

¹⁵ Mala'ekata ga'a ro kanau ra ngoi, unanga 'o gu'u didiki du-duga si'a'a reo guraci di'a 'a situga limau, limau ma ngalana-ngalana lamo'o re ma hisa dounu.

¹⁶ Limau gena-ge 'i pasagi rata. Ma giḏanga re maroata 'i ma tero. Ḏua mala'ekata gena-ge 'o tuga limau gena-ge rai didiki du-duga: Ma giḏanga sanga kilo cala ḏiḏi re latu rata. Ma roata re ma gau'u 'i ma tero sa'olo ma giḏanga ḏi'i.

¹⁷ Wakutu mala'ekata 'a tuga ma hisa dounu 'a sanga ma gau'u metere nyagi rarama. Du-duga ga'a mala'ekata 'a pake ma tero sa'olo du-duga manusia pake.

¹⁸ Limau ma hisa dounu gena-ge si'a'a reo maḏi baiduri pandan re limau masiretene si'a'a reo guraci madutu 'i la-lara sa'olo kaca.

¹⁹ Limau gena-ge ma bangini ya sirousu reo maḏi permata fara muḏuo i'a: Bangini ma mulaingi si'a'a reo maḏi baiduri pandan, ma nyo-nyoimi romoḏiḏi si'a'a reo maḏi nilam, ma nyo-nyoimi ro'ange si'a'a reo maḏi yakut, ma nyo-nyoimi rata si'a'a reo maḏi zamrud,

²⁰ ma nyo-nyoimi romotoa si'a'a reo maḏi baiduri sepah, ma nyo-nyoimi rarama si'a'a reo maḏi delima, ma nyo-nyoimi tumudingi si'a'a reo maḏi ratna cempaka, ma nyo-nyoimi tu'angere si'a'a reo maḏi pirus, ma nyo-nyoimi siworo si'a'a reo maḏi topas, ma nyo-nyoimi nyagi moi si'a'a reo maḏi krisopras, ma nyo-nyoimi nyagi moi re rimoi si'a'a reo maḏi lazuardi, ma nyo-nyoimi nyagi moi re romoḏiḏi si'a'a reo maḏi kecubung.

²¹ Ma ngalana lamo'o nyagi moi re romoḏiḏi gena-ge si'a'a reo mutiara guḏi moi re ngai ḏiḏi: Ngalana rimoi, mutiara ngai rimoi. Ngo'omo toma limau ma dara gena-ge ya si'a'a reo guraci madutu, ma la-lara sa'olo kaca ciḏo-ciḏoto.

²² Toma limau gena-ge ma dara, ngoi to oḏi'i ua Ma Jou'ongu Madutu 'ai Wala, sababu 'age Ma Jou ga'a Ma Jou'ongu Madutu, Unanga ga'a 'Ai kuasa ma pari cua, re Doba ma Ngowa toma limau gena-ge ma dara. Dadi Wala gena-ge 'i paralu riwara.

²³ Limau gena-ge paralu ua wangere ma la'o ya 'erese, bolo ngara ya 'erese, sababu Ma Jou'ongu Madutu 'ai mulia masiretene ya 'erese toma limau gena-ge re Doba ma Ngowa gena-ge 'i 'erese ḏi'i sa'olo lapuru.

²⁴ Ngowa-ngowa'a toma dungia sitabi donga ḏuanga i'a 'aḏi tagi toma tarangi gena-ge ma dara re 'olana-'olana ḏi'i ḏuanga i'a 'aḏi gasa manga harata singosama toma limau gena-ge ma dara.

²⁵ Limau gena-ge ma ngalana-ngalana lamo'o ḏuanga i'a 'i welanga dungia ma giḏanga i'a kama kuci ua, sababu limau gena-ge kama lobi'i ua.

²⁶ Ngowa-ngowa'a mo-moini 'aḏi gasa singosama manga harata toma limau ma dara di'a silamo'o Ma Jou'ongu Madutu re Doba ma Ngowa.

²⁷ Mada'a ngowa'a su-sudala bolo ngowa'a ga'a sihaga ngowa'a, ananga gena-ge 'aḏi osama yoḏu'u. Re ḏi'i, 'oru ḇato ga'a 'ori i'a 'i woso-wosono singosama yoḏu'u. Ananga ga'a nyengara 'aḏi osama, pa'i ngowa'a ga'a manga lomanga 'i silefo ḏua toma ngowa'a 'ahu-'ahu manga boku, gena-ge Doba ma Ngowa 'ai boku.